އައްޑޫ ބިޔުރޯ

މޯލްޑިވްސް އިމިގްރޭޝަންގެ ބައެއް މުވައްޒަފުން، މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާ މައްސަލައެއް ފެންމަތިވެއްޖެ އެވެ.

ފުލުހުންގެ އިދާރާއިން ނެރުނު ބަޔާނެއްގައި ބުނެފައިވަނީ، މޯލްޑިވްސް އިމިގްރޭޝަންގެ ބައެއް މުވައްޒަފުން މަޤާމުގެ ނުފޫޒު ނަހަމަ ގޮތުގައި، ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒުގެ މަންފާ ހޯދަމުންދާ ކަމުގެ މައުލޫމާތު ލިބުމާއި ގުޅިގެން، މިމައްސަލަ ތަޙްޤީޤް ކުރަމުންދާ ކަމަށެވެ.

މިމައްސަލައާއި ގުޅިގެން 20 މާރޗް 2025 ވަނަ ދުވަހު ހިންގި އޮޕަރޭޝަނެއްގައި ގެއެއް ބަލައި ފާސްކޮށް 3 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އެހެންނަމަވެސް ފުލުހުންގެ ބެލުމުގެ ދަށަށް ގެންދިޔަ އެއްވެސް ފަރާތެއްގެ ވަނަވަރެއް ހާމަކޮށްފައެއް ނުވެއެވެ.

އަދި މިމައްސަލައިގެ ތަޙްޤީޤް ކުރިއަށްދާ ވަރަކުން މައުލޫމާތު ހިއްސާކުރަމުންދާނެ ކަމަށްވެސް ފުލުހުން ވަނީ ބުނެފައެވެ.

މިފަދަ މައްސަލައެއް ފެންމަތިވެފައިވާއިރު، ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު މަޤާމުން ވަކިކޮށްފައިވާ ކަމަށް ވަނީ އަޑުތައް ފެތުރިފަ އެވެ. މިކަމާއި މެދު ސަރުކާރުން ރަސްމީގޮތުން އަދި އެއްވެސް އެއްޗެއް ބުނެފައެއް ނުވެއެވެ. ނަމަވެސް ރައީސް އޮފީހުގެ ވެބްސައިޓް ގެ ދައުލަތް ގެ މަޤާމް ތަކުގެ ތިއްބަވާ ބޭފުޅުންގެ ފޯޓޯ ޖެހި ލިސްޓުން ޝައްމާން ވަނީ އުނި ކޮށްފައެވެ.