އާސަންދައިން އުނބަށް ޖަހާ ޕްރައިވެޓް އިންޝުއަރެންސް އޮންނަ މީހުންނަށް ދޭ ސިއްހީ ޚިދުމަތަށް ބިލްކުރުމުގައި ޕްރައިވެޓް އިންޝުއަރެންސަށް އިސްކަން ދޭ އުސޫލު ބަދަލުކޮށްފިއެވެ.

އާސަންދައިން ހާމަކުރި ބަޔާނެއްގައި ބުނެފައި ވަނީ އައުޓް ޕޭޝަންޓު ހިދުމަތްތަކަށް ޕްރައިވެޓް އިންޝުއަރެންސް އަދި އާސަންދަ ހިދުމަތް ލިބޭ އުސޫލަށް އެ ކުންފުނިން ބަދަލު ގެނެސްފައިވާ ކަމަށެވެ.

އެގޮތުން ސިއްހީ ޚިދުމަތްތަކަށް ބިލް ކުރާ އިރު ޕްރައިވެޓް އިންޝުއަރެންސަށް އިސްކަން ދިނުމަށް ނިންމާ، ޕްރައިވެޓް އިންޝުއަރެންސް ހަމަވުމުން ނޫނީ އާސަންދައިން ފައިސާ ނުކެނޑޭ ގޮތަށް އޮތް އުސޫލު އެ ކުންފުނިން ބަދަލުކޮށްފައިވާ ކަމަށް އާސަންދައިން ވަނީ ހާމަކޮށްފައެވެ.

މިއާއި އެކު 19 މާރޗް އިން ފެށިގެން ޑޮކްޓަރަށް ދައްކަން ނަގާ ކޮންސަލްޓޭޝަން ފީ ނަގާނީ އެ އުސޫލާއި އެއްގޮތަށެވެ. އައިޓް ޕޭޝަންޓް އަދި އެހެނިހެން ޚިދުމަތްތަކަށް އެ އުސޫލާއި އެއްގޮތަށް ޚިދުމަތް ދޭން ފަށާނީ މާރޗް 27 އިން ފެށިގެންނެވެ.

ބަދަލާއެކު މީހުންގެ ބިލަށް އަރާ ފައިސާއަށް ފުރަތަމަ ޗާޖު ކުރާނީ ޕްރައިވެޓް އިންޝުއަރެންސް ޕްލޭން އިން ކަމަށާއި އަދި އިތުރުވާ އަދަދު އާސަންދައިން ކެނޑޭނެ ކަމަށްވެސް އެ ކުންފުނިން ބުނެފައިވެ އެވެ.

"އައުޓް-ޕޭޝަންޓް" ގެ ހިދުމަތްތަކަށް ބިލު ކުރާ ގޮތަށް އޮކްޓޯބަރު 31، 2024 ގަ ވަނީ ބަދަލު ގެނެސްފައެވެ. ސަރުކާރުން އޭރު ބުނީ އެ ބަދަލުތައް ގެނައީ އިސްރާފު ކުޑަކުރުމަށް ކަމަށެވެ.

އެގޮތުން2 ޕްރައިވެޓް އިންޝުއަރެންސް އޮންނަ ފަރާތްތަކަށް އައުޓް ޕޭޝަން ޚިދުމަތް ނުވަތަ އެނދުމަތި ނުވެ ހޯދާ ޚިދުމަތްތަކަށް ދޭ އާސަންދަ އޭރު ވަނީ ކަނޑާލާފައެވެ. ހަމައެހެންމެ ޕްރައިވެޓް އިންޝުއަރެންސްގެ ޕެކޭޖް ހަމަވުމުން އާސަންދައިން ޚިދުމަތަށް އެދެވޭގޮތަށް އުސޫލަށް އޭރު ބަދަލު ގެނައެވެ.

އެ ބަދަލު ގެނައުމުން ސަރުކާރަށް އެތައް ބައެއްގެ ފާޑުކިޔުން ވަނީ އަމާޒުވެފަ އެވެ. ކުރިން އޮތްގޮތަށް ޕްރައިވެޓް އިންޝުއަރެންސް ހުރި ފަރާތްތަކަށް ވެސް އާސަންދަ ޚިދުމަތް ލިބޭ ގޮތް ހަމަޖައްސާފައި މި ވަނީ އެމްޑީޕީން ކުރަމުން ދިޔަ ސިލްސިލާ މުޒާހަރާތަކުގައި އާއްމުން އާސަންދަ ޚިދުމަތަށް ގެނައި ބަދަލުތަކާއި މެދު ކެނޑި ނޭޅި އަޑު އުފުލާ، ސަރުކާރު ޕްރެޝަރަށް ވެއްޓިފައިވާ ދަނޑިވަޅެއްގަ އެވެ.