ވައިގެ މަގުން އެތެރެ ކުރަން އުޅުނު 2000ށް ވުރެ ގިނަ ވޭޕްގެ ސާމާނު އަތުލައިގެންފި

ވައިގެ މަގުން ރާއްޖެއަށް އެތެރެ ކުރަން އުޅުނު 2000ށް ވުރެ ގިނަ ވޭޕްގެ ސާމާނު އަތުލައިގެންފިއެވެ.

މޯލްޑިވްސް ކަސްޓަމްސް ސަރވިސްއިން ބުނީ ވައިގެ މަގުން ސިއްރުން ރާއްޖެއަށް އެތެރެކުރަން އުޅުނު ވޭޕްގެ 2008 އައިޓަމް އަތުލައިގަނެފައިވާ ކަމަށެވެ.

Advertisement

މި ތަކެތި އަތުލައިގަނެފައިވަނީ މި މަހުގެ 12 ވަނަ ދުވަހު ރާއްޖެއަށް އެތެރެކޮށްފައިވާ އެއަރކާގޯ ޝިޕްމެންޓެއްގައި ވޭޕް ފޮރުވާފައި ހުރިކަމަށް ޝައްކުކުރެވިގެން އިތުރަށް ބަލާފާސްކުރުމުގެ ތެރޭގައި ކަމަށް ކަސްޓަމްސްއިން ބުނެއެވެ.

ކަސްޓަމްސްއިން ދަނީ މި މައްސަލަ އިތުރަށް ތަހުގީގު ކުރަމުންނެވެ.

މިމަހުގެ 12 ވަނަ ދުވަހު ވައިގެ މަގުން ރާއްޖެއަށް އެތެރެ ކުރަން އުޅުނު 2000ށް ވުރެ ގިނަ ވޭޕްގެ ސާމާނު އަތުލައިގެންފައިވާއިރު، މިމަހުގެ 5 ވަނަ ދުވަހު ކަނޑު މަގުން ރާއްޖެ އެތެރެކުރަން އުޅުނު 400 ވޭޕް ސްޓިކް ވެސް އަތުލާގަނެފައިވެއެވެ. މީގެ އިތުރުން މިމަހުގެ ތެރޭގައި މާލޭގައި ފުލުހުން ހިންގި ޚާއްސަ އޮޕަރޭޝަނެއްގައި މާލޭގައި ވޭޕްގެ ވިޔަފާރި ކުރަމުންދިޔަ ދެތަނެއް ބަލައި ފާސްކޮށް، ގިނަ އަދަދެއްގެ ވޭޕްގެ އާލަތްތައް އަތުލައިގަނެފައިވެއެވެ. އަދި ބަންގްލަދޭޝް ރައްޔިތެއް ހައްޔަރުކޮށްފައިވެއެވެ.

ރާއްޖެއަށް ވޭޕު އެތެރެކުރުމާއި ވޭޕު ބޭނުންކުރުމާއި ގެންގުޅުން އަދި އޭގެ ވިޔަފާރި ކުރުން 2024 ވަނަ އަހަރުގެ ފަހުކޮޅު ވަނީ މަނާކޮށްފައެވެ.

ދުންފަތް ކޮންޓްރޯލުކުރުމާބެހޭ ގާނޫނު (ގާނޫނު ނަންބަރު 15/2010) އަށް 1 ވަނަ އިސްލާހު ގެނައުމުގެ ގާނޫނުގެ ދަށުން ގެނެވުނު އިސްލާހާ ގުޅިގެން، ވޭޕުކުރުމާއި، އެ ވިއްކުމާއި، އޭގެ އެއްވެސް މުއާމަލާތެއް ކުރުމުން ޖޫރިމަނާ ކުރާނެ އަަދަދުތަކުގެ ތެރޭގައި، ވޭޕް ބޭނުންކޮށްފިނަމަ 5000 ރ. އިން ޖޫރިމަނާ ކުރާއިރު، ވޭޕް ވިއްކާ ކޮންމެ މީހަކު 20،000 ރ. ޖޫރިމަނާ ކުރާނެއެވެ. އަދި ވޭޕް ވިއްކާ ކޮންމެ ވޭޕަކަށް 10،000 ރ. ޖޫރިމަނާ ކުރާއިރު، ހިލޭ ވެސް ވޭޕެއް ދީފިނަމަ ވެސް 10،000 ރ. ޖޫރިމަނާ ކުރާގޮތަށް ވޭޕްގެ ގާނޫނުގައި ވެއެވެ.

މީގެ އިތުރުން ގާނޫނުގައިވާ ގޮތުން، އެތެރެކުރި ފަރާތް 4،050،000ރ. އިން ޖޫރިމަނާކުރެވޭނެ އެވެ. ވޭޕް ކުރުމަށް ބޭނުން ކުރާ އާލާތްތަކާއި އެ އެތަކެތި ބޭނުން ކުރުމަށް ތައްޔާރުކޮށްފައިވާ އުފެއްދުންތައް އެތެރެކޮށްފި ނަމަ، 50،000ރ. އިން ޖޫރިމަނާ ކުރެވެއެވެ.