ގައުމުގެ ކަންކަން ހަލާކުވެ ހިނގައްޖެ، މިކަންކަން ރަނގަޅު ކުރެވޭނީ ރައްޔިތުން އެންމެން ނުކުމެ އަޑުއުފުލައިގެން: ބިގޭ

މި ގައުމުގައި މިހާރު ރަނގަޅަށް ދާ އެއްވެސް ކަމެއް ނެތް ކަމަށާއި މުޅި ގައުމު ހަލާކުވެ ހިނގައްޖެ ކަމަށާއި މިކަންކަން ރަނގަޅު ކުރެވޭނީ ހުރިހާ ރައްޔިތުން މަގުތަކަށް ނުކުމެ އަޑު އުފުލައިގެން ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެ އެވެ.

އޭނާ އެފަދައިން ވިދާޅުވީ ބުދަ ދުވަހުގެ ރޭ އެމްޑީޕީން ބޭއްވި މުޒާހަރާގައި ވާހަކަދައްކަވަމުންނެވެ.

ބިގޭ ވިދާޅުވީ ގައުމުގައި ބޮއްސުންލާފައި ވާ ކަންކަން ހައްލުކުރަން މިތިބީ ނުކުމެ ކަމަށާއި މި އިސްލާހީ ހަރަކާތުން އެމްޑީޕީއާއި އެ ޕާޓީގެ ބައިވެރިން ފަހަތައް ޖެއްސޭނޭ އެއްވެސް ބަޔަކު ނެތް ކަމަށެވެ.

ބިގޭ ވިދާޅުވީ އެންމެ ހާ ބާރުތަކެއް ފެށިގެން އަންނަނީ ދިވެހި ރައްޔިތުންގެ ކިބައިން ކަމަށާއި އެގޮތުން ދިވެހި ރައްޔިތުން ބޭނުންވެއްޖެ ކޮންމެކަމެއް ކުރާނޭ ކަމަށާއި ދިވެހި ރައްޔިތުންގެ ހައްޤު ހޯދަން އެ ރައްޔިތުން މަސައްކަތް ކުރާނޭ ކަމަށް އޭނާ ވިދާޅުވިއެވެ.

ބިގޭ ވިދާޅުވީ އެމްޑީޕީން މިހާރު ކުރަމުން މިގެންދާ މަސައްކަތަކީ ދިވެހި ރައްޔިތުންގެ ހައްޤުތައް ހޯދުމުގެ މަސައްކަތް ކަމަށާއި މި މަސައްކަތުގައި ކުޑަވެސް ފަސްޖެހުމެއް ނެތް ކަމަށެވެ.

ބިގޭ ވިދާޅުވީ ރާއްޖޭގައި ދުލާއި ގަލަމުގެ މިނިވަންކަން ހޯދާ، ބާރުތައް ވަކިވެފައިވާ ނިޒާމެއް ޤާއިމް ކުރީ ވަރަށް ގިނަ ބައެއްގެ މަސައްކަތުން ކަމަށާއި އެތައް ދުވަހެއްގެ މަސައްކަތުން އާއްމުން ހާސިލްކުރި ހައްގުތައް މިހާރު ނިގުޅައިގަންނަމުންދާ ކަމަށް ބިގޭ ވަނީ ވިދާޅުވެފައެވެ.

އޭނާ ވިދާޅުވީ މީގެ ކުރިން ޚިޔާލުފާޅުކުރުމުންނާއި ސަރުކާރާއި ދެކޮޅަށް ބަސްބުނުމުން އާއްމުން އަނދަގޮނޑި ޖަހައި ޖަލުގެ ކުޑަގޮޅިއަށް ލާ އެތަކެއް އަނިޔާތަކެއް ދިން ކަމަށެވެ. އަދި އެ އުސޫލު އަލުން އިއާދަވާން ބޭނުން ނުވާ ކަމަށް އޭނާ ވިދާޅުވި އެވެ.

މި ރާއްޖޭގައި ރަނގަޅަށް އޮތީ ކޮންކަމެއްތޯ؟ ތިބޭފުޅުން ވިދާޅުވެބައްލަވާ.. މި ރާއްޖޭގައި ހަމަ އެއްވެސް ކަމެއް ރަނގަޅަކަށް ނެތް. އެހެން ކަމުން އަޅުގަނޑުމެން މިތިބީ މި ބީރުކަންފަތް ތަކަށް އަޑުއިއްވަން ނުކުމެ. އެ ސަބަބައްޓަކައި އަަޅުގަނޑުމެން މިތިބީ މަގުމައްޗަށް ނުކުމެ.

މުހައްމަދު ރަޝީދު ހުސައިން (ބިގޭ)

މީގެ އިތުރުން ބިގޭ ވިދާޅުވީ އެމްޑީޕީން މަގުމައްޗަށް އެއްވެ މުޒާހަރާ ކުރަމުން ދަނީ ރާއްޖޭގައި އޮތް މިނިވަންކަން އެގޮތުގައި ދަމަހައްޓަން ކަަމަށާއި އަދި ޤައުމު އޮޔާ ދާތަން ބަލަން އެމްޑީޕީ އިން ނުތިބޭނެ ކަމަށް އޭނާ ވިދާޅުވި އެވެ.

ބިގޭ ވިދާޅުވީ ރާއްޖޭގެ ހުރިހާ ސިނާއަތެއް މިއަދު ފުނޑާލާ، މުޅި ގައުމުގެ ހުރިހާ މުއައްސަސާއަކަށް ރައީސްގެ ނުފޫޒު ފޯރުވާފައިވާ ކަމަށާއި މަގުމައްޗަށް ނުކުމެ އަޑު މިއުފުލަނީ އެކަމުގެ ސަބަބުން އާންމުން އެ އަނިޔާއިން ސަލާމަތްކުރައްވަން ކަމަށް އޭނާ ވިދާޅުވިއެވެ.