އިސްރާއީލުން ސީރިއާ އަށް ދިން ހަމަލާ، ސައުދީ އަރަބިއްޔާ އިން ކުށްވެރި ކޮށްފި 

އިސްރާއީލުން، ވައިގެ މަގުން ސީރިއާ އަށް ދިން ހަމަލާ ސައުދީ އަރަބިއްޔާ އިން ކުށްވެރި ކޮށްފި އެވެ.

އެ ހަމަލާ ތަކަކީ ބައިނަލްއަޤުވާމީ ޤާނޫނުތަކާ ޚިލާފު ކަމެއް ކަމަށް ބުނެ، އެކަމާ ދެކޮޅަށް ފިޔަވަޅު އެޅުމަށް ސައުދީ އަރަބިއްޔާ އިން ވަނީ އދ. ގެ ސަލާމަތީ މަޖިލީހަށް ގޮވާލާފައި އެވެ.

ސައުދީ އަރަބިއްޔާގެ ފޮރިންގ މިނިސްޓްރީ އިން ނެރުނު ބަޔާނެއް ގައި ބުނެފައި ވަނީ، އެ ހަމަލާ ތަކަކީ ސަރަހައްދީ ސަލާމަތާއި ރައްކާތެރިކަމަށް ނުރައްކާވާ ފަދަ ގޮތަކަށް, އިސްރާއީލުން ތަކުރާރުކޮށް ކުރަމުންދާ ޢަމަލެއް ކަމަށެވެ.

އެ ހަމަލާތައް އައީ ސީރިއާގެ ހޮމްސް ސިޓީގެ ދެކުނުގައިވާ ޝިންޝާރު އަދި ޝަމްސިން ރަށްތަކުގެ އަސްކަރީ ތަންތަނަށް އިސްރާއީލުން ބޮން އަޅާފައި ވަނިކޮށެވެ. އިސްރާއީލުގެ މިލިޓަރީ އިން އެންމެ ފަހުގެ ހަމަލާއާ ގުޅޭ ގޮތުން އެއްވެސް އެއްޗެއް ބުނެފައެއް ނުވެ އެވެ.

ނަމަވެސް، ކުރީގެ ހަމަލާ ތަކުގައި ބުނެފައި ވަނީ އެތަން ތަނުގައި ހަތިޔާރާއި، އަސްކަރީ އާލާތްތައް ހުރި ކަމަށެވެ. އެންމެ ފަހުން ދަރާ ސަރަހައްދަށް ދިން ހަމަލާގައި މަދުވެގެން ދެ މީހުން މަރުވެ، 19 މީހުން ޒަޚަމް ވެފައިވާ ކަމަށް ރިޕޯޓު ތަކުގައި ބުނެ އެވެ.

ސައުދީ އަރަބިއްޔާ އިން ވަނީ ސީރިއާގެ ސަރުކާރާއި ރައްޔިތުންނާއެކު އެއްބައިވަންތަކަން ފާޅުކޮށް، އިސްރާއީލުގެ އަނިޔާވެރި ޢަމަލުތަކާ ދެކޮޅަށް ހަރުދަނާ ފިޔަވަޅު އެޅުމަށް އދ. ގެ ސަލާމަތީ މަޖިލީހުގެ މެންބަރު ޤައުމުތަކަށް ގޮވާލާފައި އެވެ.

އަދި ސަރަހައްދުގައި އިތުރު ހަނގުރާމައެއް ފެތުރިގެން ދިއުން ހުއްޓުވުމަށާއި، އިސްރާއީލް ޖަވާބު ދާރީ ކުރުވުމަށް ގޮވާލާފައިވެ އެވެ.