މަރިޔަމް ވިސާމް، ފަސްޓް ނޭޝަނަލްގެ ޗީފް ކޮމާޝަލް އޮފިސަރުކަމަށް އައްޔަންކޮށްފި

ފަސްޓް ނޭޝަނަލް ފައިނޭންސް ކޯޕަރޭޝަންގެ ޗީފް ކޮމާޝަލް އޮފިސަރުގެ މަޤާމަށް މަރިޔަމް ވިސާމް އައްޔަން ކުރައްވައިފި އެވެ. ފަސްޓް ނޭޝަނަލް ފައިނޭންސް ކޯޕަރޭޝަންގެ ބޯޑް އޮފް ޑިރެކްޓަރުން ވަނީ އެ ކުންފުނީގެ ޗީފް ކޮމާޝަލް އޮފިސަރުގެ މަޤާމަށް މަރިޔަމް ވިސާމް އައްޔަންކުރައްވާފަ އެވެ. އޭނާ މި މަޤާމާއި ހަވާލުވެވަޑައިގެންނެވީ 16 މާރޗް 2025 ގައެވެ.ޗީފް ކޮމާޝަލް އޮފިސަރުގެ ހައިސިއްޔަތުން މަރިޔަމް ވިސާމްގެ މަސްއޫލިއްޔަތުތަކުގެ ތެރޭގައި ފަސްޓް ނޭޝަނަލްގެ ވިޔަފާރީގެ ލަނޑުދަނޑިތަކާ އެއްގޮތްވާ ގޮތުގެމަތިން ވިޔަފާރީގެ ސްޓްރެޓެޖީތައް އެކުލަވާލައި ތަންފީޒުކުރުމާއި، ޕްރޮޑަކްޓް ޑިވެލޮޕްމަންޓް ބެލެހެއްޓުމާއި، ސޭލްސް އަދި މާކެޓިންގ ޓީމްތައް މެނޭޖްކުރުމާއި، އަދި ސްޓްރެޓެޖިކް ޕާޓްނަރޝިޕްތައް ޤާއިމުކުރުން ހިމެނެއެވެ.މަރިޔަމް ވިސާމަކީ ކޯޕަރޭޓް ގަވަރނަންސް، ވިޔަފާރި އަދި މާލީ ގަވާއިދުތައް، އަދި ލީޑަރޝިޕްގެ ދާއިރާއިން 20 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ ބޭފުޅެކެވެ. ރެޖިސްޓްރަރ އޮފް ކޮމްޕެނީޒްގެ މަޤާމު ފުރުއްވުމުގެ އިތުރުން، 2014 އިން 2025 އަށް ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގެ ބޯޑު މެންބަރެއްގެ ގޮތުގައި ޚިދުމަތްކުރައްވާ، އެ އޮތޯރިޓީގެ ޓެކްނިކަލް ކޮމިޓީގެ ޗެއަރޕާސަންގެ މަޤާމުވެސް ފުރުއްވާފައިވެ އެވެ.މިހާރު އޭނާ ހުންނެވީ ރޯޓަރީ ކްލަބް އޮފް މާލޭގެ ރައީސާގެ މަޤާމުގައެވެ. އަދި މޯލްޑިވްސް އިންޓަރނޭޝަނަލް ފައިނޭންޝަލް ސަރވިސަސް އޮތޯރިޓީ (މިފްސާ) ގެ ގަވަރނިންގ ބޯޑު މެންބަރެއްގެ ގޮތުގައިވެސް މަސައްކަތް ކުރައްވައެވެ.މަރިޔަމް ވިސާމް ވަނީ އޮސްޓްރޭލިއާގެ ޔުނިވަރސިޓީ އޮފް ކުއީންސްލޭންޑްއިން ބިޒްނަސް އިކޮނޮމިކްސްގެ މާސްޓަރސް ޑިގްރީއާއި، ޔޫކޭގެ ނޯތަމްބްރިއާ ޔުނިވަރސިޓީއިން މާކެޓިންގ މެނޭޖްމަންޓްގެ ބެޗްލަރސް ޑިގްރީ ހާސިލުކުރައްވާފަ އެވެ.ފަސްޓް ނޭޝަނަލްއަކީ އިންވެސްޓްމަންޓް އެޑްވައިޒަރީ، ވެލްތް މެނޭޖްމަންޓް، އަދި ސެކިއުރިޓީޒް ޓްރޭޑިންގގެ ޚިދުމަތްތައް ފޯރުކޮށްދިނުމުގެ ތެރެއިން ވިޔަފާރިތަކާއި އަމިއްލަ ފަރުދުންނަށް ބާރުވެރިކަން ހޯދައިދިނުމަށް މަސައްކަތްކުރާ، ރާއްޖޭގެ މާލީ ޚިދުމަތްތައް ކުރިއެރުވުމަށް މަސައްކަތްކުރާ އަމިއްލަ ކުންފުންޏެކެވެ.