ތިން ވުޒާރާއެއްގެ މަސައްކަތްތަކުގެ ދާއިރާތަކަށް ގެނައި ބަދަލުތައް މަޖިލީހުން ފާސްކޮށްފި
އަންގާރަ ދުވަހުގެ ޖަލްސާގައި އެ ބަދަލުތައް ފާސްކޮށްފައިވަނީ 50 މެންބަރުންގެ ވޯޓުން
ރައްޔިތުންގެ މަޖިލީހުގެ ޖަލްސާގެ ތެރެއިން
ތިން ވުޒާރާއެއްގެ މަސައްކަތުގެ ދާއިރާ އަށް ރައީސުލްޖުމްހޫރިއްޔާ ގެންނަވާފައިވާ ބަދަލުތައް ރައްޔިތުންގެ މަޖިލީހުން ފާސްކޮށްފިއެވެ.
އަންގާރަ ދުވަހުގެ ޖަލްސާގައި އެ ބަދަލުތައް ފާސްކޮށްފައިވަނީ 50 މެންބަރުންގެ ވޯޓުންނެވެ.
ރައީސް ޑރ.މުހައްމަދު މުއިއްޒު ވަނީ ފަތުރުވެރިކަމާއި ތިމާވެށްޓާއި ބެހޭ ވުޒާރާ އާއި އިމާރާތްކުރުމާއި ގެދޮރުވެރިކަމާއި ބިނާރާއި ބެހޭ ވުޒާރާގެ އިތުރުން މާލީ ކަންކަމާއި ތަރައްގީގެ ރޭވުންތެރިކަމާބެހޭ ވުޒާރާއަށް ބަދަލުތަކެއް ގެންނަވާފައެވެ.
އެގޮތުން ގެންނަވާފައިވާ ބަދަލުތަކަށް ބަލާއިރު ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޙްތިޔާރުގެ ދަށުން އެމަނިކުފާނު ވަނީ ގެދޮރުވެރިކަމާއި ބިމާ އުމްރާނީ ތަރައްގީއާބެހޭ ވުޒާރާ އުވާލައްވާފައެވެ. ހަމައެހެންމެ އިމާރާތްކުރުމާއި ބިނާރާބެހޭ ވުޒާރާގެ ނަން އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާ އަށް ބަދަލުކުރައްވާފައިވެއެވެ.
މީގެ އިތުރުން މާލީ ވުޒާރާގެ ނަން މާލީ ކަންކަމާއި ތަރައްގީގެ ރޭވުންތެރިކަމާބެހޭ ވުޒާރާގެ ނަމަށް ބަދަލު ކުރައްވާފައިވެއެވެ. ރައީސް ގެންނެވި އިތުރު ބަދަލަކަށް ބަލާއިރު މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާ އުވާލައްވައި ފަތުރުވެރިކަމާބެހޭ ވުޒާރާގެ ނަން ފަތުރުވެރިކަމާއި ތިމާވެއްޓާބެހޭ ވުޒާރާގެ ނަމަށް ވަނީ ބަދަލުކުރައްވާފައެވެ.
