ހޫތީންގެ ހަމަލާތަކަށް އީރާން ޒިންމާ ކުރުވާނެ ކަމަށް ޓްރަމްޕް ވިދާޅުވެއްޖެ

ޔަމަނުގެ ހޫތީންގެ ހަމަލާތަކަށް އީރާން ޒިންމާ ކުރުވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ ޔަމަނުގެ ހޫތީން ދޭ އިތުރު ހަމަލާތަކަށް އީރާން ޒިންމާ ކުރުވައި، "ނުރައްކާތެރި" ނަތީޖާތަކާ ކުރިމަތިލާން ޖެހޭނެ ކަމަށެވެ. މި ބަޔާން އައިސްފައިވަނީ ވޭތުވެދިޔަ ހަފްތާ ބަންދުގައި އެމެރިކާއިން ހޫތީންނާ ދެކޮޅަށް ހިންގި ސިފައިން އޮޕަރޭޝަނަށް ފަހުގައެވެ.ޓްރޫތް ސޯޝަލްގައި ކުރެއްވި ޕޯސްޓެއްގައި ރައީސް ޓްރަމްޕް ވިދާޅުވެފައިވަނީ ހޫތީންގެ ފަރާތުން އަންނަ ކޮންމެ ހަމަލާއަކީ އީރާނުގެ އިރުޝާދާއި ހަތިޔާރުން ކުރެވޭ ހަމަލާއެއްގެ ގޮތުގައި ބެލެވޭނެ ކަމަށެވެ. އަދި މިކަމުގެ ސަބަބުން އީރާނަށް ނުރައްކާތެރި ނަތީޖާތަކާ ކުރިމަތިލާން ޖެހޭނެ ކަމަށް އިންޒާރު ދެއްވިއެވެ."ޔަމަނުގެ ރައްޔިތުން ނަފްރަތުކުރާ ހޫތީ ޖަރީމާކުރުވާ މީހުންނާއި ބަޔަކު ދެމުންދާ އެތައް ސަތޭކަ ހަމަލާއެއް އަންނަނީ އީރާނުގެ ފަރާތުން" ކަމަށް ރައީސް ޓްރަމްޕް ވިދާޅުވިއެވެ. އީރާނުން ހޫތީންނަށް ހަތިޔާރާއި، ފައިސާ އަދި އިންޓެލިޖެންސް މަޢުލޫމާތު ފޯރުކޮށްދޭ ކަމަށްވެސް ޓްރަމްޕް ތުހުމަތު ކުރެއްވިއެވެ.ހޫތީން ބުނެފައިވަނީ "ޔޫއެސްއެސް ހެރީ އެސް ޓްރޫމަން" އުޅަނދަށް ޑްރޯނާއި މިސައިލް ހަމަލާ ދީފައިވާ ކަމަށެވެ. ނަމަވެސް މި ހަމަލާ ބަލިކޮށްލެވުނު ކަމަށާއި އެއްވެސް ގެއްލުމެއް ލިބިފައި ނުވާ ކަމަށް އެމެރިކާ ސިފައިންގެ އިސްވެރިން ބުނެފައިވެއެވެ.ހޫތީންނަށް އެހީތެރިވެދޭ އީރާނުގެ ޖާސޫސީ އުޅަނދުފަހަރާއި އެހެނިހެން ވަސީލަތްތަކަށް ވެސް އަމާޒުކޮށް ހަމަލާ ދެވިދާނެ ކަމަށް ވައިޓް ހައުސްގެ ނެޝަނަލް ސެކިއުރިޓީ އެޑްވައިޒަރު މައިކް ވޯލްޓްޒް އިންޒާރު ދެއްވިއެވެ.