"މުޒާހަރާކުރުމުން ފުލުހަށް ހާޒިރުކުރުމަކީ މީގެ 19 ވަރަކަށް އަހަރު ކުރިން ބޭނުންކޮށް ފެއިލްވެފައިވާ ސިޔާސަތެއް"

މުޒާހަރާކުރުމުން ފުލުހަށް ހާޒިރުކުރުމަކީ މީގެ 19 ވަރަކަށް އަހަރު ކުރިން ބޭނުންކޮށް ފެއިލްވެފައިވާ ސިޔާސަތެއް ކަމަށް ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ ސިޔާސީ ހަރަކާތްތަކުގައި އިސްކޮށް އުޅޭ ފާތިމަތު ޝިއުނާ ވިދާޅުވެއްޖެއެވެ.

މިހާރު އެމްޑީޕީން ކުރަމުންދާ ސިލްސިލާ މުޒާހަރާތަކާ ގުޅިގެން އެ ޕާޓީގެ ސިޔާސީ ހަރަކާތްތަކުގައި އިސްކޮށް އުޅުއްވާ މަރިޔަމް ޒުބައިރު (މަންދީ) އަދި ފާތިމަތު ޝިއުނާ ފުލުހަށް ހާޒިރުކުރީ ހޯމަ ދުވަހުއެވެ. އެ ދެ މީހުން ވެސް ފުލުހަށް ހާޒިރުކޮށްފައި ވަނީ ހޯމަ ދުވަހު މެންދުރު ފަހު 13:30 އަށެވެ.

Advertisement

ފުލުހަށް ހާޒިރުކުރުމާއި މެދު ވާހަކަދައްކަވަމުން ޝިއުނާ ވިދާޅުވީ މުޒާހަރާކުރުމަކީ މި ގައުމުގައި އަލަށް ހިނގާ ކަމެއް ނޫން ކަމަށެވެ. މީގެ ކުރިން މިއަށް ވުރެ ވަރުގަދަ މުޒާހަރާތައް ކުރި އިރު ވެސް ފުލުހަށް ހާޒިރުކޮށް ބިރުދައްކާފައި ނުވާ ކަމަށް އޭނާ ވިދާޅުވިއެވެ. އަދި އެމްޑީޕީން ނުކުންނަނީ ސަރުކާރުން އާއްމުންގެ ހައްގުތައް ހޯދައިދިނުމަށް ކަމަށާއި އެއީ ކުށެއް ނޫން ކަމަށް އޭނާ ވިދާޅުވިއެވެ. ޝިއުނާ ވިދާޅުވީ މިހެން ބިރު ދައްކައިގެން އެމްޑީޕީ ފަހަތަށް ނުޖެއްސޭނެ ކަމަށެވެ.

ފުލުހަށް ހާޒިރުވުމަށް އަންގާ ޝިއުނާ އަށް އަށް ފޮނުވި ޗިޓުގައި ބުނެފައި ވަނީ، 2025 މާރިޗް 10 ވަނަ ދުވަހުގެ ރޭގެ ވަގުތެއްގައި ސުލްޙަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނާ ޚިލާފަށް މާލޭގެ އެކި ސަރަހައްދުގެ މަގު މަތީގައި އެއްވެ، އަޑު ގަދަކޮށް މުޒާހަރާކޮށް އާންމު ދަތުރުފަތުރު ކުރުމަށާއި، އާންމު ވިޔަފާރީތަކަށް ދަތިވާނެހެން ހަރަކާތްތެރިވެ ފުލުހުންގެ ދައުރުއަދާ ކުރުމަށްހުރަސް އަޅައި، ފުލުހުންގެ އަމުރަށް ނުކިޔަމަންތެރިވެ ފުލުހުންގެ ވާޖިބަށް ހުރަސްއަޅާފައިވާ ކަމަށް ތުހުމަތު ކުރެވޭ ކަމަށެވެ.

މަންދީ އަށް ފޮނުވި ޗިޓުގައި ބުނެފައި ވަނީ ވަނީ އޭނާ ފުލުހަށް ހާޒިރު ކުރަނީ ޗިލްޑްރަންސް އޮމްބޮޑްސްޕަރސަންގެ އޮފީހުން ހުށަހަޅާފައިވާ ކުޑަކުއްޖެއްގެ ކަރާމާތަށް އުނިކަން އަންނަ ގޮތަށް ވާހަކަދައްކާފައިވާކަމަށް ތުހުމަތުކުރެވޭ މައްސަލައަކާއި ގުޅިގެން ކަމަށެވެ. ނަމަވެސް އެކަމުގެ ތަފްސީލެއް އެ ޗިޓުގައި ހިމަނާފަ އެއް ނުވެއެވެ.