ފުލުހަށް ހާޒިރު ކުރަނީ އަންހެނުންގެ އަޑު ކަނޑުވާލުމުގެ މަގުސަދުގައި: ހަދީޖާ
17 މާރިޗު 2025 | ހޯމަ 12:10މަގު މައްޗަށް ނުކުތީ ރައްޔިތުންގެ ހައްގުގައި ވަކާލާތު ކުރަން
ހަދީޖާ މުހައްމަދު ރާއްޖެޓީވީއަށް އިންޓަވިއު ދެއްވަނީ
ކުއްލި އެއްވުންތަކުގައި ބައިވެރިވާތީ ފުލުހަށް ހާޒިރު ކުރަނީ އަންހެނުންގެ އަޑު ކަނޑުވާލުމުގެ މަގުސަދުގައި ކަމަށް އެމްޑީޕީގެ މައްޗަށް ގޯޅީގެ އުތުރު ދާއިރާގެ ރައީސް ހަދީޖާ މުހައްމަދު ވިދާޅުވެއްޖެއެވެ.
އާދިއްތަ ދުވަހުގެ މެންދުރު 1:00ށް ހަދީޖާ ވަނީ ގަލޮޅު ޕޮލިހަށް ހާޒިރުވެފައެވެ. އެތަނުގައި ހުންނަވައި ރާއްޖެޓީވީއަށް ހަދީޖާ ވިދާޅުވީ މުޒާހަރާ ކުރަމުންދަނީ ސުލްހަވެރިކޮށް ކަމަށާއި، ގާނޫނާ ގަވާއިދާ އެއްގޮތަށް ކަމަށެވެ.
ހަދީޖާ ވިދާޅުވީ މަގު މައްޗަށް ނުކުތީ ރައްޔިތުންގެ ހައްގުގައި ވަކާލާތު ކުރުމަށް ކަމަށާއި، ވަރަށް ގަދަކޮށް އެ މަސައްކަތް ކުރާނެ ކަމަށެވެ. އަދި އަޑު ކަނޑުވާލަން މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށާއި، މިއީ ޚާއްސަކޮށް އަންހެނުންގެ އަޑު ކަނޑުވާލުމަށް ކުރާ ކަމެއް ކަމަށް އޭނާ ވިދާޅުވިއެވެ.
އަޅުގަނޑުމެން ވަރަށް ސުލްހަވެރި މުޒާހަރާއެއް މިކުރަނީ. އެއްވެސް ވަރަކަށް މަގު ހަލަބޮލި ކުރުމެއް. ބަރާބަރަށް ދެފަޅިން ހަމަ ދެވޭ ގޮތަށް ވަރަށް ސުލްހަވެރިކަމާއެކު މިކުރަނީ. ގާނޫނާ ގަވާއިދާ އެއްގޮތަށް މިކުރަނީ.އެމްޑީޕީގެ މައްޗަށް ގޯޅީގެ އުތުރު ދާއިރާގެ ރައީސް ހަދީޖާ މުހައްމަދު
ހަދީޖާގެ މައްޗަށް ކޮށްފައިވާ ތުހުމަތަކީ 12 މާރިޗް 2025 ވަނަ ދުވަހުގެ ރޭ، އޭނާ އިތުރު ބަޔަކާއި ބައިވެރިވެގެން ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފަށް މާލެ ސިޓީގެ އެކި މަގުތަކަށް އެއްވެ އަޑުގަދަކޮށް، އާއްމު ދަތުރުފަތުރަށް ހުރަސްއަޅާ އާއްމު މަސްލަހަތު ނަގާލަން މަސައްކަތް ކުރި ކަމަށް ތުހުމަތެވެ. އަދި ފުލުހަށް ހާޒިރުވާން އަންގާފައިވަނީ މި މައްސަލާގައި ސުވާލުކޮށް ބަޔާން ނެގުމަށެވެ.
