ބޭނުންވަނީ ރައްޔިތުންގެ ދިފާޢުގައި ބަސްބުނަންކެރޭ ކޮމިޝަންތަކެއް، އެބަޔަކު މިހާރު ނެތް: މޯޑް
16 މާރިޗު 2025 | އާދީއްތަ 20:55ބަދަލުތައް ގެންނަން އަލުން މަސައްކަތް ފަށަންޖެހޭ
ވެލިދޫ ދާއިރާގެ ކުރީގެ މެމްބަރު މުޙައްމަދު އަބްދުﷲ ޝަފީގު
2003 ވަނަ އަހަރުން ފެށިގެން ރާއްޖޭގައި ދިވެހިން އަޑުއުފުލި ކަންކަމުގެ ލިސްޓަށް ބަލާއިރު ރައްޔިތުންގެ ހައްޤުތައް ގެއްލުނީމާ އެކަމުގައި ހިފައިގެން ތެދުވާނެ ކޮމިޝަންތަކެއް އަބަދުވެސް އޮންނަން ދިވެހިން ބޭނުންވިކަމަށާ އެހެން ނަމަވެސް މިއަދު އެފަދަ ކޮމިޝަނެއް ނެތް ކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ ކުރީގެ މެމްބަރު މުހައްމަދު އަބުﷲ ޝަފީގު ( މޯޑް) ވިދާޅުވެއްޖެއެވެ.
އޭނާ އެހެން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުންނެވެ.
މޯޑް ވިދާޅުވީ 2003 ހިސާބުން ފެށިގެން ގެންނަން ބޭނުންވާ ބަދަލުތަކުގެ އަޑު ފުރަތަމަ އުފުލަމުންދިޔައީ މަދު ބަޔަކު ނަމަވެސް އެމްޑީޕީއާއެކީ އެއަޑުތައް އުފުލީ އެކުވެފައިވާ ބޮޑު ހަރަކާތަކުން ކަމަށެވެ. އަދި އެހަރަކާތް ކާމިޔާބު ކުރެވުނު ހިސާބަކީ އައުޤާނޫނު އަސާސީގައި އެބަދަލުތައް ކަޅާއި ހުދުން ލިޔެވުނު ހިސާބު ކަމަށެވެ. ނުވަތަ އެވާހަކަތައް ލިޔުނު ޤާނޫނު އަސާސީއަށް އަމަލުކުރަންފެށި ހިސާބު ކަމަށެވެ.
އެހެން ނަމަވެސް މިއަދު ދިވެހިންނަށް ކުރިމަތިވާ ހުރަސްތަކާ، ދެކެވޭ ވާހަކަތަކުން އޭރު ބުރަ މަސައްކަތުން ދިވެހިން ގެނައި ބަދަލުތައް ގެއްލި، އަލުން އެ ބަދަލުތައް ހޯދަން ޖެހިއްޖެކަމަށް މޯޑް ވިދާޅުވިއެވެ. އޭގެތެރޭގައި ވަކިންވަކިން އޮތް 3 ބާރު އެއްކުރުން ހިމެނޭ ކަމަށް އޭނާ ވިދާޅުވިއެވެ.
މޯޑް ވިދާޅުވީ އިސްލާހީ ހަރަކާތް އެޒަމާނުގައި ކުރިޔަށް ދިޔައިރު ވެސް އެކަމުގައި އުޅޭ މީހުން ޖަލުގައި އެތައްދުވަހަކު ހައްޔަރުކޮށްފައިތިބޭ ވަގުތު އަންނަ ކަމަށެވެ. އެކަމަކު މިނިވަންވުމާއެކު އަލުން މަސައްކަތްފަށައިގަންނަނީ ކަމަށާ އެހެން ގޮސް ބޭނުންވާ ކަންކަން ހާސިލްކުރެވުނީ ކަމަށެވެ.
