އައްޑޫ ބިޔުރޯ

މާލެ ސިޓީގެ އައު ޑެޕިއުޓީ މޭޔަރަކަށް މުޙައްމަދު އަރީޝް ހޮއްވަވައިފި އެވެ.

ކުރިން މާލެ ސިޓީގެ ޑެޕިއުޓީ މޭޔަރު ކަމުގައި ހުންނެވި އަޙްމަދު ނަރީޝް އެމަޤާމުން އިސްތިއުފާ ދެއްވުމާއި ގުޅިގެން، އަލަށް ޑެޕިއުޓީ މޭޔަރު ކަމަށް ބޭފުޅަކު ހޮއްވެވުމަށް ކައުންސިލަރުންގެ މެދުގައި ނެގުނު ވޯޓްގައި ފުރިހަމަ ތާއީދާއި އެކު އަރީޝް ވަނީ ހޮވިވަޑައިގެންފަ އެވެ.

އަރީޝްއަކީ މާލެ ސިޓީގެ މާފަންނު ހުޅަނގު އުތުރު ދާއިރާގެ ކައުންސިލް މެމްބަރެވެ.

ރާއްޖެއެމްވީ އާއި ވާހަކަ ދައްކަވަމުން އަރީޝް ވިދާޅުވީ، ކުރިން ވަކި ދާއިރާއެއްގެ ކައުންސިލަރަކަށްވުމުން އެދާއިރާގެ ރައްޔިތުންނަށް ޚިދުމަތްކުރި ނަމަވެސް މިއަދު ހަވާލުވި ޒިންމާއިން އަބަދުވެސް އިސް ކުރާނީ މާލެ ސިޓީގެ ރައްޔިތުން ކަމަށާއި، ޒިންމާ އަދާކުރުމުގައި ފަހަތަށް ނުޖެހި، މަސައްކަތުގައި ހޭދަކުރާނެ ކަމަށެވެ.

ކުރީގެ ޑެޕިއުޓީ މޭޔަރު އަޙްމަދު ނަރީޝް ވަނީ، އައު ޑެޕިއުޓީ މޭޔަރ އަރީޝްއަށް މަރުޚަބާ ދަންނަވާ، ޑެޕިއުޓީ މޭޔަރެއްގެ ގޮތުގައި މާލެ ސިޓީ ރައްޔިތުން ހެއްވާލަދޭނެ މަސައްކަތްތަކެއް ކައުންސިލަރުންނާއި ކައުންސިލްގެ މުވައްޒަފުންނާއި އެކު ކުރައްވަވާ ކުރިއަށް އޮތް ކައުންސިލް އިންތިޚާބު ޕީއެންސީ އަށް ބޮޑުތަނުން ކާމިޔާބުކޮށްދިނުމަށް އެދިވަޑައިގަންނަވާފަ އެވެ.

ނަރީޝްގެ އިސްތިއުފާގެ ސިޓީގައި އޭނާ އިސްތިއުފާ ދެއްވި ސަބަބު ހާމަކުރައްވާފައެއް ނުވެއެވެ. ނަރީޝް މަޤާމުން އިސްތިއުފާދެއްވީ ސަރުކާރުގެ މަޤާމަކާއި ހަވާލުވުމަށް ކަމަށް ވަނީ އަޑުފެތުރިފައެވެ. ނަމަވެސް ނަރީޝް ވެސް އަދި ސަރުކާރުން ވެސް އެކަމާއި މެދު އެއްޗެއް ހާމަކޮށް ފައެއް ނުވެއެވެ.