ރަޝިޔާއާ ދެކޮޅަށް އިގްތިސާދީ އިތުރު ފިޔަވަޅުތައް އެޅުމަށް އިނގިރޭސި ބޮޑު ވަޒީރު ގޮވާލައްވައިފި 

ޔުކްރެއިންގެ ހަނގުރާމަ އަށް ހުއްޓުމެއް ގެނައުމަށް ރަޝިޔާގެ ރައީސް ވްލަޑިމިއާ ޕުޓިން ފަސްޖެހޭ ނަމަ، އެގައުމާ ދެކޮޅަށް އިތުރު އިގްތިސާދީ ފިޔަވަޅުތައް އެޅުމަށް ބާރު އަޅަން ޖެހޭ ކަމަށް އިނގިރޭސި ބޮޑު ވަޒީރު ކިއަ ސްޓާމާ ވިދާޅުވެއްޖެ އެވެ.

އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި ހަނގުރާމަ ހުއްޓުމުގެ އެއްބަސްވުމާ މެދު މަޝްވަރާ ކުރަން ބޭނުންފުޅުވާ ކަމަށް ޕުޓިން ވިދާޅުވި ނަމަވެސް، މައްސަލައިގެ އަސްލު ސަބަބުތައް ހައްލު ނުކޮށް އެ ހުށަހެޅުމަށް ތާއީދު ކުރައްވަން ފެނިވަޑައި ނުގަންނަވާ ކަމަށް ވިދާޅުވެފައިވެ އެވެ.

ހުކުރު ދުވަހު އިނގިރޭސި ބޮޑު ވަޒީރު ނެރުއްވި ބަޔާނެއްގައި ވިދާޅުވެފައި ވަނީ، އެމެރިކާގެ ރައީސް ޓްރަމްޕްގެ ހުށަހެޅުއްވުމަށް ރަޝިޔާގެ ފަރާތުން ދެއްވި އިޖާބައިން ދައްކުވައި ދެނީ، އަސްލު ސުލްޙަ އަށް ޝައުޤުވެރިވާން ޕުޓިން ބޭނުންފުޅު ނުވާ ކަމަށެވެ. 

ސްޓާމާ މި ވާހަަކަތައް ދައްކަވާފައި މި ވަނީ، 25 ގައުމެއްގެ ލީޑަރުންނާ އެކު މަޝްވަރާ ކުރެއްވުމަށް ހަމަޖެހިފައިވާ އޮންލައިން ބައްދަލުވުމެއްގެ ކުރިންނެވެ.

އެ ބައްދަލުވުމުގައި ޔުކްރެއިން އަށް އިތުރު އެހީތެރިކަން ފޯރު ކޮށްދިނުމާއި، އެގައުމު ގައި ސުލްހަ ގާއިމު ކުރުމަށްޓަކައި، ސުލްހަ ބެލެހެއްޓުމުގެ މިޝަނެއް ގާއިމު ކުރުމާ ބެހޭ ގޮތުން މަޝްވަރާ ކުރެވޭނެ އެވެ.

މި ބައްދަލުވުމަކީ މި މަހުގެ ކުރީކޮޅު ފްރާންސްގެ ރައީސް އިމަނުއެލް މެކްރޯން އާއެކު ބޭއްވި ސަމިޓެއްގެ ފޮލޯއަޕް ބައްދަލުވުމެކެވެ. އެ ސަމިޓް ބޭއްވުނީ އެމެރިކާ އިން ޕުޓިން އާއެކު ސީދާ މަޝްވަރާތައް ފެށުމުން ޔޫރަޕުގެ ބައެއް ގައުމުތަކުން ކަންބޮޑުވުން އުފައްދާފައިވާ ދަނޑިވަޅެއްގަ އެވެ.

ރަޝިޔާ އިން ބުނެފައި ވަނީ ހަނގުރާމަ ނިމުމަށްފަހު، ޔުކްރެއިން ގައި ނޭޓޯގެ މެންބަރު ގައުމުތަކުގެ ސިފައިން ބޭތިއްބުމާ ދެކޮޅު ކަމަށެވެ. އަދި ޔުކްރެއިން އިން ސަރަހައްދުތަކެއް ދޫކޮށްލުމަށާއި، ވަކި ފަރާތަކަށް ނުޖެހި ތިބުމަށާއި، ހަތިޔާރު ނުގެންގުޅުމަށް އެދިފައިވެ އެވެ.