މުޒާހަރާ އާއި ގުޅިގެން ފުލުހަށް ގެންދަނީ ރައީސް ބިރުގަންނާތީ, އެއީ ރަނގަޅު ފާލެއް - މޫކޭ
15 މާރިޗު 2025 | ހޮނިހިރު 13:16ރައީސް ބިރު ގަންނަނަނީ އިދިކޮޅު ފަރާތްތަކަށް ރަނގަޅު މަސައްކަތްތަކެއް ކުރެވޭތީ ކަމަށާއި އެއީ ރަނގަޅު ފާލެއް ކަމަށް މޫކޭ ވިދާޅުވި
ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)ގެ ކުރީގެ މެނޭޖިންގ ޑިރެކްޓަރ މޫސާ އަލީ މަނިކު (މޫކޭ) ފުލުހަށް ހާޒިރު ވުމަށް ފަހު ނޫސްވެރިންނަށް މައުލޫމާތުދެއްވަނީ - 15.03.2025
ފުލުހަށް ގެންދަނީ ރައީސް ޑރ.މުހައްމަދު މުއިއްޒު ބިރު ގަންނަ ޒާތުގެ ކަންކަން އެ މަނިކުފާނު ޖަވާބުދާރީ ކުރުވުމަށް ކުރެވޭތީ ކަމަށް ޤަބޫލުކުރައްވާ ކަމަށް ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)ގެ ކުރީގެ މެނޭޖިންގ ޑިރެކްޓަރ މޫސާ އަލީ މަނިކު (މޫކޭ) ވިދާޅުވެއްޖެއެވެ.
ހޮނިހިރު ދުވަހު އޭނާ ފުލުހަށް ހާޒިރު ކުރީ ހަވީރު 16:00 އަށެވެ. ފުލުހަށް ހާޒިރުވުމަށް ފަހު ބޭރަށް ނުކުމެވަޑައިގެން މޫކޭ ވިދާޅުވީ މިއީ ސަރުކާރުން އިދިކޮޅު ފަރާތްތަކަށް ބިރު ދެއްކުމަށް ހިންގާ އަމަލެއް ކަމަށެވެ. އެހެންނަމަވެސް މިއީ އިދިކޮޅު ހަރަކާތްތައް ދަނީ ރަނގަޅަށް ކަން ދޭހަވާ ކަމެއް ކަމަށް ވެސް އޭނާ ވިދާޅުވިއެވެ. މުޒާހަރާ އާއި ގުޅިގެން ފުލުހަށް މީހުން ހާޒިރުކުރުމަކީ ސިޔާސީ މަސައްކަތެއް ކަމަށް އޭނާ ވިދާޅުވިއެވެ. ރައީސް ބިރު ގަންނަނަނީ އިދިކޮޅު ފަރާތްތަކަށް ރަނގަޅު މަސައްކަތްތަކެއް ކުރެވޭތީ ކަމަށާއި އެއީ ރަނގަޅު ފާލެއް ކަމަށް މޫކޭ ވިދާޅުވިއެވެ.
މޫކޭގެ ޤާނޫނީ ވަކީލް މަހްޒޫމް މާޖިދު ވަނީ މޫކޭ ފުލުހަށް ހާޒިރުކުރުމަށް ފަހު ހޭދަވީ ކުޑަ ވަގުތުކޮޅެއްކަން ފާހަގަކުރައްވާފައެވެ. އެކަމުގެ ސަބަބަކީ އެއީ މޫކޭ އާއި ދެކޮޅަށް ކުރަމުންދާ ތުހުމަތުތައް ސާބިތުކުރުމަށް އެކަށީގެންވާ ހެއްކެއް ނެތުން ކަމަށް ޤަބޫލުކުރައްވާ ކަމަށް ވެސް އޭނާ ވިދާޅުވި އެވެ.
މޫކޭ އަށް ތުހުމަތު ކުރަމުން ދަނީ ސުލްޙަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނާ ޚިލާފަށް މާލޭގެ އެކި ސަރަހައްދުގެ މަގު މަތީގައި އެއްވެ، އަޑު ގަދަކޮށް މުޒާހަރާކޮށް އާންމު ދަތުރުފަތުރު ކުރުމަށާއި، އާންމު ވިޔަފާރީތަކަށް ދަތިވާނެހެން ހަރަކާތްތެރިވެ ފުލުހުންގެ ދައުރުއަދާ ކުރުމަށްހުރަސް އަޅައި، ފުލުހުންގެ އަމުރަށް ނުކިޔަމަންތެރިވެ ފުލުހުންގެ ވާޖިބަށް ހުރަސްއަޅާފައިވާ ކަމަށެވެ.
