ރާއްޖޭގައި މިހާރު މިއޮތީ ގާނޫނީ ސަރުކާރެއް ނޫން: މާޒް ސަލީމް
ފުލުހަށް ހާޒިރުކުރަނީ ބިރު ދެއްކުމަށް
ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު އަހުމަދު ސަލީމް ރާއްޖެޓީވީއަށް އިންޓަވިއު ދެއްވަނީ
ދިވެހިރާއްޖޭގައި މިހާރު މިއޮތީ ގާނޫނީ ސަރުކާރެއް ނޫން ކަމަށް ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.
ހުކުރު ދުވަހުގެ 4:00 ށް އޭނާ ވަނީ ގަލޮޅު ޕޮލިސް ސްޓޭޝަނަށް ހާޒިރުކޮށްފައެވެ. ސަލީމް ފުލުހަށް ހާޒިރު ކުރުމަށް ފޮނުވި ޗިޓުގައި ބުނެފައިވަނީ މާރޗް 12 ވީ ބުދަ ދުވަހުގެ ރޭ މާލޭގައި ސަލީމާއި އިތުރު ބަޔަކު ބައިވެރިވެގެން، ސުލްހަވެރިކަމާއި އެކު އެއްވެ އުޅުމުގެ މިނިވަންކަމުގެ ގާނޫނާއި ޚިލާފަށް މާލޭ ސިޓީގެ އެކި މަގުތަކަށް އެއްވެ، އަޑުގަދަކޮށް އާއްމު ދަތުރުފަތުރަށް ހުރަސް އަޅާ އާއްމު މަސްލަހަތު ނަގާލަން މަސައްކަތް ކޮށްފައިވާ ކަމަށް ތުހުމަތުކުރެވޭ ކަމަށެވެ. ސަލީމް ފުލުހަށް ހާޒިރުކުރަނީ އޭނާގެ މައްޗަށް ކުރެވޭ ތުހުމަތުތަކާއި ގުޅިގެން އޭނާ އާއި ސުވާލުކޮށް ބަޔާން ނެގުމަށް ކަމަށް ވެސް އެ ޗިޓުގައި ވަނީ ބުނެފަ އެވެ.
މި މައްސަލާގައި ފުލުހަށް ބަޔާން ދިނުމުގެ ކުރިން ރާއްޖެއެމްވީއަށް ދެއްވި އިންޓަވިއުގައި ސަލީމް ވިދާޅުވީ ރައްޔިތުންގެ ހައްގުތައް ހޯދުމަށް މިހާރު ކުރަމުންދާ ސިލްސިލާ މުޒާހަރާތަކާއި ގުޅިގެން ފުލުހަށް ހާޒިރުކުރަނީ ބިރު ދެއްކުމަށް ކަމަށާއި، މިގޮތަށް އަޑު އުފުލުމަކީ ވެސް ސަރުކާރުން ބިރު ގަންނަ ކަމެއް ކަމަށެވެ.
ސަލީމް ވިދާޅުވީ މިސަރުކާރަކީ ގާނޫނީ ސަރުކާރެއް ނޫން ކަމަށާއި، ވެރިކަން ހިންގަމުންދަނީ ގާނޫނު އަސާސީއާ ހިލާފަށް ކަމަށެވެ. އަދި ބާރުތައް އެއްކޮށް، ރައްޔިތުންގެ ހައްގުތައް ނިގުޅައި ގަންނަމުންދާ ކަމަށް އޭނާ ވިދާޅުވި އެވެ.
އެހެން ބިރު ދައްކައިގެން ރައްޔިތުން ފަހަތަކަށް ނުޖެހޭނެ އެނގޭތޯ. ސިޔާސީ ގޮތުން އެބިރު ގަންނަވަނީ. ސަރުކާރަކީ ފެއިލްވެފައިވާ ސަރުކާރެއް. ގާނޫނީ ސަރުކާރެއް ނޫން މިތާގައި މިއޮތީއެއް. މުޅި ގާނޫނު އެއްކޮށް ފުނޑާލާފައި މިއޮތީ މުޅި ސިސްޓަމް އެއްކޮށް މިއޮތީ އަތަށް ނަގާފައި. އެކެއްގެ އަތް މައްޗަށް ނަގާފައި. ބާރުވެރިކަން މިވެރި މީހާގެ އަތްމައްޗަށް ނަގައިގެން ބޭނުންހާ ގޮތަކަށް ކަން ކުރަމުން މިދަނީ. ރައްޔިތުންނަށް އެބަ އެނގޭ މީނަ މިގެންދަނީ ކޮން ދިމާލަކަށްކަން ކޮން މިސްރާބަކަށްކަން ދިވެހިރާއްޖެ މިގެންދަނީ. ރައްޔިތުން ބިރެއް ނުގަނޭ މިއަދު. ރައްޔިތުން ފަހަތަށް ނުޖެހޭނެ. އެއްގޮތަކަށް ވެސް ސަރުކާރުން އެހެން ހީފުޅުވާ ކަމަށް ވަންޏާ އެއީ ވަރަށް ބޮޑު ކުންހީއެއް އެނގޭތޯ. ނުވަތަ ބިރު ދައްކައިގެން ފަހަތަށް ޖެއްސޭނެ ކަމަށްހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު އަހުމަދު ސަލީމް
ސަލީމް ވިދާޅުވީ މުޒާހަރާތަކާއި ގުޅިގެން ފުލަހަށް ހާޒިރު ނުކުރެވޭނެ ކަމަށާއި، މިއީ ގާނޫނީ ގޮތުން ކުރެވޭނެ ކަމެއް ނޫން ކަމަށެވެ. އަދި އަޑު އުފުލަމުންދަނީ ގާނޫނުން ރައްޔިތުންނަށް ލިބިދީފައިވާ ހައްގުގެ ތެރެއިން ކަމަށް އޭނާ ވިދާޅުވިއެވެ.
