"މިހާ ވަރަށް ވެރިއަކު ދޮގު ހެދުމުން، ދެން މަގުމައްޗަށް ނުކުމެ ވެރިމީހާ ހަމަ މަގަށް އެޅުވުމަކީ ރައްޔިތުންގެ މައްޗަށް ލާޒިމު ކަމެއް"
އޭނާ ވިދާޅުވީ ޚާއްސަކޮށް ރޯދަ މަސް ފަދަ މަހެއްގައި ހައްގުތައް ހޯދަން ނުކުންނަން ޖެހޭ ކަމަށް
ކެންދޫ ދާއިރާގެ މެމްބަރު މައުރޫފް ޒާކިރު އެމްޑީޕީން 13 މާރޗް 2025ގައި ބޭއްވި މުޒާހަރާގައި ވާހަކަދައްކަވަނީ
ރައީސް ޑރ. މުހައްމަދު މުއިއްޒު ގެންދަވަނީ އާއްމުންނަށް އޮޅުވާލައްވަމުން ކަމަށާއި، ގައުމެއްގެ ވެރިކަމަށް އަންނަ މީހަކު މިހާ ވަރަށް ދޮގު ހެދުމުން، ރައްޔިތުން ނުކުމެ ވެރި މީހާ ހަމަ މަގަށް އެޅުވުމަކީ އާއްމުންގެ މައްޗަށް ލާޒިމް ކަމެއް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީން ކުރިއަށް ގެންދާ ސިލްސިލާ މުޒާހަރާގެ ތެރެއިން ބުރާސްފަތި ދުވަހުގެ ރޭގެ އެއްވުމުގައި ވާހަކަދައްކަވަމުންނެވެ.
އޭނާ ވިދާޅުވީ ޚާއްސަކޮށް ރޯދަ މަސް ފަދަ މަހެއްގައި ހައްގުތައް ހޯދަން ނުކުންނަން ޖެހޭ ކަމަށެވެ. އީމާންކަން އިތުރުވާ ވަރަކަށް އަނިޔާވެރިކަމާއި ދެކޮޅަށް ތެދުވާ މިންވަރު އިތުރުވާނެ ކަމަށް އޭނާ ސިފަކުރެއްވިއެވެ. މިއަދު ރައްޔިތުންގެ ހައްގުގައި ބަސް ބުނާނެ އެންމެ މުއައްސަސާ އެއް ވެސް ނެތް ކަމަށް އޭނާ ވިދާޅުވިއެވެ.
އެގޮތުން ސުޕްރީމް ކޯޓުގައި ތަޅު އަޅުވާ މުޅި މަޖިލިސް ރައީސް މުއިއްޒުގެ އަމިއްލަ މަޖިލީހަކަށް ހަދާފައިވާ ކަމަށް އޭނާ ވިދާޅުވިއެވެ. މިނިވަން މުއައްސަސާތަކާއި ސަރުކާރުގެ ކުންފުނިތަކުގެ ހާލަކީ ވެސް އެއީ ކަމަށް އޭނާ ވަނީ ވިދާޅުވެފައެވެ.
ރައީސް ޑރ. މުހައްމަދު މުއިއްޒު ވެރިކަމަށް އައީ ވެސް ވަރަށް ގިނަ ދޮގުތައް ހަދައިގެން ކަމަށް އޭނާ ވިދާޅުވިއެވެ. އެގޮތުން ރާއްޖޭގައި އެތައް ހާސް އިންޑިއާ ސިފައިންނެއް ތިބި ކަމަށް ފާހަގަކޮށް ރައީސް މުއިއްޒު އައީ ވަރަށް ބޮޑަށް އިތުރުފުޅުހައްދަވަމުން ކަމަށް މައުރޫފް ވިދާޅުވިއެވެ. އަދި ރާއްޖޭގެ ކަނޑު ވިއްކާލާފައިވާ ކަމަށް ބުނެ ރައްޔިތުންނަށް އޮޅުވާލި ކަމަށް ވެސް އޭނާ ވިދާޅުވިއެވެ.
ވެރިކަމަށް އައީ ފްލެޓް ދޭން ކަމަށް ބުނެ. 60،000 ފްލެޓް އަޅާ ދޭނެ ކަމަށް ބުނެ. ޑޮލަރުން މަސްވެރިންނަށް ފައިސާ ދޭނެ ކަމަށް ބުނެ. ކޮންމެ ރަށެއްގާ ހިނގި ހުރިހާ ޕްރޮޖެކްޓެއް ކުރިއަށް ގެންގޮސް ނިންމާނެ ކަމަށް ބުނެ. ވެރިކަމަށް އައީ ދޮގާ މަކަރާއި އޮޅުވާލުމުގެ ތެރެއިން. މިއަދު މަގުމައްޗަށް އެމްޑީޕީ އަށް މަޖުބޫރުވީ އެހެންވެ.ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު
ރައްޔިތުން މުއިއްޒު ވެރިކަމަށް ގެނައީ ވަރަށް ފޮނި އުންމީދުތަކާއި އެކުގައި ކަމަށާއި އެ އުންމީދުތައް ހާސިލް ނުވި ކަމަށް ވެސް މައުރޫފް ވަނީ ވިދާޅުވެފައެވެ. މީގެ އިތުރުން ރައީސް ޑރ.މުހައްމަދު މުއިއްޒު ވެރިކަމަށް ކުރިމަތިލީ ދިވެހިންނަށް ފާގަތި ދުވަސްތަކެއް ހޯދައިދޭނެ ކަމުގެ ވައުދާއި އެކުގައި ކަމަށާއި މިއަދު އެ ވައުދު އޮޔާލާ ގޮސްފި ކަމަށް އޭނާ ވިދާޅުވިއެވެ. އަސާސީ ހައްގުތައް ނިގުޅައިގަނެ ރައްޔިތުން ބިކަކޮށްފައިވާ ކަމަށް އޭނާ ވިދާޅުވިއެވެ.
