މި ސަރުކާރާއެކު ފުލުހުންގެ ޚިދުމަތް ދަނީ ފަހަތަށް: ވަހީދު
މި ސަރުކާރުން މަސައްކަތް ކުރަނީ ފުލުހުންގެ މުއައްސަސާ ބޭނުން ކޮށްގެން ބިރު ދެއްކުމަށް
ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު ރާއްޖެޓީވީއަށް އިންޓަވިއު ދެއްވަނީ
މި ސަރުކާރާއެކު ފުލުހުންގެ ޚިދުމަތް ފަހަތަށް ގޮސްފައިވާ ކަމަށާއި، ފެންނަމުންދަނީ އެމަންޒަރު ކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު ވިދާޅުވެއްޖެއެވެ.
ބުދަ ދުވަހުގެ މެންދުރު 1:00ގައި ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވަނީ ޕޮލިހަށް ހާޒިރުކޮށްފައެވެ. ރާއީ ޕޮލިހަށް ހާޒިރުކުރި ވަގުތު އެމްޑީޕީގެ އިސް ބައެއް ފަރާތްތަކާއި، އާއްމުން ވަނީ އެސަރަހައްދަށް އެއްވަފައެވެ.
އެތަނުގައި ހުންނަވައި ވަހީދު ވިދާޅުވީ މިސަރުކާރުން މަސައްކަތް ކުރަނީ ފުލުހުންގެ މުއައްސަސާ ބޭނުން ކޮށްގެން ބިރު ދެއްކުމަށް ކަމަށާއި، އެކަން ކާމިޔާބު ނުވާނެ ކަމަށެވެ. އަދި ސުލްހަވެރި މުޒާހަރާތަކާއި ގުޅިގެން އާއްމު ރައްޔިތުން ފުލުހަށް ހާޒިރުކުރުމުން މިކަމުން ފެނިގެން ދަނީ ފުލުހުން އަނބުރާ ފަހަތަށްދާ މަންޒަރު ކަމަށް އޭނާ ވިދާޅުވިއެވެ.
އަޅުގަނޑުމެންނަށް ފެނިގެން މިދަނީ ޕޮލިސް އަނބުރާ ފަހަތަށް ދާތަން. ރައްޔިތުންނަށް ބިރު ދެއްކުމަށްޓަކައި، ޕޮލިސް ކޮމިޝަނަރުގެ އޯޑަރު ޣައިރު ގާނޫނީ އޯޑަރަށް ކުރަމުންދާ މަސައްކަތެއް ގޮތުގައި. އަޅުގަނޑު އެބޭފުޅާއަށް ދަންނަވަން އޮތީ އެމްޑީޕީގެ މެންބަރުނެއް ފަހަތަކަށް ނުޖެހޭނެ. އަދި ބިރެއް ވެސް ނުދެއްކޭނެ. އެހެންނަމަވެސް އަޅުގަނޑުމެންގެ އެމްޑީޕީ ސަރުކާރުން ޕޮލިހަށް ގެންނަން ބޭނުންވި ހެޔޮ ބަދަލުތައް ގެނެވި އެކަން ދެމެހެއްޓުމުގެ ޒިންމާ މިއަދު އެބޭފުޅާއަށް ލިބިފައި އޮއްވާ އަޅުގަނޑުމެންނަށް މިފެންނަނީ އެހުރިހާ ކަމެއް ހަލާކުކޮށްލާފައި އަލުުން އެ މުއައްސަސާ ހަލާކު ކުރަމުންދާތަން.ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު
ވަހީދު ވިދާޅުވީ ގާނޫނު އަސާސީން އެއްވެ އުޅުމުގެ މިނިވަންކަން ކޮންމެ ރައްޔިތަކަށް ލިބިފައިވާ ކަމަށާއި، އެފުރުސަތު ބޭނުން ރައްޔިތުން ހިފާނެ ކަމަށެވެ. ގާނޫނު އާސާސީން ރައްޔިތުންނަށް ލިބިފައިވާ ބާރުގެ ތެރެއިން ނުކުންނައިރު، ސުލްހަވެރިކަމާއެކު ކުރަމުންދާ މުޒާހަރާތަކަށް ފުލުހުން ވެސް ޖާގަ ތަނަވަސް ކޮށްދޭންޖެހޭ ކަމަށް ވަހީދު ވިދާޅުވިއެވެ. އަދި ބިރު ދައްކައި، ފަހަތަށް ޖެއްސުމަށް މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށް އޭނާ ވިދާޅުވިއެވެ.
