ދާއިރާގެ ރައްޔިތުން ބުނާ ކަންކަން ސަރުކާރުތެރެއިން ނުވަންޏާ މެމްބަރުން ރުޅިގަދަވާ މަންޒަރު ފެންނާނެ: ރީކޯ މޫސަ

މަޖިލީހުގެ މެމްބަރުން ޕާޓީއިން ވަކިކުރީމާ ގޮނޑިގެއްލޭނެ ކަމަށް ނިންމައިގެން ތިއްބަސް އިންތިޚާބުވެފައިވާ ދާއިރާގެ ރައްޔިތުން ސަރުކާރުތެރެއިން ކޮށްދެން އެދޭ ކަންކަން މެމްބަރުން އެދުނީމާ ވެސް ސަރުކާރަށް ނުކޮށްދެވެންޏާ މެމްބަރުން ރުޅިގަދަވާނެ ކަމަށް ރައްޔިތުންގެ މަޖިލީހުގެ ކުރީގެ ނައިބުރައީސް މޫސާ މަނިކު ވިދާޅުވެއްޖެއެވެ. މޫސަ މިހެން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުންނެވެ.

މޫސަ ވިދާޅުވީ މަޖިލީހަށް މީހަކު އިންތިޚާބުވުމަށް ރައްޔިތުންގެ ކައިރިޔަށް ވޯޓު ހޯދުމަށް ދިޔުމުން ރައްޔިތުން ސަރުކާރުގެ ތެރެއިން ބޭނުންވާ ކަންތައްތަކެއް ހުންނަ ކަމަށެވެ. އަދި އިންތިޚާބުވެގެން މަޖިލީހުގެ ގޮނޑީގައި އިންނައިރު ދާއިރާގެ ރައްޔިތުން ސަރުކާރުގެ ތެރެއިން ކޮށްދިނުމަށް މެމްބަރު ކައިރީގައި އެދޭކަންކަން ލަސްވިޔަސް އަދި ކޮށްނުދެވުނަސް މެމްބަރުން ރުޅިގަދަވާނެ ކަމަށެވެ.

މިސާލު ޖައްސަވަމުން މޫސަ ވިދާޅުވީ ލޯނަށް އެދި ހުށަހެޅިޔަސް ލޯނު ނުލިބުމާ، ސަރުކާރު ކުންފުންޏަކުން ވަޒީފާއެއް ހޯދަންއެދޭ މީހާއަށް ވަޒީފާއެއް ހަމަޖައްސައި ނުދެވުމާ، ޤައުމުންބޭރަށް ކިޔަވަންދާ ކުއްޖާއަށް ލުއިގޮތެއް ހަމަނުޖެހުމާ، އަދި އާސަންދަ ދާއިރާގެ ރައްޔިތުންނަށް ނުލިބުންފަދަ ކަންކަންމާ ގުޅިގެން މަޖިލީހުގެ މެމްބަރު ރުޅިގަދަވާނެ ކަމަށެވެ. އެއީ މިރާއްޖޭގައި ފެށުނީއްސުރެ އެކަން އޮންނަ ގޮތް ކަމަށް އޭނާ ވިދާޅުވިއެވެ.

މޫސަ ވިދާޅުވީ ސަރުކާރަށް ސުޕަރމެޖޯރިޓީ އޮތަސް މިނޫން ގޮތަކަށް ކަންހިނގާތޯ ބައްލަވަން ޕީއެންސީގެ ޕީޖީ ލީޑަރު ވެސް މިހާރު ބައްލަވަން ހުންނަވަންވީ ކަމަށެވެ. އަދި ސަރުކާރުގެ ސުޕަރ މެޖޯރިޓީ އޮތް މަޖިލީހެއްގައި ދާދިފަހުން ވެސް ރޯލްކޯލް ވޯޓެއް ވެސް ނަގައިފި ކަމަށާ އެހިސާބަށް ދާން އެފެށީ މެމްބަރުންނަށް އިތުބާރު ގެއްލެން ފެށުމުން ކަމަށް މޫސަ ވިދާޅުވިއެވެ.