"ޤާނޫނީ އިމުން ބޭރުން ކުރަމުންދާ ޚުދުމުހުތާރު ވެރިކަމާއި ދެކޮޅަށް ނުކުތުމަކީ ޤައުމީ ވާޖިބެއް"
ރާއްޖޭގެ އާއްމުންގެ މިނިވަންކަން ނިގުޅައިގަތުމަކީ ބައި ގަރުނު ފަހަތަށް ރާއްޖެ ސޮއްސާލުން ކަމަށް ވެސް އޭނާ ވިދާޅުވި
ރައްޔިތުންގެ މަޖިލީހުގެ އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން (ބިގޭ) އެމްޑީޕީގެ މުޒާހަރާގައި ވާހަކަދައްކަވަނީ - 08.03.2025
ޤާނޫނީ އިމުން ބޭރުން ކުރަމުންދާ ޚުދުމުހުތާރު ވެރިކަމާއި ދެކޮޅަށް ނުކުތުމަކީ ޤައުމީ ވާޖިބެއް ކަމަށް ރައްޔިތުންގެ މަޖިލީހުގެ އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
އޭނާ އެފަދައިން ވިދާޅުވީ ހޮނިހިރު ދުވަހުގެ ރޭ އެމްޑީޕީ އިހުތިޖާޖުގައި ވާހަކަދައްކަވަމުންނެވެ.
10:00 ހާއިރު އާއްމުން ވަނީ ސަރުކާރާއި މެދު ހުރި ކަންބޮޑުވުންތައް ފާޅުކޮށް ހިނގާލުމަށް މަސައްކަތް ކޮށްފައެވެ. ނަމަވެސް އެމްޑީޕީ ހަރުގެއިން ފެށިގެން ޗާންދަނީ މަގުން ޖުމްހޫރީ މައިދާނާއި ވީ ކޮޅަށް ހިނގައިގަތުމާއި އެކު ފުލުހުން ވަނީ އެ ބްލޮކް ނިމޭ ހިސާބުގައި ބެރިކޭޑް ޖަހާ އެ ސަރަހައްދު ބަންދުކޮށްފައެވެ. އަދި އެމްޑީޕީ ޖަގަހަ ކައިރިން ޔޫރޯ ސްޓޯ ކައިރީގައި ފުލުހުންގެ ސަފުތައް އަތުރާލާ، އެ ސަރަހައްދުން ވެސް ފުލުހުން ވަނީ މަގު ބަންދުކޮށްފައެވެ.
ރައްޔިތުންގެ މަޖިލީހުގެ ކުރީގެ ޕީޖީ ލީޑަރުކަން ވެސް ކުރައްވާފައިވާ މުހައްމަދު ރަޝީދު އެކަމާއި ގުޅޭގޮތުން ވިދާޅުވީ ފުލުހުންނަކީ އާއްމުންގެ ހިމާޔަތުގައި ތިބެން ޖެހޭ ބައެއް ކަމަށެވެ. އެއްވެސް ސިފައެއްގައި އާއްމުންނާއި ކުރިމަތިލާ ބަޔަކަށް ފުލުހުން ވެގެން ނުވާނެ ކަމަށް އޭނާ ވިދާޅުވިއެވެ. އެހެންކަމުން އާއްމުން މެދުވެރިކޮށް އާއްމުން ހިޞާރުކުރުމަކީ ފުލުހުން ޤާނޫނާއި ޚިލާފުވުން ކަމަށް އޭނާ ވަނީ ސިފަކުރައްވާފައެވެ.
ތި ބޭފުޅުން ތި ތަބާ ވަނީ ހައްގު ނޫން ޢައިރު ޤާނޫނީ އަމުރަކަށް. ހަނދުމަފުޅު ބަހައްޓަވާތި ތި ބޭފުޅުން ތި ތަބާ ވަނީ ހައްގު ނޫން ޢައިރު ޤާނޫނީ އަމުރަކަށް. ހަނދުމަފުޅު ބަހައްޓަވާތި ތި ޔުނިފޯމުން ފެންނަ ނަންތައް އާއްމުންގެ ހިތުގައި ބިންވަޅު ނެގިފައި ހުންނާނެ. ޢައިރު ޤާނޫނީ އަމުރުތައް ބެލޭނެ ތަންތަން އެބަ ހުރި. ޢައިރު ޤާނޫނީ އަމުރު ނުކުރުމަށް ވެރިންނަށް ދަންނަވާ.ރައްޔިތުންގެ މަޖިލީހުގެ އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން (ބިގޭ)
އާއްމުންގެ ކަންބޮޑުވުންތައް ފާޅުކުރުމަށް އާއްމުންނަށް ފުރުސަތު ލިބެން ޖެހޭ ކަމަށް އޭނާ ވިދާޅުވިއެވެ.
މި ވަގުތު އާއްމުން އެންމެ ބޮޑަށް ކަންބޮޑުވާ އެއް ކަމަކީ އާއްމުންގެ ބޯހިޔާވަހިކަމުގެ މައްސަލަ ކަމަށް ވާއިރު ހޮނިހިރު ދުވަހުގެ އެމްޑީޕީގެ ހަރަކާތަކީ ނުހައްގުން ފްލެޓް ގެއްލުނު މީހުންގެ ހައްގުގައި ބޭއްވި ހަރަކާތެއް ކަމަށް އޭނާ ވިދާޅުވިއެވެ. ނަމަވެސް އެ ހަރަކާތަށް ވެސް ފުލުހުން ޖާގަ ދީފައި ނުވާތީ އޭނާ ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ.
ދިވެހިރާއްޖެ އެތައް ޒަމާނެއް ފަހަތަށް ޖެހެމުންދާ ކަމަށާއި ރާއްޖޭގެ އާއްމުންގެ މިނިވަންކަން ނިގުޅައިގަތުމަކީ ބައި ގަރުނު ފަހަތަށް ރާއްޖެ ސޮއްސާލުން ކަމަށް ވެސް އޭނާ ވިދާޅުވިއެވެ. ރާއްޖޭގެ ހައްގުގައި ދިވެހިން ނުކުންނަންވީ ވަގުތަކީ މިއީ ކަމަށް އޭނާ ވިދާޅުވިއެވެ. އަދި ސަރުކާރު ޖަވާބުދާރީ ކުރުވާ ރައީސް ޑރ.މުހައްމަދު މުއިއްޒު އަށް އާއްމުންގެ އަޑު އިވޭ މިންވަރަށް އަޑު އުފުލަން ޖެހޭ ކަމަށް އޭނާ ވިދާޅުވިއެވެ.
