ޖުޑީޝަލް ސާވިސް ކޮމިޝަން (ޖޭއެސްސީ)ގައި ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރު ހާޒިރުކޮށްގެން ކުރިއަށް ގެންދާ މައްސަލައިގެ އަޑުއެހުންތައް އާންމުންނަށް ފެންނާނެހެން ހުޅުވައިލައިގެން ކުރިއަށް ގެންދިއުމަށް އެދިއްޖެއެވެ.

ޖޭއެސްސީން ވަނީ އަޒްމިރަލްދާގެ ސުލޫކީ މައްސަލައެއް ބަލަންފަށާފައެވެ. މިމައްސަލައާ ގުޅިގެން ފުރަތަމަ އެކޮމިޝަނަށް ހާޒިރުކުރުމަށް އަންގާފައިވަނީ އާދިއްތަ ދުވަހުގެ ހެނދުނު 11:00ށެވެ.

މި މައްސަލަައާ ގުޅިގެން ރާއްޖެއެމްވީއަށް އަޒްމިރަލްދާގެ ވަކީލު އިބްރާހިމް ޝަމީލު ވިދާޅުވީ ފޯނުން ގުޅުއްވައި، ކޮމިޝަނަށް ހާޒިރުވާންޖެހޭ ދުވަހާއި ވަގުތު ބަދަލުވެފައިވާކަން އަންގާފައިވާ ކަމަށާއި، ނޯޓިސްއެއް ފޮނުވާފައިނުވާ ކަމަށެވެ. އަދި ހޯމަ ދުވަހު ޖޭއެސްސީއަށް ހާޒިރުވުމަށް އަންގާފައިވާ ކަމަށެވެ. ނަމަވެސް ވަގުތު ހާމައެއް ނުކުރައްވައެވެ.

މީގެ އިތުރުން ޝަމީލު ވިދާޅުވީ އަޒްމިރަލްދާ ހާޒިރުކޮށްގެން ކުރިއަށްގެންދާ އަޑުއެހުންތައް އާންމުންނަށް ފެންނާނެހެން ހުޅުވައިލައިގެން ކުރިއަށް ގެންދިއުމަށް އެދިފައިވާ ކަމަށެވެ.

އަޒްމިރަލްދާގެ އިތުރުން ފަނޑިޔާރު މަހާޒް އަލީ ޒާހިރުގެ ސުލޫކީ މައްސަލަތަކެއް ބަލަން ފަށާފައިމިވަނީ ސިޔާސީ ޕާޓީތަކަށް މެންބަރުންގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނައި ބަދަލު ބާތިލު ކުރަން ހުށަހެޅި މައްސަލައިގެ ޝަރީއަތް ފަށާފައިވަނިކޮށެވެ. އަދި ސުޕްރީމް ކޯޓުގެ ދެ ފަނޑިޔާރުން ވަކި ކުރަން މަޖުބޫރުވާ ގޮތަށް ރައްޔިތުންގެ މަޖިލީހުން ވަނީ 26 ފެބްރުއަރީ 2025 ގައި ވަނީ ބިލެއް ފާސްކޮށްފައެވެ.

26 ފެބްރުއަރީ 2025 ވީ ބުދަ ދުވަހު ޖޭއެސްސީން ކުރިއަށް ގެންދިޔަ ބައްދަލުވުމުގައި ފަނޑިޔާރު ހުސްނުއް ސުޢޫދާއި، ފަނޑިޔާރު މަހާޒު އަލީ ޒާހިރުގެ އިތުރުން ޑރ. އަޒްމިރަލްދާ ޒާހިރު ވަނީ ސަސްޕެންޑް ކޮށްފައެވެ. އޭގެފަހުން 4 މާރޗް 2025 ވަނަ ދުވަހު ރައީސް މުއިއްޒު ގާނޫނު އަސާސީ އާ ޚިލާފުވެއްޖެ ކަމަށް ވިދާޅުވެ، ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވަނީ އިސްތިއުފާ ދެއްވާފައެވެ.

ފަނޑިޔާރުން ސަސްޕެންޑު ކުރީ އެންޓި ކޮރަޕްޝަން ކޮމިޝަން (އޭސީސީ)އިން ތަހުގީގު ކުރަމުންދާ މައްސަލައަކާ ގުޅިގެން ކަމަށް ބުނެއެވެ. ނަމަވެސް އެއީ ކޮން މައްސަލައެއް ކަމެއް އޭސީސީން ހާމައެއް ނުކުރެއެވެ.