އަންހެނުންގެ ލޯންގްކޯސް 100 މީޓަރ ފްރީސްޓައިލް އިވެންޓުގެ ޤައުމީ ރެކޯޑު، ޢާއިޝަަތު ޢުލްޔާ ޝާއިޤް އައު ކޮށްފި އެވެ.

ޢުލްޔާ މި ރެކޯޑު އައު ކޮށްފައި ވަނީ އޮސްޓްރޭލިއާ ގައި ކުރިއަށް ދިޔަ، ޔޫޑަބްލިއުއެސްސީ (ދަ ޔުނިވާސިޓީ އޮފް ވެސްޓާން އޮސްޓްރޭލިއާ ވެސްޓްކޯސް ސްވިމިން ކުލަބު)، ކުލަބު ނައިޓް ނަންބަރު ފަހެއްގައި ވާދަކޮށްގެންނެވެ. އެ އިވެންޓުގައި ޢުލްޔާގެ ޓައިމިން އަކީ 01:04:32 ގެ ޓައިމިން އަކުންނެވެ.

ޢުލްޔާގެ ކުރިން މި އިވެންޓުގެ ޤައުމީ ރެކޯޑު އައު ކޮށްފައި ވަނީ އަމްނާ ތަޒްކިޔާ މިރުޞާދު އެވެ. އެއީ މިދިޔަ އަހަރު ސްރީ ލަންކާގައި ކުރިއަށް ދިޔަ ނޭޝަނަލް އެންޑް ޖޫނިއާ ނޭޝަނަލް ލޯންްގްކޯސް ސްވިމިން ޗެމްޕިއަންޝިޕުގައި ވާދަކޮށެވެ. އެ މުބާރާތުގައި ތަޒްކިޔާގެ ޓައިމުން އަކީ 01:05:03 އެވެ.

މީގެ ކުރިން ވެސް ޢުލްޔާ ވަނީ ޤައުމީ ރެކޯޑުތަކެއް އައު ކޮށްފަ އެވެ. އޭނާ ވަނީ މިދިޔަ އަހަރު ފްރާންސްގެ ވެރި ރަށް ޕެރިހުގައި ކުރިއަށް ދިޔަ އޮލިމްޕިކްސް ގައި ވެސް ވާދަކޮށްފަ އެވެ.

މިވަގުތު ޢުލްޔާ އަންނަނީ އޮސްޓްރޭލިއާގައި ތަމްރީނު ޕްރޮގްރާމް ފުރިހަމަ ކުރަމުންނެވެ. ޢުލްޔާ ވަނީ އަންހެނުންގެ ލޯންގްކޯސް 50 މީޓަރު ފްރީސްޓައިލް އިވެންޓުގެ ޤައުމީ ރެކޯޑުގެ އިތުރުން، އަންހެނުންގެ ލޯންގްކޯސް 50 މީޓަރު ބެކްސްޓްރޯކް އިވެންޓުގެ ގައުމީ ރެކޯޑު ވެސް އައު ކޮށްފަ އެވެ.