މޯލްޑިވްސް ޕޫލް ބިލިއަޑް އެސޯސިއޭޝަނުން އިންތިޒާމްކޮށްގެން ކުރިއަށްގެންދާ ފަސްވަނަ އޮފީސް ބިލިއަޑް މުބާރާތުގެ ސިންގަލްސް އިވެންޓުގެ ސެމީ ފައިނަލަށް ތިން އޮފީހަކުން ހަތަރު ކުޅުންތެރިން ދަތުރުކޮށްފިއެވެ.

އެމްޕީބީއޭ ކްލަބު ހައުސްގައި ކުރިއަށްދާ މި މުބާރާތުގައި ޖުމްލަ 13 އޮފީހަކުން ވާދަކުރާ އިރު، ސިންގަލްސް އިވެންޓުގެ ސެމީ ފައިނަލްގެ ޖާގަތައް ކަށަވަރުކޮށްފައި ވަނީ ޕަބްލިކް ސާވިސް މީޑިއާ (ޕީއެސްއެމް) އާއި ވިލާ އެއާ އަދި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އެވެ.

ސިންގަލްސް އިވެންޓުގެ ސެމީގެ ފުރަތަމަ މެޗުގައި މި މަހުގެ 22 ވަނަ ދުވަހުގެރޭ ބައްދަލުކުރާނީ އެމްއެންޑީއެފްގެ މުހައްމަދު ފަރީމް އާއި ވިލާ އެއާގެ އަހުމަދު ޒިޔާން އެވެ. އަދި ދެވަނަ ސެމީގައި ބައްދަލުކުރާނީ ޕީއެސްއެމްގެ އަބްދުﷲ ލަބީބާއި ވިލާ އެއާގެ މުހައްމަދު ހަމްދާން އެވެ. މި ދެ މެޗުވެސް ކުޅުމަށް ހަމަޖެހިފައި ވަނީ އެއް ގަޑިއެއްގައެވެ. އަދި ފައިނަލް މެޗު ކުޅުމަށް ހަމަޖެހިފައި ވަނީ މި މަހުގެ 24 ވަނަ ދުވަހުއެވެ.

ސިންގަލްސް އިވެންޓުގެ އިތުރުން މި މުބާރާތުގެ ޓީމް އިވެންޓާއި މިކްސްޑް ޑަބަލްސް އަދި ޑަބަލްސް އިވެންޓުގެ މެޗުތައް ކޮންމެ ރެއެއްގައިވެސް ދަނީ ކުޅެވެމުންނެވެ. އެގޮތުން މިހާރު ކުޅެވެމުންދަނީ މި އިވެންޓުތަކުގެ ފުރަތަމަ ބުރުގެ މެޗުތަކެވެ.

މި މަހުގެ 12 ވަނަ ދުވަހު ކުޅެން ފެށި މި އިވެންޓުތަކުގެ މެޗުތައް ކުރިއަށްދާނީ މި މަހުގެ 20 ވަނަ ދުވަހުގެ ނިޔަލަށެވެ.