ސާއިދު އަށް އަނިޔާވެ 200 މީޓަރު ދުވުމުގައި ބައިވެރިވެވޭގޮތެއް ނުވި!
8 ޖުލައި 2017 | ހޮނިހިރު 08:26ސާއިދު ވަނީ 100 މީޓަރު ދުވުމުން އޭޝިއާގެ ހަތަރުވަނަ ހޯދާފައި
ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު
ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު (ކަޅޭ) ފައިގެ ފަލަމަސްގަނޑަށް އަނިޔާވެ 200 މީޓަރު ދުވުމުގައި ބައިވެރިވެވޭގޮތެއް ނުވިއެވެ.
ރާއްޖެއެމްވީ އަށް މައުލޫމާތު ދެއްވަމުން އެތްލެޓިކްސް އެސޯސިއޭޝަންގެ ރައީސް މުހައްމަދު ތޮލާލު ވިދާޅުވީ، ސާއިދު ފައިގެ ފަލަމަސްގަނޑަށް އަނިޔާވެފައިވަނީ ހުކުރު ދުވަހު 100 މީޓަރު ދުވުމުގެ ފައިނަލުގައި ވާދަކުރުމަށްފަހު ކަމަށެވެ.
އެގޮތުން ތޮލާލު ވިދާޅުވީ، ސާއިދުގެ ފަލަމަސްގަނޑަށް އަނިޔާ ލިބުމާއެކު އަވަހަށް އޭނާ އަށް ފަރުވާދިނުމަށް މަސައްކަތް ފެށި ކަމަށާއި، އެހެންނަމަވެސް ހޮނިހިރު ދުވަހުގެ ރޭ ދުވާ 200 މީޓަރު ދުވުމުގައި އޭނާއަށް ވާދަކުރެވޭ ވަރަށް ފިޓްނުވާ ކަމަށެވެ.
މީގެއިތުރުން ތޮލާލު ވިދާޅުވީ، ސާއިދު އަށް އަނިޔާގެ މައްސަލަ ކުރިމަތިވެފައިވަނީ ކައިރި ކައިރީގައި ހީޓުތަކުގައި ދުވަން ޖެހިގެން ކަމަށް ލަފާކުރެވޭ ކަމަށާއި، ވިއްސާރަވުމުގެ ސަބަބުންވެސް މައްސަލަތަކެއް ކުރިމަތިވި ކަމަށެވެ.
ސާއިދު ވަނީ ހުކުރު ދުވަހު ބޮޑެތި ގައުމުތަކާ ވާދަކޮށް އޭޝިއާގެ 100 މީޓަރު ދުވުމުން ހަތަރުވަނަ ހޯދާފައެވެ. އޭނާ އޭޝިއާގެ ހަތަރު ވަނަ ހޯދީ 10.37 ސިކުންތުން ރޭސް ނިންމައިގެންނެވެ.
ސާއިދު އަށް 200 މީޓަރު ދުވުމުގައި ވާދަނުކުރެވުނު ނަމަވެސް ރާއްޖޭގެ ސަރީސް އަހުމަދު މި އިވެންޓުގައި ވާދަކުރާނެއެވެ. ހީޓް ތިނެއްގައި ސަރީސް ވާދަކުރާއިރު، މި އެވެންޓް ފެށުމަށް ހަމަޖެހިފައިވަނީ ހޮނިހިރު ދުވަހުގެ ރެއެވެ.
