ފްލެޓް ލިސްޓުގައި ނުހިމެނޭ 577 މީހެއްގެ މައުލޫމާތު ރިވިއުކޮށް ފްލެޓް ދޭނެ ކަމަށް ވަނީ އިއުލާންކޮށްފަ: އިބްރާހިމް ވަހީދު
56 ފަރާތެއްގެ މާކްސް އާއި ކުޅެ މާކްސް މަތިކޮށްފައި ހުރިކަން ފާހަގަ ކުރެވިފައިވޭ
އެމްޑީޕީގެ ޑެޕިއުޓީ ޗެއަރޕާސަން އިބުރާހީމް ވަޙީދު (އިބުރޭ)
ނިމިދިއަ އެމްޑީޕީ ސަރުކާރުން ދޭންނިންމި 4000 ފްލެޓް ލިސްޓުގައި ނުހިމެނޭ 577 މީހެއްގެ މައުލޫމާތު ރިވިއުކޮށް ފްލެޓް ދޭނެ ކަމަށް ކަނޑައަޅައި އިއުލާނު ކޮށްފައި އެބައޮތް ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވިދާޅު ވެއްޖެއެވެ.
އިބްރާހިމް ވަހީދު (އިބުރޭ) މިފަދައިން ވިދާޅުވީ ފްލެޓުތަކުގެ މައްސަލައާއި ގުޅިގެން އެމްޑީޕީން އެ ޕާޓީ އޮފީހުގައި ހޮނިހިރު ދުވަހު ކުރިއަށް ގެންދިއަ ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު ވިދާޅުވީ ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ އަބްދުﷲ މުއްތަލިބު ވިދާޅުވެފައި ވަނީ ރިވިއު ކުރާނީ ހަމަ އެކަނި ކުރީގެ ސަރުކާރުން 4000 ފްލެޓު ދީފައި ހުރި މީހުން އެކަނި ކަމަށް ކަމަށެވެ.
ނަމަވެސް ނިމިދިއަ ފެބްރުއަރީ މަހުގެ 27 ވަނަ ދުވަހު ނެރުނު މި ފްލެޓް ލިސްޓަށް ބަލާލިއިރު 4000 ފްލެޓް ލިސްޓުގައި ނުހިމެނޭ 577 މީހެއްގެ މައުލޫމާތު ރިވިއުކޮށް ފްލެޓް ދޭނެ ކަމަށް ކަނޑައަޅައި އިއުލާނު ކޮށްފައި އެބައޮތް ކަމަށް އިބްރާހިމް ވަހީދު ވިދާޅު ވިއެވެ.
ވަޙީދު ވިދާޅުވީ ފްލެޓު ލިސްޓުގައި ނުހިމެނޭ 577 މީހުންގެ މައުލޫމާތު ރިވިއު ކޮށް ފްލެޓު ދޭނެ ކަމަށް އިއުލާނު ކޮށްފައި ވާއިރު، މިއީ މަދު އަދަދެއް ވެސް ނޫން ކަމަށެވެ. އަދި އެއްވެސް މީހަކަށް ފްލެޓު ލިބުމަކީ ކަންބޮޑުވާ ކަމެއް ނޫން ކަމަށާއި ނަމަވެސް އޮންނަ އުސޫލުން ބޭރުން ކަންކަން ކުރުމަކީ ބަލައިގަނެވޭ ކަމެއް ނޫން ކަމަށް ވެސް ވަޙީދު ވިދާޅުވިއެވެ.
މީގެ އިތުރުން ވަޙީދު ވިދާޅުވީ 56 ފަރާތެއްގެ މާކްސް އާއި ކުޅެ މާކްސް މަތިކޮށްފައި ހުރިކަން ފާހަގަ ކުރެވިފައިވާ ކަމަށެވެ. ކަން މިހެން ހުރިއިރު މި ސަރުކާރުން އަލުން މި ފްލެޓު ލިސްޓު ރިވިއު ކުރީ ނުވަތަ ޕޮއިންޓު ތައް ބަދަލުކުރީ ކޮން އުސޫލަކުން ކަން ބުނަން ނޭނގޭ ކަމަށް ވެސް އޭނާ ވިދާޅުވިއެވެ. އަދި މިކަން ބެލޭނޭ ގޮތެއް ވެސް ނެތް ކަމަށް ވަޙީދު ވިދާޅުވިއެވެ.
4000 ފްލެޓް ލިސްޓުގައި ނުހިމެނޭ 577 މީހެއްގެ މައުލޫމާތު ރިވިއުކޮށް ފްލެޓް ދޭނެ ކަމަށް މުއްތަލިބުގެ ލިސްޓުގައި އެބައޮތް އިއުލާންކޮށްފައި. 56 ފަރާތެއްގެ މާކްސް އާއި ކުޅެ މާކްސް މަތިކޮށްފައި އެބަހުރި.އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ)
ވަޙީދު ވިދާޅުވީ ޕޮއިންޓަކީ ޕޯޓަލް އަށް ވަދެ، އެމީހަކު ޓިކް ކުރަމުން ގެންދާއިރު، އެ މީހަކަށް ވެސް ޕޮއިންޓު ފެންނަ ގޮތަށް އިންނަ އެއްޗެއް ކަމަށެވެ. ކަން މިހެން ހުރި އިރު، އެ ބޭފުޅުން އެ ލިސްޓުގައި ހުރި ޕޮއިންޓުތައް ބަދަލުކުރީ ކޮން އުސޫލަކުން އަދި ކޮން ހަމައަކުން ކަމެއް އެނގޭނޭ ގޮތެއް ނެތް ކަމަށް އޭނާ ވިދާޅުވިއެވެ.
ވަޙީދު ވިދާޅުވީ ޑރ. ހައިދަރުގެ ދެމަފިރި ކަނބަލުންނަށް ފްލެޓު ލިބިފައި ވަނީ އެމްޑީޕީ ސަރުކާރުން އެބޭފުޅުން ނަކީ ޝަރުތު ހަމަވާ ބޭފުޅުން ކަމުގައި ކަނޑައަޅާފައި އޮތުމުން ކަމަށް މިނިސްޓަރު ޑރ އަބްދުﷲ މުއްތަލިބު ވިދާޅުވެފައިވާ ކަމަށެވެ.
ވަޙީދު ވިދާޅުވީ ޑރ. ހައިދަރުގެ ދެމަފިރިކަނބަލުން ނަކީވެސް ފްލެޓަށް ޝަރުތު ހަމަވާ ބޭފުޅުން ކަމަށާއި ނަމަވެސް އެމްޑީޕީގެ ފްލެޓް ލިސްޓުގައި ފްލެޓު ލިބުނު މީހުންގެ އިތުރުން ޝަރުތު ހަމަވާ 15751 މީހުން އެބަތިބި ކަމަށެވެ. އަދި އޭގެ ތެރެއިން ޝަރުތު ހަމަވަނީ ހަމަ އެކަނި ހައިދަރުގެ ދެމަފިރިކަނބަލުން ނޫން ކަމަށް ވެސް ވަޙީދު ވިދާޅުވިއެވެ.
ވަޙީދު ވިދާޅުވީ ފްލެޓު ލިސްޓަށް ޝަރުތު ހަމަވާ 15751 މީހުން ތިބި އިރު، އޭގެތެރެއިން ހަމަ އެކަނި ހައިދަރުގެ ދެމަފިރިކަނބަލުންގެ ޝަރުތުހަމަވާ ކަމަށް މިނިސްޓަރު މުއްތަލިބު ވިދާޅުވުމަކީ އިންތިހާއަށް ކަންބޮޑުވާ ކަމެއް ކަމަށެވެ. އަދި އެދެންނެވި ގޮތުގެ މަތިން ޝަރުތު ހަމަވެގެން ފްލެޓު ލިބެން ޖެހޭ ނަމަ ލިސްޓުގައި ދެން ތިބި 15749 މީޙުންނަށް ވެސް ފްލެޓު ލިބެން ޖެހޭނޭ ކަމަށް ވެސް ވަހީދު ވިދާޅުވިއެވެ.
ކަންމިހެން ހުރިއިރު، 4000 މީޙުންގެ މި ފްލެޓު ލިސްޓާއި މި ސަރުކާރުން ކުޅެފައި މިވަނީ އެ ބޭފުޅުން ބޭނުންވާ ބައަކަށް ފެލްޓު ދިނުމުގެ ބޭނުމުގައި ކަމަށް ވަޙީދު ވިދާޅުވިއެވެ.
