ގާޒީ އިބްރާހިމް ޒިހުނީއާއި، ސޮފްއަތު ހަބީބު ސަރުކާރުން ބޭނުންވާ ގޮތަށް ބަޔާން ދިނުމަށް ދެކޮޅު ހައްދަވައިފި
ގާޒީ ޒިހުނީ އާއި ސޮފްއަތަށް ސަރުކާރުގެ ފަރާތުން ނުފޫޒު ފޯރުވައި، ބިރު ދެއްކުމަށް މަަސައްކަތް ކުރަމުންދާ ކަމަށް ތުހުމަތުކޮށްފައިވޭ
ގާޒީ އިބްރާހިމް ޒިހުނީއާއި، ސޮފްއަތު ހަބީބު
ކްރިމިނަލް ކޯޓުގެ ގާޒީ އިބްރާހިމް ޒިހުނީއާއި، ސޮފްއަތު ހަބީބު ސަރުކާރުން ބޭނުންވާ ގޮތަށް ބަޔާން ދިނުމަށް ދެކޮޅު ހައްދަވައިފިއެވެ.
މިދިޔަ ހަފްތާ ތެރޭގައި ގާޒީ އިބްރާހިމް ޒިހުނީ އަދި ސޮފްއަތު ހަބީބު ޖުޑީޝަލް ސާވިސް ކޮމިޝަން (ޖޭއެސްސީ)އަށް ވަނީ ހާޒިރުކޮށްފައެވެ. އެއީ ފަނޑިޔާރު މަހާޒް އަލީ ޒާހިރާއި ފަނޑިޔާރު އަޒްމިރާލްދާ ޒާހިރު ކްރިމިނަލް ކޯޓަށް ނުފޫޒު ފޯރުވަން އުޅުނު ކަމަށް ބުނާ މައްސަލައާ ގުޅިގެން ބަޔާން ނެގުމަށެވެ.
މިމައްސަލައާ ގުޅިގެން އިތުބާރުހުރި ފަރާތަކުން ރާއްޖެއެމްވީއަށް ވިދާޅުވީ މިމައްސަލައާ ގުޅިގެން ސަރުކާރުން ބޭނުންވާ ގޮތަށް ގާޒީ އިބްރާހިމް ޒިހުނީ އަދި ސޮފްއަތު ހަބީބު ބަޔާން ދިނުމަށް ދެކޮޅު ހައްދަވާފައިވާ ކަމަށާއި، ބަޔާން ދީފައިވަނީ ސަރުކާރުން ބޭނުންވާ ގޮތަށް ނޫން ކަމަށެވެ. އަދި ގާޒީ ޒިހުނީ އާއި ސޮފްއަތު ހަބީބަށް ސަރުކާރުގެ ފަރާތުން ވަރަށް ބޮޑަށް ނުފޫޒު ފޯރުވައި، ބިރު ދެއްކުމަށް މަަސައްކަތް ކުރަމުންދާ ކަމަށް ތުހުމަތުކޮށްފައިވެއެވެ.
ފަނޑިޔާރު މަހާޒާއި، އަޒްމިރާލްދާ އަށް ކުރާ ތުހުމަތަކީ، އަޒްމިރާލްދާގެ ފިރިކަލުން މައްސަލައެއްގައި ހައްޔަރު ކުރުމުން، އޭނާ ދޫކޮށްލަން ކްރިމިނަލް ކޯޓަށް ނުފޫޒު ފޯރުވުމެވެ. ނަމަވެސް ކްރިމިނަލް ކޯޓުގެ ގާޒީ ޒިހުނީއާއި، ސޮފްއަތު ހަބީބު ބަޔާން ނުދެއްވުމުން މިހާރު އެހެން ސުލޫކީ މައްސަލައެއް ޖޭއެސްސީން ބަލަން ފަށާފައިވާ ކަަމަށް އެބޭފުޅާ ވިދާޅުވިއެވެ.
އެބޭފުޅާ ވިދާޅުވީ މިހާރު ބަލަމުންދާ މައްސަލައަކީ ހައި ކޯޓުގެ ކުރީގެ އެސިސްޓެންޓް ރަޖިސްޓްރާ ހުސައިން މުހައްމަދު ހަނީފް ސުޕްރީމް ކޯޓަށް ހާޒިރުކޮށް ސުޕްރީމް ކޯޓުގެ އޭރުގެ ފަނޑިޔާރު ހުސްނުއްސުއޫދު "ހުތުރު ބަހުން" ވާހަކަ ދެއްކެވި ކަމަށް ބުނާ މަޖިލިހުގައި ފަނޑިޔާރު މަހާޒު އާއި އަޒްމިރަލްދާ ތިއްބެވުމުން ބަލަމުންދާ މައްސަލައެއް ކަމަށެވެ.
ހަނީފުއާ ހުތުރު ބަހުން ވާހަކަ ދެއްކެވި ކަމަށް ބުނާތީ ހުސްނުއްސުއޫދުގެ މައްސަލަ ވެސް ޖޭއެސްސީން ބަލަން ނިންމިއެވެ. ނަމަވެސް 4 މާރޗް 2025 ވަނަ ދުވަހު ރައީސް މުއިއްޒު ގާނޫނު އަސާސީ އާ ޚިލާފުވެއްޖެ ކަމަށް ވިދާޅުވެ، ސުޕްރީމް ކޯޓުގެ ފަނޑިޔާރުކަމުން ހުސްނުއްސުއޫދު ވަނީ އިސްތިއުފާ ދެއްވާފައެވެ.
ހައި ކޯޓުގެ ކުރީގެ އެސިސްޓެންޓް ރަޖިސްޓްރާ ހަނީފްއާ ހުތުރު ބަހުން ވާހަކަ ދެއްކެވި ކަމަށް ބުނާ މައްސަލަ ފުރަތަމަ ޖޭއެސްސީން ބަލަން ފެށީ 2022 ވަނަ އަހަރުގެ އޮކްޓޫބަރު މަހުގެ ތެރޭގައެވެ. ނަމަވެސް މިހާތަނަށް ޖޭއެސްސީން އެމައްސަލަ ބަލާފައިނުވެއެވެ. އަދި ސިޔާސީ ޕާޓީތަކަށް މެންބަރުންގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނައި ބަދަލު ބާތިލު ކުރަން ހުށަހެޅި މައްސަލައިގެ ޝަރީއަތް ފެށުމާއެކު، މިފަދަ މައްސަލަތައް ޖޭއެސްސީން ވަނީ ބަލަން ފަށާފައެވެ.
