އެމެރިކާ އިން ފިއްތުންތަކާއި އެކަހެރިކުރުމުގެ ފިޔަވަޅުތައް އަޅަމުންދާހާ ހިނދަކު, ނިއުކްލިއަރ މަޝްވަރާތަކުގައި ސީދާ ބައިވެރި ނުވާނެ ކަމަށް އީރާނުގެ ޚާރިޖީ ވަޒީރު އައްބާސް އަރާޤްޗީ ވިދާޅުވެއްޖެ އެވެ.

ޖިއްދާ ގައި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ބައްދަލުވުމެއްގައި ބައިވެރިވެވަޑައި ގަތުމަށް ސައުދީ އަށް ވަޑައިގެން ހުންނަވައި، އެއެފްޕީއަށް މަޢުލޫމާތު ދެއްވަމުން ހުކުރު ދުވަހު އެމަނިކުފާނު ވިދާޅުވީ، އީރާނުގެ ނިއުކްލިއަރ ޕްރޮގްރާމަކީ ސުލްހަވެރި މަޤްސަދެއްގައި ހިންގާ ޕްރޮގްރާމެއް ކަމަށެވެ.

އެމެރިކާގެ ރައީސް ޑޮނަލްޓް ޓްރަމްޕް، އީރާނުގެ އިސްލާމީ އިންޤިލާބުގެ ލީޑަރ އާޔަތުﷲ ސައްޔިދު އަލީ ޚާމަނާއީ އަށް ސިޓީއެއް ފޮނުއްވިކަމަށް ދެއްކެވި ވާހަކަ އީރާނުގެ ޔޫއެން މިޝަނުން ވަނީ ދޮގު ކޮށްފަ އެވެ.

 ފޮކްސް ނިއުސްއަށް ވާހަކަ ދައްކަވަމުން ޓްރަމްޕް ވިދާޅުވީ، އީރާނާއެކު އެއްބަސްވުމަކަށް އާދެވޭނެކަމުގެ އުންމީދު އޮތް ކަމަށެވެ. އަދި އިތުރު ނިއުކުލިއަރ ހަތިޔާރު އުފެއްދުމުގެ ހުއްދަ ދެވެން ނެތް ކަމަށާއި، މަޝްވަރާތަކަށް އެއްބަސްވުމަކީ އީރާނަށް ވެސް އެންމެ ރަނގަޅު ގޮތް ކަމަށް ޓްރަމްޕް ވަނީ ވިދާޅުވެފަ އެވެ.

އިތުރަށް ވާހަކަ ދައްކަވަމުން އީރާންގެ ޚާރިޖީ ވަޒީރު އަރާޤްޗީ ވިދާޅުވީ، އިސްރާއީލާއި އެމެރިކާއިން އީރާނުގެ ނިއުކްލިއަރ ފެސިލިޓީތަކަށް ހަމަލާދޭން އިންޒާރު ދެމުންދާއިރު، އެ ފެސިލިޓީތަކަށް ހަމަލާ ދީގެން އެ ފެސިލިޓީތައް ނައްތައި ނުލެވޭނެ ކަމަށެވެ.

އެފަދަ ހަމަލާއެއް އަތުވެއްޖެ ނަމަ، އީރާނުން އެކަށީގެންވާ ގޮތެއް ގައި ޖަވާބު ދޭނެކަމަށް ވެސް އެމަނިކުފާނު ވިދާޅުވި އެވެ. އަދި އެމަނިކުފާނު ވިދާޅުވީ އީރާނަށް ހަމަލާދީފި ނަމަ، އިސްރާއީލަށް ވެސް ހަމަހަމަ ގޮތެއްގައި ޖަވާބު ދެވޭނެ ކަމަށެވެ.

މިހާރު ވެސް ޖޮއިންޓް ކޮމްޕްރެހެންސިވް ޕްލޭން އޮފް އެކްޝަން (ޖޭސީޕީއޯއޭ)ގެ އެހެން ބައިވެރިން ކަމުގައިވާ ރަޝިޔާ، ޗައިނާ އަދި ޔޫރަޕުގެ ތިން ގައުމާއެކު މަޝްވަރާތައް ކުރިއަށްދާކަމަށް ވެސް އަރާޤްޗީ ފާހަގަ ކުރެއްވި އެވެ.