ރައްޔިތުންގެ ބަހެއްނެތި ޤާނޫނު އަސާސީ ރޫޅައެއް ނުލެވޭނެ: ރީކޯ މޫސަ

މިހާރު އޮތް ޤާނޫނު އަސާސީއަކީ ރައްޔިތުންގެ ބަހެއްނެތި ބޭނުން ގޮތަކަށް ރޫޅާލެވޭނެ އެއްޗެއް ނޫން ކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު ވިދާޅުވެއްޖެއެވެ.

މޫސަ އެކްސްގައި ކުރެއްވި ޕޯސްޓެއްގައި ވިދާޅުވީ ޤާނޫނު އަސާސީގައި ހިމެނޭ އަސާސީ ހައްޤުތަކާ މިނިވަންކަމުގެ ބާބުގައި ހިމެނޭ އެއްވެސް މާއްދާއަކަށް ބަދަލު ގެނެވޭނީ ރައްޔިތުންގެ ފެންނަ ނުފެންނަ ވޯޓެއް ނަގައިގެން ކަމަށް ބުނެފައިވާ ކަމަށެވެ.

އެހެން ނަމަވެސް މިހާރު އޮތް މަޖިލީހުންވަނީ ރައްޔިތުންގެ މަޖިލީހުގެ މެމްބަރުން އިންތިޚާބުވުމަށް ފަހު ސިޔާސީޕާޓީ ބަދަލުކޮށްފިނަމަ ނުވަތަ ޕާޓީއިން ވަކިކޮށްފިނަމަ މެމްބަރުކަން ގެއްލޭގޮތަށް ޤާނޫނު އަސާސީގައި ހިމެނުމަށް ފާސްކޮށްފައެވެ. އަދި އެއިސްލާހު ރައީސް މުހައްމަދު މުޢިއްޒުވަނީ 20 ނޮވެންބަރ 2024 ގައި ތަސްދީޤު ކުރައްވައިފައެވެ. މޫސަ ވިދާޅުވަނީ އެހެން ކަމުން ރައީސުލްޖުމްހޫރިއްޔާ މިހާރު އެހުންނެވީ ޤާނޫނު އަސާސީއާ ހިލާފުވެވަޑައިގެންފައި ކަމަށެވެ.

ޤާނޫނު އަސާސީއަށް މި ގެނެވުނު އިސްލާހު ބާތިލުކުރުމަށް ހުށަހެޅިފައިވާ މައްސަލައެއް މިހާރު ސްޕްރީމް ކޯޓުގައި ވަނީ ފަށާފައެވެ. އެކޯޓަށް އެމައްސަލަ ހުށަހެޅުއްވީ ރައްޔިތުންގެ މަޖިލީހުގެ ކުރީގެ ކެންދޫ ދާއިރާގެ މެމްބަރު އަލީ ހުސެއިނެވެ.

މި މައްސަލަ ސްޕްރީމްކޯޓަށް ބަލައިގަތް ފަހުން އެކޯޓުގެ 3 ފަނޑިޔާރަކު ޖޭއެސްސީއިން ސަސްޕެންޑް ކޮށްފައިވެއެވެ. އަދި ސަސްޕެންޑްކުރި 1 ފަނޑިޔާރުކަމުގައިވާ ހުސްނުއް ސުޢޫދު މިހާރުވަނީ ފަނޑިޔާރު ކަމުން އިސްތިޢުފާދެއްވައިފައެވެ. ސުޢޫދު އިސްތިޢުފާ ދެއްވީ ސަރުކާރުން ފަނޑިޔާރުންނަށް ބިރުދައްކާ ކަމަށް ވިދާޅުވެފައެވެ.