ކޮތަރުތަކަށް ޖެހޭ ބަލި ދެނެގަނެވިފައިވާ ކަމަށާއި، އިންސާނުންނަށް ނުރައްކަލެއް ނެތް ކަމަށް ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ބުނެފިއެވެ.

މިފަހުން މާލެސިޓީގައި އުޅޭ ކޮތަރުތަކަށް ބައްޔެއް ޖެހި، އެ މަރުވާ މިންވަރު ވަނީ އިތުރުވެގެން ގޮސްފައެވެ.

މި މައްސަލައާ ގުޅިގެން އެ ވުޒާރާއިން ނެރުނު ބަޔާނެއްގައި ބުނީ، ސާމްޕަލް ޓެސްޓުތައް ހަދާފައިވާ ކަމަށާއި، ކޮތަރުތަކަށް ޖެހޭ ބަލި ދެނެގަނެވިފައިވާ ކަމަށެވެ. އެ ޓެސްޓުތަކުން، ކޮތަރުތަކަށް ޖެހިފައިވާ ބައްޔަކީ އިންފެކްޝަސް ކޮރައިޒާ ކަމަށް ދެނެގަނެވިފައިވާ ކަމަށެވެ.

އެ ބައްޔަކީ އާންމުކޮށް ދޫނީގެ ނޭވާލާ ނިޒާމަށް ޖެހޭ ބައްޔެއް ކަމަށާއި، ބަލި ދެނެގަނެފައިވަނީ ބަލި ފެތުރިފައިވާ ގޮތާއި ބަލީގެ އަލާމާތްތަކާއި ނެކްރޯޕްސީ ހޯދުންތަކާއި ލެބޯޓްރީ ޓެސްޓުތަކުން ކަމަށް އެ ވުޒާރާއިން ބުނެއެވެ. މިއީ އެވިބެޓްރިއަމް ޕެރެގެލިނޭރަމް ނަމަކަށް ކިޔާ ދޫނީގެ ނޭވާލާ ނިޒާމަށް ހަމަލާދޭ ބެކްޓްރީއެއްގެ ސަބަބުން ޖެހޭ ބައްޔެއް ކަމަށާއި، ތަހުލީލުތަކުން، މިކޮތަރުތަކަށް ކޮކްސިޑީއޯސިސް، ކެންޑިޑިއޭސިސް އަދި އެހެނިހެން ބެކްޓީރިއަލް އިންފެކްޝަންތައް ޖެހިފައިވާކަން ފާހަގަކުރެވިފައިވާ ކަމަށެވެ.

މީގެ އިތުރުން ދިރޭތަކެއްޗާ ބެހޭ ވުޒާރާއިން ބުނީ އިންފެކްޝަން ކޮރައިޒާގެ އިތުރުން ސެކެންޑްރީ ބެކްޓީރިއަލް އިންފެކްޝަންތައް ޖެހުމުގެ ސަބަބުން ބަލި ބޮޑުވެ، މަރުވާ ކަމަށެވެ. މި ބަލި ޖެހުމުން ނޭފަތުން ފެން އައިސް، ދޫނި ކެއްސާ، ނޭވާލުމަށް އުނދަގޫވެ، ބޮލާއި މޫނު ދުޅަވެ، ކެއުން ބުއިމަށް އުނދަގޫވާ ކަމަށެވެ. އަދި މި ބައްޔަކީ ކުޑަ ދުވަސްކޮޅެއްގެ ތެރޭގައި އޭގެ ޒާތުގައި އަމިއްލައަށް ކޮންޓްރޯލްވާ ބައްޔެއް ކަމަށް ވެސް ވުޒާރާގެ ބަޔާނުގައި ބުނެފައިވެއެވެ.

ވުޒާރާއިން ބުނީ މި ބައްޔަކީ އިންސާނުންނަށް، އޭގެ ސަބަބުން އެއްވެސް ނުރައްްކަލެއް ކުރިމަތިކުރުވާނެ ބައްޔެއް ނޫން ކަަމަށެވެ. ނަމަވެސް ރައްކާތެރި ގޮތަކީ ކުޑަކުދިން މަރުވެފައިވާ ކޮތަރު، ނުވަތަ ބަލިޖެހިފައިވާ ކޮތަރުތަކާއި ކައިރި ނުކުރުމާއި ބޮޑެތި މީހުންވެސް އެ ތަކެތީގައި އަތްލައި ހިފައި އުޅޭއިރު، ރައްކާތެރި ވަސީލަތްތައް ބޭނުން ކުރުމަށް އިލްތިމާސްކޮށްފައިވެއެވެ.