ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ނިޒާމަށް ރައްޔިތުން ހޭލުންތެރި ވެފައިވާ މިންވަރު ކުޑަ ކަމަށް އެލްޖީއޭގެ ޑިރެކްޓަރ މުހައްމަދު ނަސީރު ވިދާޅު ވެއްޖެއެވެ.

ރާއްޖެ ޓީވީގެ ޚަބަރުފީތާ ޕްރޮގްރާމްގައި ވާހަކަ ދައްކަވަމުން ނަސީރު ވިދާޅުވި ލާމަރުކަޒީ ނިޒާމަކީ އަލަށް އުފެދުނު ގާނޫނުއަސާސީގެ ދަށުން އުފެދިގެން އައި ނިޒާމެއް ކަމަށާއި 2010/7 ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި  ދިވެހިރާއްޖޭގެ އިދާރީ ދާއިރާތައް ހިންގަންވާނީ ލާމަރުކަޒީ އުސޫލުން ކަން ބަޔާންކޮށްފައި ވާކަމަށެވެ. 

ނަމަވެސް މި ނިޒާމަށް 8 އަހަރު ފުރިފައިވާއިރު ނިޒާމާއި މެދު އާންމު ރައްޔިތުން ހޭލުންތެރިވާންޖެހޭ މިންވަރަށް ހޭލުންތެރި ނުވާ ކަމަށް ނަސީރު ވިދާޅުވިއެވެ.

"އިދާރީ ދާއިރާތައް ހިންގަންވާނީ ލާމަރުކަޒީ އުސޫލުން ކަމަށްވާއިރު މި ނިޒާމަށް 8 އަހަރު ފުރިފައިވާއިރު ފާހަގަ ކުރެވެނީ ނިޒާމާއި މެދު އާންމު ރައްޔިތުންނާއި، ދައުލަތުގެ ކަމާއި ގުޅުން ހުރި ބައެއް މުއައްސަސާތަކާއި އަދި މުއައްސަސާތަކުގައި މަސައްކަތް ކުރައްވާ ސިޔާސީ ބޭފުޅުންނަށް ވެސް ނިޒާމްގެ މައުލޫމާތު ރަނގަޅަށް އެނގިވަޑައި ނުގަންނަވާ ކަމަށް. އެހެންކަމުން މިފަހަރު އަތޮޅުތެރޭގެ ކައުންސިލް ތަކާއި ރަށު ކައުންސިލްތައް ވެސް ހިމެނޭގޮތަށް ލާމަރުކަޒީ ދުވަސް ފާހަގަ ކުރުމަށް ހަމަޖައްސާފައި ވަނީ." މުހައްމަދު ނަސީރު ވިދާޅުވިއެވެ.

ލާމަރުކަޒީ ނިޒާމަށް ރައްޔިތުން ފަރިތަނުވުމުގެ ސަބަބުން ދިމާވި ގޮންޖެހުން ތަކަށް އަލިއަޅުވާލައްވާ މިޕްރޮގްރާމްގައި ވާހަކަ ދައްކަވަމުން ނަސީރު ވިދާޅުވީ ލާމަރުކަޒީ ނިޒާމްއައީ މަލްޓި ޕާރޓީ ޑިމޮކްރަސީ ނުވަތަ ސިޔާސީ ޕާޓީ ތަކާއި އެކުއެކީގައި ކަމަށްވުމުން މިނިޒާމް އުފަންވީއިރު  ކައުންސިލަރުން އިންތިޚާބު ކުރެވި، ކައުންސިލްތައް އިންތިޚާބު ކުރެވުނު ކައުންސިލަރުންނާއި ހަވާލު ކުރެވިފައިވާ ކަމަށެވެ.

އެހެންކަމުން އިންތިޚާބުވި ކައުންސިލަރުން މަގާމްތަކާއި ހަވާލުވުމުން ކުރީގައި ތިއްބެވި ފަރާތްތައް ސިވިލްސާރވިސް ނުވަތަ އިދާރީ މީހުންގެ ގޮތުގައި  ބަދަލުވެގެން ދިޔުމުގެ ސަބަބުން  ކުރީގައި ތިބި ބައެއްގެ މައްޗަށް ބަސްކިޔާނެ އެހެންބަޔަކު އައުމުން ބަލައި ގަންނަން އުދަގޫވި ނަމަވެސް  އެލްޖީއޭއާއި ކައުންސިލްތައް އެކުވެ ކުރެވުނު މަސައްކަތުން އެކަން ހަމަޖެހިގެން ދިޔަ ކަމަށް ނަސީރު ވިދާޅުވިއެވެ.

މީގެ އިތުރުން ވެސް ކައުންސިލްތަކަށް ބާރުތައް ލިބިދީފައި ނެތުމާއި ބަޖެޓް ނެތުމާއި މިފަދަ އެތައް ކަމެއް ކުރި މަތިވެގެން ދިޔައިރު މި ގޮންޖެހުންތަކުގެ އެންމެ ބޮޑު އަސަރުކުރި އެއްބަޔަކީ އެލްޖީއޭއާއި ކައުންސިލްތައް ކަމަށް ވެސް އޭނާ ވިދާޅުވިއެވެ.  

އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުން އެލްޖީއޭ އުފެދުނީ 2010 އަހަރުގެ އޮގަސްޓް މަހުގެ ތެރޭގައެވެ. ކައުންސިލަރުން އިންތިޚާބުވެ ކައުންސިލަރުން ހުވާކޮށް  ނިޒާމް ނިޒާމެއްގެ ގޮތުގައި ހިނގަން ފަށާފައިވަނީ  2011 ވަނައަހަރުގެ ފެބުރުއަރީމަހުގެ 26 ވަނަދުވަހުއެވެ.