ނޭވާލާ ނިޒާމުގެ ބަލިތަކަށް ޚާއްސަ މަރުކަޒެއް އައިޖީއެމްއެޗްގައި ހުޅުވައިފި
ހުރިހާ ޚިދުމަތަކަށް އާސަންދަ ލިބޭނެ
ރެސްޕިރޭޓަރީ މެޑިސިން ސެންޓަރު ހުޅުވުމުގެ ރަސްމިއްޔާތުގެ ތެރެއިން
ނޭވާލާ ނިޒާމުގެ ބަލިތަކަށް ޚާއްސަ މަރުކަޒެއް އައިޖީއެމްއެޗްގައި ހުޅުވައިފިއެވެ.
އާދިއްތަ ދުވަހު އައިޖީއެމްއެޗުގައި ބޭއްވި ރަސްމިއްޔާތުގައި އެ ސެންޓަރު ހުޅުވައިދެއްވީ އައިޖީއެމްއެޗް ގްރޫޕް އޮފް ހޮސްޕިޓަލްސްގެ ގަވާނިންގ ބޯޑުގެ ޗެއާމަން ޑރ.އަބްދުލް އަޒީޒް ޔޫސުފެވެ.
ސެންޓަރު ހުޅުވުމުގެ ރަސްމިއްޔާތުގައި ޑރ.އަޒީޒް ވިދާޅުވީ އެފަދަ ސެންޓަރެއް ހުޅުވި ނަމަވެސް ނޭވާލާ ނިޒާމުގެ ބަލިތައް ކޮންޓްރޯލްކޮށް މަދުކުރެވޭނެ ނިޒާމެއް ޤާއިމުވެފައި އޮންނަން ޖެހޭނެ ކަމަށެވެ.
ތަފާތު ޔުނިޓްތަކަކަށް ބަހާލައިގެން ރެސްޕިރޭޓަރީ މެޑިސިން ސެންޓަރުން ނޭވާލާ ނިޒާމުގެ ބަލިތަކަށް ޑޮކްޓަރަށް ދެއްކުމާއި ރިހެބިލިޓޭޝަން ދިނުމާއި ޓެސްޓްތައް ކުރެވޭނެ އެވެ. އަދި ނޭވާލާ ނިޒާމުގެ ބަލިތަކުގެ އޮޕަރޭޝަންތައް ވެސް މި ސެންޓަރުން ކުރެވޭނެ އެވެ. ނޭވާލާ ނިޒާމު ފެއިލް ވުމުން ފަރުވާ ދޭނެ ޚާއްސަ ޔުނިޓަކާއި ނިދުމުގެ ތެރޭގައި ނޭވާލާ ނިޒާމަަށް ދިމާވާ ބަލިތަކަށް ޚާއްސަ ސްލީޕް ލެބެއްވެސް ހުރެ އެވެ.
" މިކޮޅުގަ ދެވޭ ހުރިހާ ސާރވިސްއަކީ ހަމަ ފުލް އާސަންދައިގެ ދަށުން. ބަލި މީހާގެ އަތުން އެއްވެސް އެއްޗެއް ދޭކަށް ނުޖެހޭނެ. ހުރިހާ ކަމަކީވެސް ހަމަ އާސަންދަ ކަވަރ ކޮށް އާސަންދައަށް ހެދޭނެ އެއްޗެއް" އެ ސެންޓަރު ހިންގެވުމާ ހަވާލުވެ ހުންނެވި މޫސާ ހުސައިން ވިދާޅުވިއެވެ.
ދުންފަތުގެ އިސްތިއުމާލު ކުރުމަށް ދެވިހިފައިވާ ފަރާތްތަކަށް ވެސް މި ސެންޓަރުން ފަރުވާ ދެއެވެ.
"ނޭވާލާ ނިޒާމު ގިިނަ ބައްޔަކީ ދުންފަތުގެ ސަބަބުން ޖެހޭ ބައްޔަކަށް ވާތީ، އަޅުގަނޑުމެން ވަރަށް ބޮޑަަށް މީގަ ޕްރިވެންޝަނަށް ދާން ބޭނުން. އެއީ ވާ ގޮތަކީ މިސާލަކަށް މީހަކަށް ދުންފަތާ ދުރުވުމަށް އެހީތެރިވެދެވިއްޖެ ނަމަ މީގެ ބަލިތައް ޖެހޭލެއް މަދުވެގެންދާނެ. އެހެން ވީމަ، ފުދޭ ވަރަކަށް ތަރުހީބު ލިބިގެން ކުރިއަށްދާ ކަމެއް އެއީ،" މޫސާ ވިދާޅުވިއެވެ.
