އައްޑޫ ބިޔުރޯ

އިސްލާމްދީނުގެ ހިދާޔަތު ދެމެހެއްޓުމަށް އެންމެން ގުޅިގެން މަސައްކަތް ކުރަން ޖެހޭކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ، ގދ. ގައްދޫގައި ބޭއްވި އިޙްޔާ ފޯރަމް އާއި ގުޅިގެން ގައްދޫ ރައްޔިތުންނަށާއި ކައުންސިލަށް ޝުކުރު އަދާކުރައްވާ ރަސްމީ ފޭސްބުކް އެކައުންޓުގައި ކުރެއްވި ޕޯސްޓެއްގައެވެ.

ވަޒީރުގެ ޕޯސްޓުގައި ވަނީ އިޙްޔާ ފޯރަމް ކުރިއަށް ގެންދިއުމަށް ގައްދޫ ކައުންސިލުން ދެއްވި އެއްބާރުލެއްވުމާއި އެހީތެރިކަން ފާހަގަކުރައްވާ ކައުންސިލަށް ޝުކުރު އަދާކުރައްވާފައެވެ.

މި ރަމަޟާން މަހުގެ ރޭތައް އިޙްޔާ ކުރުމަށް އަތޮޅުތެރޭގެ 7 ރަށެއްގައި އިޙްޔާ ފޯރަމް ކުރިއަށް ގެންދިއުމަށް ހަމަޖެހިފައިވާއިރު، ގައްދޫގައި ކުރިއަށް ދިޔައީ މި ސިލްސިލާގެ ފުރަތަމަ ފޯރަމްއެވެ. މިފޯރަމްއަށް ގައްދޫގެ ގިނަ އަދަދެއްގެ ރައްޔިތުން ހާޒިރުވެފައިވާކަން ފާހަގަކޮށްލެވެއެވެ.

މި ފޯރަމްގައި ތަޤުރީރު ކުރެއްވީ އިސްލާމީ ކަންތައްތަކާ ބެހޭ ވުޒާރާގެ ސްޓޭޓް މިނިސްޓަރު ޢަބްދުالله ސަޢުދާންއެވެ.

ރަމަޟާން މަހުގެ ރޭތައް އިޙްޔާ ކުރުމަށް އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދާ ސިލްސިލާ އިޙްޔާ ފޯރަމްތަކުގެ ފުރަތަމަ ފޯރަމްގައި "ހެޔޮ ގޮތުގައި މުދާ ހޯދުމާއި ބޭނުން ކުރުން" މި މަޢުޟޫއަށް ތަޤުރީރު ކުރައްވާ ވަޒީރު ވަނީ ގިނަ މަޢުލޫމާތުތަކެއް ކީރިތި ޤުރުއާނާއި ރަސޫލާގެ ސުންނަތުން ދަލީލު ނަންގަވާ އާއްމުންނާއި ހަމައަށް ގެނެސްދެއްވާފައެވެ.

އިސްލާމީ ކަންތައްތަކާ ބެހޭ ވުޒާރާއިން މި ރަމަޟާން މަހު މާލޭގައި 8 އިޙްޔާ ފޯރަމް އަދި އަތޮޅުތެރޭގެ 7 ރަށެއްގައި އިޙްޔާ ފޯރަމް ކުރިއަށް ގެންދިއުމަށް ވަނީ ނިންމާފައެވެ. މީގެ އިތުރުން ސްކޫލް ދަރިވަރުންގެ 6 އިޙްޔާ ފޯރަމްވެސް ބޭއްވުމަށް ވަނީ ހަމަޖެހިފައެވެ.