މަސްޖިދުލް ހަރާމުގެ ގޯތިތެރޭގައި ބޯކޮށާ، ބޯ ބޭލޭނެ ޚިދުމަތް ޤާއިމު ކޮށްފި
މީގެ ކުރިން އުމުރާގެ ރުކުންތައް ފުރިހަމަ ކުރުމަށް ފަހު ބޯބޭލުމަށް ނުވަތަ ބޯކޮށުމަށް އިހުރާމުގައި ދުރު ސަރަހައްދުތަކަށް ހިނގާފައި ދާން ޖެހޭ
މަސްޖިދުލް ހަރާމް ގެ ގޯތިތެރޭގައި ބޯކޮށުމާއި ބޯ ބޭލުމުގެ ޚިދުމަތް މިއަހަރުގެ ރަމަޟާން މަހު ވަނީ ތައާރަފް ކޮށްފައި
މައްކާގެ މަސްޖިދުލް ހަރާމުގެ ގޯތިތެރޭގައި އުމްރާގެ އިޙްރާމު ކެނޑޭނެ ލުއިފަސޭހަކަން ހޯދައި ދިނުމަށް ބޯކޮށާ ނުވަތަ ބޯބޭލެނެ އިންތިޒާމު ހަމަޖައްސައިފިއެވެ.
ސައުދީ ސަރުކާރުން ހާމަކޮށްފައިވާ ގޮތުގައި މި ރަމަޟާން މަހު ފުރަތަމަ ފަހަރަށް މަސްޖިދުލް ހަރާމް ގެ ގޯތިތެރޭގައި އުމްރާގެ އިޙްރާމު ކެނޑޭނެ ޚިދުމަތް ތަޖުރިބާކުރުމުގެ މަސައްކަތް ވަނީ ފަށައިފައެވެ.
މީގެ ކުރިން އުމުރާގެ ރުކުންތައް ފުރިހަމަ ކުރުމަށް ފަހު ބޯބޭލުމަށް ނުވަތަ ބޯކޮށުމަށް އިހުރާމުގައި ދުރު ސަރަހައްދުތަކަށް ހިނގާފައި ދާން ޖެހެއެވެ.
މި އައު ޚިދުމަތުގެ ދަށުން، އުމްރާ އަދާކުރާ ފަރާތްތަކަށް މަރުވާ ސަރަޙައްދުގެ ކުރިމަތިން ޤާއިމުކޮށްފައިވާ ފަސް ތަނެއްގައި ބޯ ބޭލުމާއި ބޯ ކޮށުމުގެ ޚިދުމަތް ލިބޭނެއެވެ. ސިއްހީ މިންގަނޑުތަކާ އެއްގޮތައް ޒަމާނީ އާލާތްތައް ހިމެނޭ ބޯކޮށުމުގެ ޚިދުމަތްދޭ މޮބައިލް ޔުނިޓްތައް ވަނީ ޤާއިމުކޮށްފައި ކަމަށް ސައުދީ މީޑީއާ ރިޕޯޓުތައް ބުނެއެވެ.
މިއީ ﷲގެ މެހުމާނުންނަށް ދެވޭ ޚިދުމަތްތައް ރަނގަޅުކުރުމަށާއި ޙައްޖު އަދި އުމްރާގެ އަޅުކަން އިތުރަށް ފަސޭހަކުރުމަށް ކުރެވޭ މަސައްކަތްތަކުގެ ތެރެއިން ކުރެވޭ މަސައްކަތެއް ކަމަށް ސައުދީ ސަރުކާރުން ބުނެފައިވެއެވެ.
މި ޚިދުމަތް ބަލަހައްޓަނީ ތަޖުރިބާކާރު އަދި ޚާއްޞަ ޓީމަކުންނެވެ. މި ޓީމުން ޚިދުމަތް ދިނުމުގައި އެންމެ މަތީ ފެންވަރުގައި ރައްކާތެރިކަމުގެ މިންގަނޑުތަކަށް ފެތޭގޮތަށް، އަވަސް އަދި ހަރުދަނާ ގޮތެއްގައި ޚިދުމަތް ފޯރުކޮށްދިނުމަށް މަސައްކަތްކުރާނެ ކަމަށްވެސް ބުނެފައިވެއެވެ.
