އިގްތިސާދީ ގޮތުން ފުދުންތެރި ބަޔަކަށް ދިވެހީން ވާން ޖެހޭ ނަމަވެސް ބިދޭސީންގެ އަތްތަކަށް ދަނީ ބަރޯސާވަމުން: ޚުތުބާ

އިގްތިސާދީ ކަންކަމުގައި ބިދޭސީ އަތްތަކަށް ދިވެހީން ބަރޯސާވާން ފަށާފައިވާ ކަމަށާއި، ދިވެހީން ހީވާގިވެ އުޅޭ ތަން ނުފެނުމަކީ ހިތާމަހުރި ކަމެއް ކަމަށް ހުކުރު ޚުތުބާ ގައި ބުނެފި އެވެ.

''މަސައްކަތްތެރި އުފެއްދުންތެރި ބަޔަކަށް ވާށެ'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ، އިސްލާމް ދީނަކީ، ދުނިޔެއާއި އާޚިރަތުގެ ދީން ކަމަށާއި، މަސައްކަތް ކުރުމަށާއި، އުފެއްދުންތެރި ކަމަށް ގޮވައިލާ ދީން ކަމަށެވެ. އެ ދީނުގެ އަހުލުވެރީން ދިރިއުޅުމަށް ބޭނުންވާ ކަންކަން ފުރިހަމަ ކުރުމަށް މަސައްކަތްކުރާން އަންގަވާފައިވާ ކަމަށާއި، މަސައްކަތް ކުރުމުގައި މުސްލިމުން ލަދުވެތި ވެގެން ނުވާނެ ކަމަށެވެ. 

ނަމަވެސް މިއަދު ބައެއް ދިވެހީން ކަންނެތްވެ، މަސައްކަތާ ދުރުވެފައިވާ ކަމަށް ޚުތުބާ ގައި ބުނެފައިވެ އެވެ. 

މީގެ އިތުރުން ޚުތުބާގައި ބުނީ އިގްތިސާދީ ކަންކަމުގައި ބިދޭސީ އަތްތަކަށް ބަރޯސާވާން ފަށާފައިވާ ކަމަށާއި، މިއަދު މަހަށް ފުރާނެ ދިވެހި ފަޅުވެރިއަކު ނުވާ ކަމަށެވެ. ދިވެހި އިގްތިސާދުގެ އެއް މައިނާރަކީ މަސްވެރިކަން ކަމުގައިވީ އިރު، އެ ސިނާއަތު އޮންނާން ވާނީ ދިވެހީންގެ އަތްމަތީގައި ކަމަށާއި، ދަނޑުވެރިކަމާއި އިގްތިސާދީ އެހެނިހެން ސިނާއަތް ތަކުގައި ވެސް ދިވެހީން ހީވާގިވެ އުޅޭ ތަން ނުފެނުމަކީ ހިތާމަހުރި ކަމެއް ކަމަށް ޚުތުބާ ގައި ބުނެފައިވެ އެވެ. 

މާތް ﷲ ތައާލާ ވަނީ، ދުނިޔޭގެ ބިމާއި، އެ ބިމުގައި އުފެދޭ ގަސްހަގާގެއްސާއި، ކަނޑުގައި ދިރިއުޅޭ މަސްމަހާމެއްސާއި، އެހެނިހެން ތަކެތި އިންސާނާއަށް ޓަކައި ޚިދުމަތްތެރި ކުރައްވައިފައެވެ. މާތް ﷲ ވަޙީކުރައްވައިފައި ވެއެވެ.  މާނައީ: "އެކަލާނގެއީ، ތިޔަބައިމީހުންނަށް ޓަކައި، ފަސޭހަތަނެއް ކަމުގައި ބިންގަނޑުލެއްވި ރަސްކަލާނގެއެވެ. ފަހެ، އެ ތާނގެ ކަންކޮޅުތަކުގައި ތިޔަބައިމީހުން ހިނގައި ދަތުރުކުރާށެވެ! އަދި އެކަލާނގެ ދެއްވި ރިޒުގުން ކާށެވެ! އަދި އަލުން ދިރުއްވައި ފޮނުއްވުން ވަނީ، އެކަލާނގެ حضرةއަށެވެ." ކާބޯތަކެތި އަޅާ ގަސް އިންދުމަށް ބާރުއަޅުއްވައި، ކީރިތި ރަސޫލާمُحَمَّدُ صَلَّى اللهُ عَلَيْهِ وَسَلَّمَ ހަދީޘްކުރައްވައިފައި ވެއެވެ. (إِنْ قَامَتِ السَّاعَةُ وَفِيْ يَدِ أَحَدِكُمْ فَسِيْلَةٌ، فَإِنِ اسْتَطَاعَ أَلَّا تَقُوْمَ حَتَّى يَغْرِسَهَا فَلْيَغْرِسْهَا) މާނައީ: "ޤިޔާމަތް ޤާއިމުވާ ހިނދު، ތިޔަބައިމީހުންކުރެ މީހެއްގެ އަތުގައި، ކަދުރު ނިރެއް އޮތްކަމުގައި ވިއަސް، އޭނާއަށް ކުޅަދާނަވެގެންވާ ނަމަ ޤިޔާމަތްވުމުގެ ކުރީން، އެ ނިރު އިންދާހުށި ކަމެވެ." މި ޙަދީޘުން ދޭހަވަނީ، އިސްލާމްދީނުގައި، ކާބޯތަކެތި އަޅާ ގަސްއިންދުމާއި މީސްތަކުންނަށް މަންފާ ލިބެނިވި ކަންކަންކުރުމަށް އިސްކަންދީފައިވާ މިންވަރެވެ.

ޚުކުރު ޚުތުބާ 

އިސްލާމް ދީނުގައި، ހުއްދަ ކުރައްވާފައިވަނީ ހަލާލު ގޮތުގައި އާމްދަނީ ހޯދުމަށްކަން ފާހަގަކޮށް ޚުތުބާގައި ބުނީ ރިބާއާއި ޖުވާގެ މުއާމަލާތްތައް ހަރާމް ކުރައްވާފައިވާ ކަމަށާއި، ދީނުގައި ދިރިއުޅުމަށް ޓަކައި މަސައްކަތް ކުރުމަށް އަންގަވައިފައިވުމުން، މުސްލިމުންނަކީ އިގުތިސާދީ ގޮތުން ފުދުންތެރި ބަޔަކަށް ވާންޖެހޭ ކަމަށެވެ. އެ ފަދަ ބަޔަކަށް ވެވޭނީ، އެއުރެންނީ މަސައްކަތް ދަންނަ، މަސައްކަތްކޮށްގެން ތަކެތި އުފައްދާ ބަޔަކަށް ވެގެން ކަމަށް ޚުތުބާގައި ބުނެފައިވެ އެވެ. 

ޚުތުބާގައި ވަނީ އެހެން ބަޔެއްގެ މައްޗަށް ބަރޯސާވުމުގެ ބަދަލުގައި، ބޭނުންތައް ފުއްދާނެ ގޮތްތަކާއި، ވަސީލަތްތައް އަމިއްލައަށް އުފައްދައި، އޭގެ ބޭނުންހިފާ ބަޔަކު ކަމުގައި ވުމަށް ގޮވާލާފަ އެވެ.