'މަސައްކަތް ނިންމާލަން' ބޭނުންވާ ހަތިޔާރު ފޮނުވައިދިނުމުން ނަތަންޔާހޫގެ ޝުކުރު ޓްރަމްޕަށް
ޖެނުއަރީ މަހު ވައިޓް ހައުސް އަށް އެނބުރި ވަޑައިގެންނެވި ޓްރަމްޕް ވަނީ އިސްރާއީލަށް ހުރިހާ ގޮތަކަުންވެސް އިސްކަން ދެއްވާފައެވެ. މިގޮތުން، ނަތަންޔާހޫ އަކީ ޓްރަމްޕްގެ ދެވަނަ ދައުރުގައި ވައިޓް ހައުސްއަށް ފުރަތަމަ ދަޢުވަތު ދެއްވި ބޭރު ގައުމެއްގެ އިސްވެރިޔާއެވެ.
ވައިޓް ހައުސްގައި އެމެރިކާގެ ރައީސް ޑޮނަލްޑް ޓްރަމްޕް އާއި އިސްރާއީލުގެ ބޮޑު ވަޒީރު ނަތަންޔާހޫ ބައްދަލު ކުރަައްވަނީ - 4 ފެބްރުއަރީ 2025
އެމެރިކާގެ ކުރީ ސަރުކާރުން ހިފަހައްޓާފައި ހުރި ހަތިޔާރު ޓްރަމްޕްގެ ވެރިކަމުގައި އިސްރާއީލަށް ފޯރުކޮށްދޭން ނިންމުމުން އިސްރާއީލުގެ ބޮޑު ވަޒީރު އެމެރިކާގެ ރައީސް ޑޮނަލްޑް ޓްރަމްޕަށް ޝުކުރު އަދާކުރައްވައިފިއެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާދިއްތަ ދުވަހު ވިދާޅުވީ އެމެރިކާގެ ރައީސް ޑޮނަލްޑް ޓްރަމްޕް ދެއްވި އިތުރު ހަތިޔާރުތަކާއެކު، އީރާންގެ 'ޓެރަރ އެކްސިސް' އާ ދެކޮޅަށް ކުރަމުންދާ މަސައްކަތް ފުރިހަމައަށް ނިންމާލެވޭނެ ކަމަށެވެ
ނަތަންޔާހޫ އަކީ އީރާނުގެ ނިއުކްލިއަރ ޕްރޮގްރާމާއި، އީރާނުން އެހީތެރިވެދޭ ފަލަސްތީނުގެ ހަމާސް އާއި ލުބުނާނުގެ ހިޒްބުﷲ ފަދަ ޖިހާދު ކުރާ ޖަމާއަތްތަކާ ދެކޮޅަށް އަބަދުވެސް މަސައްކަތް ކުރާ ފަރާތެކެވެ. 'ޓެރަރަ އެކްސިސް' ގެ ގޮތުގައި އިސްރާއީލުން ސިފަކުރާ އީރާން އާއި އީރާނުގެ ބައިވެރިންނާ ދެކޮޅަށް އިސްރާއީލުން ދޭ ހަމަލާތަކުގައި ބޭނުން ކުރަނީ އެމެރިކާގެ ހަތިޔާރުކަން ފާހަގަ ކުރެވެއެވެ.
އިނގިރޭސި ބަހުން ދެއްވި ވީޑިއޯ ބަޔާނެއްގައި ނަތަންޔާހޫ ވިދާޅުވީ ޓްރަމްޕަކީ އިސްރާއީލަށް ވައިޓް ހައުސް އިން ލިބުނު އެންމެ ބޮޑު ރަހުމަތްތެރިޔާ ކަމަށެވެ. މިގޮތުން، އެމެރިކާގެ ކުރީގެ ސަރުކާރުން ހިފަހައްޓާފައި ހުރި ހަތިޔާރުތައް ފޮނުވައިދެއްވައި، އިސްރާއީލަށް ބޭނުންވާ ވަސީލަތްތައް ފޯރުކޮށްދެއްވާފައިވާ ވުމުން އީރާނުގެ "ޓެރަރ އެކްސިސް' އާ ދެކޮޅަށް ކުރަން ހުރި މަސައްކަތް ނިންމާލުމަށް ބޭނުންވާ އާލަތްތައް ލިބުނީ ކަމަށް ނަތަންޔާހޫ ވިދާޅުވިއެވެ.
މީގެ ކުރިން، އެމެރިކާގެ ސްޓޭޓް ސެކްރެޓަރީ މާކޯ ރޫބިއޯއާއެކު ބޭއްވި ނޫސްވެރިންގެ ބައްދަލުވުމެއްގައިވެސް ނަތަންޔާހޫ ވަނީ މިފަދަ މޭރުމަކުން ވާހަކަތަކެއް ދައްކަވާފައެވެ. ނޫސްވެރިންގެ ބައްދަލުވުމުގައި ނަތަންޔާހޫ ވިދާޅުވީ، އެމެރިކާގެ އެހީތެރިކަމާއެކު އީރާނުގެ 'ޓެރަރ އެކްސިސް' ގެ ކަންތައް ނިންމާލެވޭނެ ކަމަށެވެ.
ޖެނުއަރީ މަހު ވައިޓް ހައުސް އަށް އެނބުރި ވަޑައިގެންނެވި ޓްރަމްޕް ވަނީ އިސްރާއީލަށް ހުރިހާ ގޮތަކަުންވެސް އިސްކަން ދެއްވާފައެވެ. މިގޮތުން، ނަތަންޔާހޫއަކީ އޭނާގެ ދެވަނަ ދައުރުގައި ވައިޓް ހައުސްއަށް ފުރަތަމަ ދަޢުވަތު ދެއްވި ބޭރު ގައުމެއްގެ އިސްވެރިޔާއެވެ. އަނެއްކޮޅުން ޓްރަމްޕް ވަނީ އީރާނަށް ފިއްތުއްތައް އެންމެ މަތީ ދަރަޖައަކަށް ކުރިމަތި ކުރެއްވުމަށް އަޅަންޖެހޭ ފިޔަވަޅުތަކާ ބެހޭ ރިޔާސީ ގަރާރެއްގައި ސޮއި ކުރައްވާފައެވެ. ރިޔާސީ ފުރަތަަމަ ދައުރުގައި ވެސް ޓްރަމްޕް އީރާނާ ދެކޮޅަށް ގެންގުޅުއްވީ އެފަދަ ހަރުކަށި ސިޔާސަތެކެވެ.
އާދިއްތަ ދުވަހު، ރޫބިއޯ ވިދާޅުވީ އިސްރާއީލަށް 4 ބިލިއަން ޑޮލަރުގެ އަސްކަރީ އެހީ އަވަސް ކުރުމަށް ގަރާރެއްގައި ސޮއިކުރައްވާފައިވާ ކަމަށެވެ. އަދި ކުރީގެ ރައީސް ޖޯ ބައިޑެންގެ ދައުރުގައި ބައެއް ބާވަތުގެ ހަތިޔާރު އިސްރާއީލަށް ފޮނުވުން މަނާ ކޮށްފައި އޮތް އޮތުން ނިމުމަކަށް ގެނެވިފައިވާ ކަމަށެވެ.
