ލާޒިއޯ އިން ފަހު ވަގުތު އޭސީ މިލާން ބަލިކޮށްފި

އިޓާލިއަން ލީގުގައި އޭސީ މިލާނާ ދެކޮޅަށް ކުޅުނު މެޗުން މޮޅުވެ، ލާޒިއޯ އިން ލީގު ތާވަލްގެ ހަތަރު ވަނަ އަށް ޖެހިލައިފި އެވެ.

އޭސީ މިލާންގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗުގައި ލާޒިއޯ އިން ވަނީ 2-1 އިން އެ ޓީމުގެ މައްޗަށް ކުރި ހޯދައިފަ އެވެ. މެޗުގައި ލާޒިއޯ އިން ލަނޑު ޖަހައި ކުރި ހޯދާފައި ވަނިކޮށް، އޭސީ މިލާނުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ނަމަވެސް މެޗުގެ ފަހު ވަގުތުގައި ލަނޑު ޖަހައިގެން ލާޒިއޯ ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 28 ވަނަ މިނެޓުގައި ލާޒިއޯ އަށް ލީޑު ނަގައިދިނީ މަތިއާ ޒަކަގްނީ އެވެ. މެޗުގައި ނަތީޖާ ހަމަހަމަ ކުރުމަށް އޭސީ މިލާނުން މަސައްކަތް ކުރަމުން ދަނިކޮށް، އެ ޓީމުގެ ސްޓަހިންޖާ ޕަވްލޮވިޗް އަށް ވަނީ ސީދާ ރަތް ކާޑު ދައްކައި ދަނޑުން ފޮނުވާލައިފަ އެވެ.

އޭސީ މިލާނުން މެޗުގެ ނަތީޖާ ހަމަހަމަ ކުރީ މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށެވެ. ރަފައެލް ލިއާއޯ ތަނަވަސްކޮށްދިން ފުރުސަތެއްގައި އޭސީ މިލާނަށް އެ ލަނޑު ޖަހައިދިނީ ސަމުއެލް ޗުކުވޭޒީ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލާޒިއޯ އަށް ލިބުނު ޕެނަލްޓީ ކާމިޔާބުކޮށް، މެެޗުން އެ ޓީމު މޮޅުކޮށްދިނީ ޕެޑްރޯ އެވެ.

މޮޅާއެކު ލީގު ތާވަލްގެ ހަތަރު ވަނައިގައި ލާާޒިއޯ އޮތީ މިހާތަނަށް އެ ޓީމު ކުޅެފައިވާ 27 މެޗުން 50 ޕޮއިންޓާ އެކު އެވެ. ލާޒިއޯ އަތުން ބަލިވި އޭސީ މިލާން އޮތީ 27 މެޗުން 41 ޕޮއިންޓާ އެކު ނުވަ ވަަނައިގަ އެވެ.