ފުލެޓް ލިބޭނެކަމަށް ސަރުކާރުން ނެރޭ ލިސްޓުގައި ތިބީ 1820 މީހުން
ވެރިފިކޭޝަން ކުރިއަށްގެންދިޔަ ލިސްޓުގައި ހިމެނެނީ ޖުމްލަ 4939 ފަރާތެއް
ސަރުކާރުން ފުލެޓް ލިސްޓް ވެރިފައިކުރުމަށްފަހު ފުލެޓް ލިބެނީ 1820 މީހުންނަށް ކަމަށް މިނިސްޓަރު މުއްތަލިބު ވަނީ ވިދާޅުވެފައި - ފައިލް
ސަރުކާރުން ބޭނުންވާ ގޮތަށް ފުލެޓް ލިސްޓަށް ބަދަލު ގެނެސް ފުލެޓް ލިބޭނެކަމަށް ސަރުކާރުން ނެރޭ ލިސްޓުގައި ތިބީ 1820 މީހުން ކަމަށް ހައުސިންގ އެންޑް ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބު ވިދާޅުވެއްޖެއެވެ.
ރައީސް އިބްރާހިމް މުހައްމަދު ޞާލިހުގެ ސަރުކާރުން ހާމަކުރި 4000 މީހުންގެ ފުލެޓް ލިސްޓަށް ބަދަލު ގެނެސް ސަރުކާރުން ބޭނުންވާ ގޮތަށް ކަންކަން ކުރުމަށްފަހު އެކަމުގެ މައުލޫމާތު ހާމަކުރުމަށް ބޭއްވި ނޫސްވެރިންގެ ބައްދަލުވުމުގައި މިނިސްޓަރ މުއްތަލިވު ވިދާޅުވީ ސަރުކާރުން ފޯމުގެ ވެރިފިކޭޝަންގައި ބަލާފައިވާނީ އެމީހަކު ދީފައިވާ މައުލޫމާތާއި ހުށަހަޅާފައިވާ ލިޔުންތަކަށް ކަމަށެވެ. އަދި ހުށަހަޅާފައިވާ ލިޔެކިޔުންތަކާއި، ސަރުކާރުގެ ޑޭޓާ ބޭސްގައި ހުރި މައުލޫމާތު ބަލައި ސައްހަތޯ ބެލިފައިވާނެކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ޕޮއިންޓް ދީފައިވާގޮތް ރަނގަޅުތޯ ބެލުމަށް ބަލާފައިވާނީ އެމީހަކު ދީފައިވާ މައުލޫމާތަށް ކަމަށެވެ.
މިނިސްޓަރ ވިދާޅުވީ މި މަސައްކަތުގައިވެސް ސަރުކާރުގައި ހުރި ޑޭޓާތައް ބަލައި ވެރިފައި ކުރެވެން ހުރި މައުލޫމާތުވާނީ ވެރިފައިކުރެވިފައި ކަމަށެވެ. އަދި ލިސްޓް ނެރުމާއެކު އެއްވެސް މައްސަލައެއް ފާހަގަނުކުރެވޭ ފަރާތްތަކަށް ފުލެޓް ހަވާލުކުރުމުގެ މަސައްކަތް ކުރެވިގެންދާނެކަމަށް މިނިސްޓަރ ވިދާޅުވިއެވެ.
ފުލެޓް ނުލިބޭ ފަރާތްތަކަށް ޝަކުވާ ހުށަހެޅުމަށް 1 މަސް ދުވަހުގެ މުއްދަތެއް ލިބިގެންދާނެ. މި މުއްދަތުގައި ލިސްޓުން އުނިވި ފަރާތްތަކަށް ޕޯޓަލްއިން ޝަކުވާ ހުށަހެޅޭނެ. އަދި އާންމު ފަރާތަކުން ލިސްޓުގައި ހިމެނޭ ފަރާތަކާއިމެދު އެއްވެސް ޝަކުވާއެއް އޮތްނަމަ މިނިސްޓްރީއަށް ސިޓީއަކުން ނުވަތަ މެއިލްއަކުން ޝަކުވާ ހުށަހެޅޭނެ. ވެރިފިކޭޝަންގެ ނިމުނު އިރުގެ ނަތީޖާއަށް ބަލާއިރު، 3 ކޮޓަރީގެ ލިސްޓުގައި ހިމެނޭ 3721 ފަރާތުގެ ތެރެއިން ޝަރުތު ހަމަވެ 75 ޕޮއިންޓުން މަތިން މާކްސް ލިބިފައިވަނީ 1423 ފަރާތަކަށް. ދެކޮޓަރީގެ ލިސްޓުގައި ހިމެނޭ 1218 ފަރާތުގެ ތެރެއިން ޝަރުތު ހަމަވެ 73 ޕޮއިންޓަށްވުރެ މަތިން ލިބިފައިވަނީ 397 ފަރާތަކަށް.ހައުސިންގ އެންޑް ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބު
މިނިސްޓަރ ވިދާޅުވީ ޗެކްކުރި 4939 ފޯމުގެ ތެރެއިން ޝަރުތުހަމަވެ ފުލެޓް ލިބޭނެކަމަށް ކަނޑައަޅާފައިވާ އަދަދަށް ޕޮއިންޓް ލިބިފައިވަނީ 1820 ފަރާތަކަށް ކަމަށެވެ. އެހެންކަމުން މިހާރު އިއުލާންކުރެވޭ ލިސްޓުން ފުލެޓް ލިބޭނެކަމަށް ސީދާ ބަޔާންކޮށްފައިވާނީ 1820 މީހުންނަށް ކަމަށް މިނިސްޓަރ ވިދާޅުވިއެވެ. 2695 ފަރާތެއް ޝަރުތު ހަމަނުވާކަމަށް ކަނޑައެޅިފައިވާއިރު 424 ފަރާތެއް ޕޮއިންޓަށް އައި ބަދަލާއެކު ލިސްޓުން އުނިވެފައިވާ ކަމަށް މިނިސްޓަރ ވިދާޅުވިއެވެ.
މިނިސްޓަރު މުއްތަލިބު ވިދާޅުވީ 4000 ފުލެޓުގެ ލިސްޓުފެ ވެރިފިކޭޝަން ޕްރޮސެސް ކުރިއަށްގެންދިއުމުގައި 26 ޖޫން 2022 ގައި ގެޒެޓް ކުރެވުނު ގެދޮރުވެރިޔާ ސްކީމުގެ ސަަށުން އެކުލަވާލެވުނު އުސޫލަށް ބަލާފައިވާނެ ކަމަށެވެ. މީގެ އިތުރުން އެޕްލިކޭޝަން ހުށަހެޅުމަށް ހެދި ގެދޮރުވެރިޔާ ޕޯޓަލްގެ އިރުޝާދުތަކަށް ވެސް ބަލާފައިވާނެ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ އިއުލާންކުރެވުނީ 3 ކޮޓަރި ނަމަ 76 ޕޮއިންޓް ލިބޭ ފަރާތްތަކަށް ފުލެޓް ލިބޭނެކަމަށް ކަމަށާއި، 75 ޕޮއިންޓް ލިބޭ ފަރާތްތަކަށް 3 ކޮޓަރީގެ ގުރުއަތަށްދާނެކަމަށާއި، 75 ޕޮއިންޓުން މަތިން މާކްސް ލިބިފައިވާ ކަމަށް ލިސްޓުގައި ހިމަނާފައިވަނީ 3721 ފަރާތެއް ކަމަށެވެ. ތިންކޮޓަރީގެ އިމާރާތްކުރަމުންދަނީ 2750 ފުލެޓްކަމަށް މިނިސްޓަރު ވިދާޅުވިއެވެ.
އަދި އިމާރާތްކުރާ 2 ކޮޓަރީގެ ފުލެޓް ލިބޭނީ 73 ޕޮއިންޓް ލިބޭ ފަރާތްތަކަށް ކަމަށާއި، 73 ޕޮއިންޓުން މަތިން ލިބިފައިވާ 1218 ފަރާތެއް ލިސްޓުގައި ހިމެނިފައިވާ ކަމަށް މިނިސްޓަރު ވިދާޅުވިއެވެ. އަދި މިހާރު އިމާރާތްކުރަމުންދާ 4000 ޔުނިޓުގެ ޕްރޮޖެކްޓްގެ ދަށުން އިމާރާތްކުރެވެނީ 2 ކޮޓަރީގެ 1250 ފުލެޓްކަމަށް މިނިސްޓަރު ވިދާޅުވިއެވެ.
އަޅުގަނޑުމެންގެ ލިސްޓަށް އެއްވެސް ފަރާތެއް އިތުރުކުރުމަށް އެއްވެސް ވަރަކަށް އިތުރު ފޯމެއް ބަލާފައި ނުވާނެ. ލިސްޓުގައި ހިމެނޭ މި ދެންނެވި ވަރަށް ޕޮއިންޓް ލިބިފައިވާ ފަރާތްތަކުގެ ފޯމްތައް ބަލައި، ޝަރުތު ހަމަނުވާ ފަރާތްތަކާއި، އަދި ޕޮއިންޓް އުނިވެގެން ފުލެޓް ލިބޭ ވަރަށްވުރެ ދަށުން ފުލެޓް ލިބޭ ފަރާތްތައް، މި ޕްރޮސެސްގެ ތެރެއިން ވާނީ ފާހަގަކޮށް ފުލެޓް ނުލިބޭ ފަރާތްތައް ކަނޑައަޅާފައި. ވެރިފިކޭޝަން މަސައްކަތް ކުރެވުނީ ޕޯޓަލްގެ ތެރެއިންކަމަށްވުމާއި، ޕޯޓަލްއިން ހުށަހަޅާފައިވާ އެއްވެސް މައުލޫމާތެއް އަދި ލިޔެކިޔުމަކަށް ބަދަލު ގެނައުމުގެ ފުރުސަތު ފޯމް ޗެކްކުރި އެއްވެސް ފަރާތަކަށް ލިބިފައި ނުވާނެ. އަދި ފޯމު ހުށަހެޅި ފަރާތަށްވެސް ބަދަލުގެނައުމުގެ ފުރުސަތު ލިބިދީފައި ނުވާނެ.ހައުސިންގ އެންޑް ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބު
މިނިސްޓަރު ވިދާޅުވީ ވެރިފިކޭޝަން ކުރިއަށްގެންދިޔަ ލިސްޓުގައި ހިމެނެނީ ޖުމްލަ 4939 ފަރާތެއް ކަމަށެވެ. ވެރިފިކޭޝަންގެ ތެރެއިން 15 ނޮވެމްބަރުގައި އިއުލާންކުރެވުނު 3 ކޮޓަރީގެ ލިސްޓުން 75 ޕޮއިންޓް ނުލިބޭ އެއްވެސް ފަރާތެއްގެ ފޯމު ބަލާ ޗެކްކޮށްފައި ނުވާނެ ކަމަށް މިނިސްޓަރު ވިދާޅުވިއެވެ. އަދި 2 ކޮޓަރީގެ ލިސްޓުން 73 ޕޮއިންޓް ނުލިބޭ އެއްވެސް ފަރާތެއްގެ ފޯމު ޗެކްކޮށްފައި ނުވާނެ ކަމަށް މިނިސްޓަރ ވިދާޅުވިއެވެ.
