ސަރުކާރުން ބިލު ސްޕޮންސަރ ނުކުރީ ސަރުކާރުން ނުކުރާކަމެއްގެ ގޮތުގައި ދައްކާ ބައިނަލްއަގުވާމި ދުނިޔެއަށް އޮޅުވާލަން - މީކާއިލް
25 ފެބުރުއަރީ 2025 | އަންގާރަ 01:46ސުޕްރީމް ކޯޓުގައި މައްސަލަ ހިނގަމުންދަނިކޮށް ޖޭއެސްސީއަށް ބަދަލު ގެނެސް ފަނޑިޔާރުންނަށް ނުފޫޒު ފޯރުވަން ދަނީ މަސައްކަތް ކުރަމުން
ގަލޮޅު ދެކުނު ދާއިރާގެ މެންބަރު މީކައިލް އަހުމަދު ނަސީމް ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަނީ | ރާއްޖެއެމްވީ
ސުޕްރީމް ކޯޓުގެ ފަނޑިޔާރުންގެ އަދަދު ބަދަލު ކުރަން މަޖިލިހަށް މެންބަރު އަމިއްލައަށް ބިލު ހުށަހެޅީ ސަރުކާރުން ކުރާކަމެއް ނޫންކަމެއްކަން ދައްކާ ބައިނަލްއަގުވާމީ ދުނިޔެއަށް އޮޅުވާލަންވެގެން ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.
ރާއްޖެޓީވީގެ ފަަލަސުރުހީ ޕްރޮގްރާމުގައި ވާހަކަ ދައްކަވަމުން މީކާއިލް ވިދާޅުވީ ސަރުކާރުން ބޭނުންވެގެން ސަރުކާރުގެ ފަރާތުން ބިލެއް ސްޕޮންސަރ ކުރާނީ ސަރުކާރުގެ މެންބަރެއް ކަމަށެވެ. އެއާއި ހިލާފަށް ކޯޓުތަކާއި ބެހޭ ބިލު ހުށަހަޅާފައިވަނީ ސަރުކާރަށް ނިސްބަތްވާ މެންބަރެއް އަމިއްލަ ގޮތަށް ހުށަހެޅުއްވި ބިލެއްގެ ގޮތުގައި ކަމަށާއި، މެންބަރު އެ ބިލު އަމިއްލަ ގޮތުން ހުށަހެޅީ ކީއްވެގެންކަން ބަލާލަން ޖެހޭ ކަމަށެވެ.
މީކާއިލް ވިދާޅުވީ ސަރުކާރުން ބޭނުން ވެގެން ތުޅާދޫ ދާއިރާގެ މެންބަރު މީޑިއާގެ ހައްގުތައް ހަނިކުރުމަށާއި ދުލާއި ގަލަމުގެ ހައްގު ހަނިކުރަން މީޑިއާ ކޮމިޝަނެއް އުފައްދަން މަޖިލީހަށް ހުށަހެޅި ބިލުވެސް ޕްރެޝަރު ބޮޑުވެގެން ބޭރުކޮށްލި ކަމަށާއި، ކޯޓުތަކުގެ ބިލު ވެސް ހުށަހެޅީ އެފަދަ މަގުސަދެއްގައި ކަމަށެވެ. އެގޮތުން މެންބަރު އަމިއްލަ ގޮތުން ހުށަހަޅަނީ ސަރުކާރުން ކުރާކަމެއް ނޫންކަން ބައިނަލްއަގުވާމީ ދުނިޔެއަށް އޮޅުވާލުމަށް ކަމަށެވެ.
އަޅުގަނޑު ހިތަށް އަރާ ސަރުކާރަށް ނިސްބަތްވާ ބޭފުޅުން އެހާވެސް ވިސްނުންފުޅު ކޮށީތޯއޭ، ބައިނަލްއަގުވާމީ ދުނިޔެއަށް، ސަރުކާރުން ބޭނުން ވެގެން ސަރުކާރުގެ އެމްޕީއެއްލައްވާ ކުރުވާ ކަމެއް އެއީ އެބޭފުޅުންގެ ކަމެއް ނޫންކަމަށް ދެއްކޭނެކަމަށް އެބޭފުޅުންނަށް ހީވަނީތޯއޭ އަޅުގަނޑު ހިތަށް އަރާ. ދެވަނަ ކަމަކަށް މިވަގުތު ސުޕްރީމް ކޯޓުގައި މަޖިލީހުން 9 ގަޑި އިރު ތެރޭގައި ފާސްކުރި ޣައިރު ދުސްތޫރީ ބައެއް އިސްލާހުތަކުގެ މައްސަލަ ސުޕްރީމް ކޯޓުގައި ހިނގަ ހިނގާ އޮއްވާ، އެ ކޯޓުގެ ބެންޗު ކުޑަވާނެގޮތަށް އަދި މަސައްކަތަށް ނުފޫޒު ފޯރުވޭނެ ގޮތަށް ބިލެއް ހުށަހެޅީ ސީދާ ކޯޓަށް އަތްބާނަން.ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މީކާއިލް ވިދާޅުވީ ސުޕްރީމް ކޯޓަށް ހުށަހެޅި މައްސަލައާއި ގުޅިގެން ކުރިއަށްދާން އެ ކޯޓުން ނިންމީ 18 ފެބްރުއަރީގައި ކަމަށާއި، އެއަށްފަހު ފެނިގެންދިޔައީ މަޖިލީހުގެ ބައެއް މެންބަރުންނާއި، ޕީއެންސީގެ ބައެއް ފަރާތްތަކުން ސުޕްރީމް ކޯޓުގެ ބައެއް ފަނޑިޔާރުންނާއި ދެކޮޅަށް ކެމްޕޭނެއް ކުރިތަން ކަމަށެވެ. އޭގެ ފަހުން ޕީއެންސީގެ ޕީޖީއަށް ރައީސް އެންގެވީ ސުޕްރީމް ކޯޓުގެ ފަނޑިޔާރުންނާއި ދެކޮޅަށް ގަރާރާއި ކުއްލި މައްސަލަ ހުށަހެޅުއްވުމަށް ކަމުގެ މައުލޫމާތު ލިބިފައިވާ ކަމަށް މީކާއިލް ވިދާޅުވިއެވެ.
މީކާއިލް ވިދާޅުވީ އޭގެ ފަހުން ޖެހިގެން އައި ދުވަހު ފެނިގެންދިޔައީ ޖުޑީޝަލް ސަރވިސް ކޮމިޝަންގެ މެންބަރަކު ކުއްލިގޮތަކަށް ބަދަލުކުރިތަން ކަމަށެވެ. އަދި އެ މަގާމަށް ރައީސް އައްޔަންކުރެއްވި ބޭފުޅަކީ ނިމިގެންދިޔަ މަޖިލިސް އިންތިހާބުގައި ވިލިނގިލި ދާއިރާއަށް ޕީއެންސީގެ ޓިކެޓުގައި ވާދަކުރެއްވި ކެންޑިޑޭޓް ކަމަށާއި، އެހެންކަމުން ޖޭއެސްސީ މިނިވަންވެ، އެތަން މުސްތަގިއްލުވާނެ މިންވަރު މިކަމުން އެކަނިވެސް ފެނިގެންދާ ކަމަށެވެ.
މީކާއިލް ވިދާޅުވީ މި ހުރިހާ ކަމަކީވެސް ސަރުކާރުން ބޭނުންވާ ގޮތަށް ނޫނީ ސުޕްރީމް ކޯޓުން ހުކުމް ނާންނާނެ ގޮތަށް ކަންކަން ކުރުމަށް ރޭވިގެން ކުރަމުންދާ ކަމެއް ކަމަށެވެ.
