ސިޓީގެ ދަނޑުގައި މޮޅުވެ ލިވަޕޫލަށް ލީޑު

އިނގިރޭސި ޕްރިމިއަރ ލީގުގައި އެންމެ ފަހުގެ ޗެމްޕިއަން މެންޗެސްޓަރ ސިޓީއާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން ލީގު ތާވަލްގެ އެއް ވަނައިގައި ލީޑު ފުޅާ ކޮށްފި އެވެ.

ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި އެ ޓީމާ ދެކޮޅަށް ކުޅުނު މެޗުން ލިވަޕޫލް މޮޅުވީ 2-0 އިންނެވެ. މެޗުގައި ލިވަޕޫލް އިން އެ ޓީމުގެ ދެ ލަނޑު ވެސް ޖެހީ ފުރަތަމަ ހާފުގަ އެވެ.

މެޗު ފަށައިގެން ސާދަ ވަނަ މިނެޓުގައި ލިވަޕޫލް އިން ވަނީ ސިޓީ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ލިވަޕޫލަށް ޖަހައިދިނީ މިޞްރުގެ ފޯވާޑު މުޙައްމަދު ޞަލާޙު އެވެ. އެ ލަނޑު ޖަހަން އޭނާ އަށް ފުރުސަތު ތަނަަވަސްކޮށްދިނީ ޑޮމިނިކް ސޮބޮސްލާއީ އެވެ.

މެޗުގެ ފުރަތަމަ ހާފު ނިމުމުގެ ކުރިން ލިވަޕޫލް އިން ވަނީ ދެ ވަނަ ލަނޑެއް ޖަހައި ލީޑު ފުޅާ ވެސް ކޮށްފަ އެވެ. ފުރަތަމަ ހާފުގެ 37 ވަނަ މިނެޓުގައި އެ ޓީމުގެ ލީޑު ފުޅާ ކޮށްދިނީ ސޮބޮސްލާއީ އެވެ. އެއީ ޞަލާޙު ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން މެޗުގެ ދެ ވަނަ ހާފުގައި ލިވަޕޫލް އިން ތިން ވަނަ ލަނޑެއް ވެސް ޖެހި އެވެ. ދެ ވަނަ ހާފު ފަށައިގެން އެގާރަ ވަނަ މިނެޓުގައި ލިވަޕޫލްގެ ކާޓިސް ޖޯންސް ޖެހި ލަނޑު، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ ބަލައި ނުގަންނަން ނިންމައިފަ އެވެ.

ސިޓީ އަތުން ހޯދި މޮޅާއެކު، ލިވަޕޫލް އިން ވަނީ އެއް ވަނައިގައި އެގާރަ ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 27 މެޗުން ލިވަޕޫލަށް ލިބެނީ 64 ޕޮއިންޓެވެ. ލިވަޕޫލަށް ވުރެ އެއް މެޗު މަދުން ކުޅެގެން ދެ ވަަނައިގައި އާސެނަލަށް ލިބެނީ 53 ޕޮއިންޓެވެ.

މިިއީ މި ސީޒަންގެ ލީގުގައި ސިޓީ ބަލިވި އަށް ވަނަ މެޗެވެ. މިހާތަނަށް 26 މެޗު ކުޅެފައިވާއިރު، ސިޓީ މޮޅުވެފައި ވަނީ 13 މެޗުންނެވެ. އަށް މެޗުން ބަލިވެފައިވާއިރު، ފަސް މެޗުން ވަނީ އެއްވަރުވެފަ އެވެ. މިއީ ސިޓީގެ ކޯޗުކަމާ ޕެޕް ގާޑިއޯލާ ހަވާލުވީ ފަހުން، އެ ޓީމުގެ ނަތީޖާތައް އެންމެ ދަށްވި ސީޒަނެވެ.