ރާއްޖޭގެ ފުޓުބޯޅަ ސީޒަން ފެށުން، ކުރިއަށް އޮތް ރަމަޟާން މަހުގެ ފަހަަށް ފަސްކޮށްފި އެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒިން ކޮމެޓީން ނިންމާފައި އޮތީ މި މަހު ފުޓުބޯޅަ ސީޒަން ފެށުމަށެވެ. ސީޒަން ފެށުމުގެ ގޮތުން ކުޅޭ ޗެރިޓީ ޝީލްޑު މެޗު ތާވަލުކޮށްފައި އޮތީ މި މަހުގެ 24 ވަނަ ދުވަހަށެވެ. އަދި އޭގެ ފަހުން މި މަހުގެ 26 ވަނަ ދުވަހު ޕްރެޒިޑެންޓްސް ކަޕް ފުޓުބޯޅަ މުބާރާތް ފަށާ ގޮތަށް އޮތީ ތާވަލުކޮށްފަ އެވެ. އެގޮތަށް ނިންމީ ވެސް އެކި ފަހަރުގެ މަތިން ކުލަބުތަކާ މަޝްވަރާ ކުރުމަށްފަހު އެވެ.

އޭގެ ފަހުން މި މަހު ފުޓުބޯޅަ ސީޒަން ފަށަންވާއިރަށް ކުލަބުތަކުގެ މާލީ ޙާލަތު ރަނގަޅު ނުވާތީ، ކުލަބުތަކުން އެދުނީ ސީޒަން ފެށުން ފަސްކޮށްދިނުމަށެވެ. އަދި ޕްރެޒިޑެންޓްސް ކަޕް ފުޓުބޯޅަ މުބާރާތް ސީޒަންގެ ފަހު ކޮޅަށް ބަދަލު ކޮށްދިނުމަށެވެ.

ކުލަބުތަކުގެ ކަންބޮޑުވުންތައް ނޯމަލައިޒިން ކޮމެޓީއާ ހިއްސާކޮށްފައި ވަނިކޮށް، މިހާރު އެ ކޮމެޓީން ނިންމާފައި ވަނީ އޭޕްރީލް މަހުގެ އަށް ވަނަ ދުވަހު ޗެރިޓީ ޝީލްޑު މެޗު ކުޅުމަށެވެ. އަދި އޭގެ ފަހުން އޭޕްރީލް މަހުގެ 10 ވަނަ ދުވަހު ދިވެހި ޕްރިމިއާ ލީގުގެ ކުޅުން ފެށުމަށެވެ.

ޗެރިޓީ ޝީލްޑު މެޗަށްފަހު ކުރިން ތާވަލުކޮށްފައި އޮތް ޕްރެޒިޑެންޓްސް ކަޕް މިހާރު އޮތީ އޮކްޓޫބަރު މަހުގެ 20 ވަނަ ދުވަހު ފަށަން ތާވަލުކޮށްފަ އެވެ.

ތިން ވަނަ ޑިވިޝަންގެ ފުޓުބޯޅަ މުބާރާތް ފަށާނެ ތާރީޚަކަށް ހަމަޖައްސާފައި އޮތީ ޖޫން މަހުގެ އެއް ވަނަ ދުވަހެވެ. އޭހެ ފަހުން ޖުލައި މަހުގެ 12 ވަނަ ދުވަހު އެފްއޭ ކަޕް ކުޅުމަށް ވަނީ ތާވަލުކޮށްފަ އެވެ. އަދި ޖުލައި 18 ވަނަ ދުވަހު ދެ ވަނަ ޑިވިޝަން ފުޓުބޯޅަ މުބާރާތް ފެށުމަށް ވަނީ ހިމަނައިފަ އެވެ.

މީގެ އިތުރުން ކުރިއަށް އޮތް މާޗު މަހުގެ ތެރޭގައި ބައިނަލްއަޤުވާމީ ރަޙުމަތްތެރިކަމުގެ މެޗެއް ކުޅުމަށް ވެސް ރާއްޖެ އިން ވަނީ ނިންމައިފަ އެވެ. އެ މެޗުގައި މާޗު މަހުގެ 19 ވަނަ ދުވަހު ރާއްޖެ އިން ނިކުންނާނީ އަވައްޓެރި އިންޑިއާއާ ދެކޮޅަށެވެ.

ސީޒަން ފެށުމަށް މީގެ ކުރިން ވެސް ނޯމަލައިޒިން ކޮމެޓީން ވަރަށް ބޮޑަށް މަސައްކަތް ކުރި ނަމަވެސް، ކުލަބުތަކުގެ މާލީ މައްސަލަ ޙައްލު ނުވާތީ، ކުލަބުތަކުން ވަނީ ސީޒަން ފެށުމަށް ދެކޮޅު ހަދައިފަ އެވެ. އޭގެ ފަހުން ސަރުކާރުން މިހާރު ވަނީ ކުލަބުތަކަށް މާލީ ގޮތުން އެހީތެރިކަން ފޯރުކޮށްްދޭން ނިންމައިފަ އެވެ.

އެގޮތުން ކޮންމެ ކުލަބަކަށް 1.5 މިލިއަން ރުފިޔާ ދިނުމަށް ސަރުކާރުން ވަނީ ނިންމައިފަ އެވެ. އަދި އޭގެ ތެރެެެއިން ފުރަތަމަ ޕޭމަންޓުގެ ގޮތުގައި 500،000 (ފަސް ލައްކަ) ރުދިޔާ މިދިޔަ ހަފުތާގެ ތެރޭގައި ވަނީ ޖަމާކޮށްދީފަ އެވެ.

ކަންބޮޑުވުންތައް އިތުވެފައި ވަނިކޮށް، މިދިޔަ ބުރާސްފަތި ދުވަހު ކުޅިވަރު ވަޒީރު ޢަބްދުﷲ ރާފިޢު ވަނީ ކުލަބުތަކާ ބައްދަލު ވެސް ކުރައްވައިފަ އެވެ.