އަންނަ ރަމަޟާން މަހަށް ސަރުކާރުން ހިލޭ ބަހަން ނިންމާފައިވާ މަސްދަޅު ކޭސްތައް މާލެ ސަރަހައްދުގައި ބަހަން ފަށަން މާލެ ސިޓީ ކައުންސިލުން ތައްޔާރުވެފައި ވަނިކޮށް، މަސްދަޅު ކޭސްތައް ބެހުން ސަރުކާރުން އެ ކައުންސިލަށް މަނާކޮށްފި އެވެ.

މާލެ ސިޓީ ކައުންސިލުން ބުނީ ސަރުކާރުން އެގޮތަށް އަމަލުކުރީ މަސްދަޅު ކޭސްތައް ބެހުމަށް އެންމެ ވާންޖެހޭ އެންމެ ފަހުގެ ތައްޔާރީތައްވެސް ވެ ނިމިފައި ވަނިކޮށް އެންމެ ފަހު ވަގުތުކަމަށެވެ.

އެގޮތުން މާލެއާއި ހުޅުމާލޭގައި ވެސް މަސްދަޅުތައް ބެހުމަށް ގިނަ ތައްޔާރީތަކެއް ސިޓީ ކައުންސިލުން ވެފައިވާ ކަމަށާއި މަސްދަޅުތައް ދޫކުރަން ހަމަޖެހިފައިވާ ތަންތަނުގައި ވެފައި ހުރި ތައްޔާރީތައް ބައްލަވާލެއްވުމަށް މާލޭ ސިޓީ ކައުންސިލްގެ މޭޔަރު އާދަމް އާޒިމްވެސް ވަޑައިގެން ބައްލަވާލެއްވި ކަމަށް އެ ކައުންސިލުން ބުނެފައިވެއެވެ.

އަދި އޭގެ ފަހުން މަސްދަޅުތައް ބެހުމަށް ހަމަޖެހިފައިވާ ގަޑިތަކާއި ތަން އެނގޭގޮތަށް ޓްވީޓުގައި ޕޯސްޓެއްވެސް ކުރައްވާފައިވާ ކަމަށާއި އަދި އެ ޓްވީޓުގައި ވެސް އެއީ ރައީސް ޑރ، މުޙައްމަދު މުއިއްޒު ރަމަޟާން މަހާއި ދިމާކޮށް ރައްޔިތުންނަށް ބަހާ މަސްދަޅުކޭސްތަކެއް ކަން އެނގޭ ގޮތަށް ލިޔެފައިވާނޭ ކަމަށް ވެސް މާލެ ސިޓީ ކައުންސިލުން ބުންޏެވެ.

ސިޓީ ކައުންސިލުން ބުނީ ރޭގެ އެންމެ ފަހުވަގުތާޖެހެންދެން ވެސް ކަންތައް ދިއައީ ރޭވިފައި އޮތް ގޮތަށް ވަރަށް ރަނގަޅަށް ކަމަށާއި ނަމަވެސް މަސްދަޅު ކޭސްތައް ބަހަން ތައްޔާރުވެ، އިއުލާނު ވެސް ކޮށްފައި ވަނިކޮށް ކުއްލިއަކަށް ގުޅާފައި މަސްދަޅުކޭސްތައް ބަހާނީ އެސްޓީއޯ އިންކަމަށް ސަރުކާރުން އެންގިކަމަށެވެ.

އަދި މިފަދައިން ސަރުކާރުން އަމަލުކޮށް ކުރިން ރޭވިފައި އޮތް ގޮތާއި ޚިލާފަށް މަސްދަޅު ކޭސްތައް ބެހުމުގެ މަސައްކަތް އެހެން ގޮތަކަށް ކުރަން ނިންމައި ގަޑި ބަދަލު ކުރުމަކީ ރައްޔިތުންނަށް ޖެއްސި ބޮޑު ތަކުލީފެއް ކަމަށް ވެސް ސިޓީ ކައުންސިލުން ވަނީ ބުނެފައެވެ.

މާލެ ސަރަހައްދުގައި ދިރިއުޅޭ ރައްޔިތުންނަށް މަސްދަޅު ކޭސްތައް ބެހުމުގެ މަސައްކަތް ކުރާ ގޮތަށް އޮތީ އެ މާލެ ސިޓީ ކައުންސިލާއި މިފްކޯގެ އިތުރުން އެސްޓީއޯ ގުޅިގެންނެވެ. ނަމަވެސް މަސްދަޅު ކޭސްތައް ސިޓީ ކައުންސިލުގެ އެއްވެސް ތަނަކުން ބަހައިގެން ނުވާނެ ކަމަށް އެންގީ ބުރާސްފަތު ދިވަހު ހެނދުނުއެވެ.

ސިޓީ ކައުންސިލުން ބުނީ ސަރުކާރުން މިގޮތަށް އަމަލުކުރުމަކީ ވަރަށް ކަންބޮޑުވާ ކަމެއް ކަމަށާއި އަދި މިއީ ސަރުކާރުން ރައްޔިތުންނަށް ޖެއްސި ބޮޑު ތަކުލީފެއް ކަމަށެވެ.

މާލެ ސަރަހައްދުގައި ދިރިއުޅޭ ރައްޔިތުންނަށް މަސްދަޅު ކޭސް ބަހަން ފަށަން ކުރިން އިއުލާނު ކޮށްފައި އޮތީ ބުރާސްފަތި ދުވަހު މެންދުރުފަހު 2:30 ގައި މާލެ ސިޓީ ކައުންސިލުންނެވެ. ނަމަވެސް ކުއްލިއަކަށް އެކަން ބަދަލުކޮށް، މަސްދަޅު ކޭސްތައް ބަހަން ފަށާ ގަޑި މިހާރު ވަނީ ރޭގަނޑު 8:30 އަށް ބަދަލުކޮށްފަ އެވެ.

އެސްޓީއޯ އިން ބުނީ، ބުރާސްފަތި ދުވަހުގެ ރޭ 8:00 އިން ފެށިގެން އެ ރޭ 11:00 އާ ހަމައަށް މަސްދަޅު ކޭސް ބެހުން ކުރިއަށް ދާނެ ކަމަށެވެ.

ކޮންމެ ގޭބީސީއަކަށް ވެސް ދޫކުރަނީ 48 ދަޅުގެ މަސްކޭހެވެ. މަސްދަޅު ބަހަނީ ކަރަންޓު މީޓަރު ނަންބަރަށެވެ. ގާތްގަނޑަކަށް ރާއްޖޭގެ 80،000 އަށް ވުރެ ގޭބީސީތަކަށް މަސްދަޅު ބަހާނެ އެވެ.

މަސްދަޅު ބެހުމަށް ހަމަޖެހިފައިވާ ތަންތަނަކީ މިފްކޯގެ އޮފީސް ކޮމްޕައުންޑް، ހެންވޭރު އެމްޓީސީސީ ސޯމިލް،ވިލިމާލެ، ވެމްކޯ ސައިޓް އަދި ހުޅުމާލެ، އުމަރު ޒާހިރު ބިލްޑިންގެ އިތުރުން ހިޔާ ޓަވަރު 10، ޔޫތު ސެންޓަރުގައެވެ.

ބުރާސްފަތި ދުވަހުގެ ރޭ މަސް ދަޅު ބެހުން ކުރިއަށް ގެންދާއިރު، ހުކުރު ދުވަހު މަސް ދަޅު ބެހުން ކުރިއަށް ނުގެންދާނެ އެވެ. ދެން މަސްދަޅު ބެހުން ކުރިއަށް ދާނީ ހޮނިހިރު ދުވަހު ހެނދުނު 10:00 އިން ހަވީރު 16:00 އަށެވެ. އަދި ރޭގަނޑު 20:30 އިން 23:00 އަށެވެ.

އާދިއްތަ އިން ބުރާސްފަތި ދުވަހުގެ ނިޔަލަށް މަސްދަޅު ބަހާނީ މެންދުރު ފަހު 14:30 އިން 18:00 އަށް އަދި ރޭގަނޑު 20:30 އިން 23:00 އަށެވެ.

އެސްޓީއޯ އިން ބުނީ، އިތުރު ސަރަހައްދުތަކުން މަސްދަޅު ކޭސް ދޫކުރާ ނަމަ، އެކަންކަން އިއުލާނު ކުރަމުން ދާނެ ކަމަށެވެ.

ރޯދަ މަހަށް ހާއްސަކޮށް ރާއްޖޭގެ ކޮންމެ ގޭބިސީއަކަށް މަސްދަޅު ކޭހެއް ދިނުމަށް ނިންމެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.