ކޮންކާކަފް ޗެމްޕިއަންސް ލީގުގެ ފުރަތަމަ ބުރުގައި ސްޕޯޓިން ކޭސީއާ ދެކޮޅަށް ކުޅުނު މެޗުން އިންޓަރ މިއާމީ މޮޅުވެއްޖެ އެވެ.

ކޮންކާކަފް ޗެމްޕިއަންސް ލީގުގެ ފުރަތަމަ ބުރުގެ ފުރަތަމަ ލެގުގައި ބުރާސްފަތި ދުވަހުގެ ފަތިހު ސްޕޯޓިން ކޭސީއާ ދެކޮޅަށް ކުޅުނު މެޗު އިންޓަރ މިއާމީން ކާމިޔާބު ކުރީ 1-0 އިންނެވެ. މެޗުގައި މިއާމީން ލަނޑު ޖެހީ ވެސް ދެ ވަނަ ހާފުގަ އެވެ.

މެޗުގައި މިއާމީން ވަނީ ރަނގަޅަށް ކުޅެ، ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. މެޗުގެ ހަތް ވަނަ މިނެޓުގައި މިއާމީގެ ލުއިސް ސުއަރޭޒް އަށް ލިބުނު ފުރުސަތެއްގައި އޭނާ ފޮނުވާލި ބޯޅަ ދިޔައީ، ގޯލުގެ އަރިމަތީ ދަނޑި ކައިރިން ބޭރަށެވެ.

އޭގެ ފަހުން ފުރަތަމަ ހާފުގެ 34 ވަނަ މިނެޓުގައި ސްޕޯޓިން ކޭސީގެ އޭރިޔާ ބޭރުން ސުއަރޭޒް ފޮނުވާލި ބޯޅަ ވެސް ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ. ފުރަތަމަ ހާފުގެ ފަހު ވަގުތު މިއާމީގެ ކެޕްޓަން ލިއޮނަލް މެސީ ފޮނުވާލަން މަސައްކަތް ކުރި ބޯޅަ ބްލޮކުވީ، ސްޕޯޓިން ކޭސީގެ ޑިފެންޑަރެއްގެ ގައިގައި ޖެހިފަ އެވެ.

މެޗުގެ ދެ ވަނަ ހާފު ފަށައިގެން ދިހަ ވަނަ މިނެޓުގައި މިއާމީން ވަނީ ލަނޑު ޖަހައި ލީޑު ނަގައިފަ އެވެ. މިއާމީގެ ސަޖިއޯ ބުސްކެޓްސް ހުރަސްކޮށްދިން ފުރުސަތެއްގައި ލިބުނު ބޯޅަ މެއިން ކޮންޓްރޯލްކޮށްލައި، ޑިފެންޑަރެއް ކައިރިން ނައްޓައި މެސީ ފޮނުވާލި ބޯޅަ އަމާޒުވީ ގޯލުގެ ތިރީ ކަނަށެވެ.

އޭގެ ފަހުން ވެސް މިއާމީން ވަނީ މެޗުގައި ލީޑު ފުޅާ ކުރާނެ ފުރުސަތުތަކެއް ތަނަވަސްކޮށްފަ އެވެ. ފުރަތަމަ ލެގުން މިއާމީ މޮޅުވެފައިވާއިރު، މި ދެ ޓީމު ބައްދަލު ކުރާ ދެ ވަނަ ލެގު އޮންނާނީ ފެބްރުވަރީ މަހުގެ 26 ވަނަ ދުވަހު އެވެ.