އެއް އަންހެނެއްގެ 3 ފިރިން ތިބޭ ކަމަށް ބުނާ މައްސަލައެއް ފެންމަތިވެއްޖެ
19 ފެބުރުއަރީ 2025 | ބުދަ 18:19ރާއްޖޭގެ ގަވާއިދުތަކަށް ފިލަން ވެގެން ބޭރުގެ ގައުމުތަކަށް ގޮސް ކައިވެނިކުރާ މައްސަލަތައް އިތުރުވެފައިވާކަން ކޯޓުން ފާހަގަކުރި
ފެމިލީ ކޯޓު: އެއް އަންހެނަކު 3 ފިރިން ގެންގުޅޭ މައްސަލައެއް ވަނީ ފެންމަތިވެފައި
ދިވެހި އަންހެނެއްގެ ތިން ފިރިން ތިބި މައްސަލައެއް ދިމާވެފައިވާ ކަމަށް ފެމިލީ ކޯޓުން ބުނެފި އެވެ.
މިކަން ހާމަވީ އާއިލާއާ ބެހޭ ގަވާއިދަށް ރައްޔިތުންގެ މަޖިލީހުގެ ގަވާއިދު ކޮމިޓީއަށް ހުށަހަޅާފައިވާ މައްސަލައަަކާ ގުޅިގެން ފެމެލީ ކޯޓު ހިމެނޭހެން ގިނަ އިދާރާތަކެއް ހާޒިރުކޮށް ކުރިއަށް ދިޔަ ބައްދަލުވުމެއްގައެވެ.
ރައްޔިތުންގެ މަޖިލީހުގެ ގަވާއިދު ކޮމިޓީގައި އާއިލާއާ ބެހޭ ގަވާއިދާ ގުޅޭގޮތުން ފެމިލީ ކޯޓުން ހުރި ކަންބޮޑުވުންތައް ވަނީ މިކަމުގައި ފާހަގަކޮށްފަ އެވެ.
އެ ގޮތުން ދަރިންގެ ހަރަދު ދޭން ގާނޫނާއި ގަވާއިދަށް ފިލަން ބޭރުގެ ގައުމުތަކުގައި ކައިވެނިކުރާ މައްސަލަތަކާއި ކައިވެނިތައް ކޯޓުގައި ރަޖިސްޓްރީ ނުކުރާ މައްސަލަ ކަންބޮޑުވާ މިންވަރަކަށް އިތުރުވަމުންދާ ކަމަށް ކޯޓުގެ އޮފިޝަލުން ބުންޏެވެ.
އެ ކޮމިޓީގައި ފެމެލީ ކޯޓުގެ ލީގަލް އޮފިސަރު އަހުމަދު މައުސޫމް ވިދާޅުވީ އެ އަންހެން މީހާ 3 ކައިވެނިވެސް ކޮށްފައިވަނީ ރާއްޖެއިން ބޭރުގައި ކަމަށެވެ.
މައުސޫމް ވިދާޅުވީ މި ހުރިހާ ކައިވެންޏެއްގެ ލިޔެކިޔުންވެސް ފެންނަން އެބަހުރި ކަމަށާއި ފުރަތަމަ ދެ ކައިވެންޏަށް ގޮތެއް ނުނިންމާ އޮއްވާ ތިންވަނަ ކައިވެންޏެއް ކުރީ ކަމަށެވެ.
އޭނާ ވިދާޅުވީ މިއީ ވަރަށް ނުރައްކާތެރި ކަމެއްކަމަށާއި މިއީ ނަސަބުވެސް އޮޅިގެން ހިނގައިދާނެ ކަމެއް ކަމަށެވެ. އަދި މިއީ މުޖުތަމައު ތެރޭ ނޭދެވޭ ވަރަށް ގިނަ ކަންތައްތަކެއް އުފެދިގެން ހިނގައިދާނެ ކަމެއް ކަމަށް ވެސް މައުސޫމް ވިދާޅުވި އެވެ.
ރާއްޖޭގެ ގަވާއިދުތަކަށް ފިލަން ވެގެން ބޭރުގެ ގައުމުތަކަށް ގޮސް ކައިވެނިކުރާ މައްސަލަތައް އިތުރުވެފައިވާކަން ކޯޓުން ފާހަގަކޮށްފައި ވާއިރު، އެކަމުން މައްސަލަތައް ކުރިމަތިވެ، އެފަދަ މައްސަލައެއް ހައިކޯޓުގައި ހިނގަމުންދާ ކަންވެސް ކޯޓުން ފާހަގަކުރިއެވެ.
ބޭރުގައި ކައިވެނިކުރާނަމަ ހުއްދަ ނަގަން ޖެހޭ ކަމުގައިވިޔަސް ހުއްދަ ނުނަގާ ކައިވެނި ކުރުންވެސް ވަނީ އިތުރުވެފަ އެވެ. އޭގެ ސަބަބުން ނަސަބުއޮޅޭ ކަމަށް މައުސޫމް ވިދާޅުވި އެވެ.
މިފަދަ އިތުރު މައްސަލަތަކެއްވެސް އެބައުޅޭ ކަމަށް ވެސް މައުސޫމް ވިދާޅުވިއެވެ. އެހެން ނަމަވެސް އެ މައްސަލަތަކުގެ ތަފުސީލެއް އޭނާ ނުދެއްވަ އެވެ.
