ސަރުކާރުން ދޫކުރާ މަސްދަޅުތަކަށް 64 މިލިއަނަށް ވުރެ ގިނަ ރުފިޔާ، އަދިއެއްކޮށް ޕޭމަންޓު ދައްކާފައިނުވޭ

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާއި އެއްގޮތަށް މި ރޯދަމަހު ގޭބިސީތަކަށް ދޫކުރާ މަސްދަޅުތަކަށް 64 މިލިއަނަށް ވުރެ ގިނަ ރުފިޔާ ހަރަދުކޮށްފިއެވެ.

އިތުބާރު ހުރި ފަރާތަކުން ރާއްޖެއެމްވީއަށް ވިދާޅުވީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން އޯޑަރު ދީފައިވަނީ 85،000 މަސްދަޅު ކޭހަށް ކަމަށެވެ. 48 ދަޅު ހިމެނޭ މަސްދަޅު ކޭހެއް ވިއްކަނީ 760 ރުފިޔާއަށް ކަމަށާއި، ޖުމްލަ 64 މިލިއަން ހަ ލައްކަ ރުފިޔާ ހަރަދުވާ ކަމަށެވެ. އަދި އަގުބޮޑުވެފައިވަނީ މަސްދަޅުގައި ޖަހާފައިވާ ލޭބަލްއާ ގުޅިގެން ކަމަށެވެ.

މިފްކޯއިން އެސްޓީއޯއަށް ދޫކޮށްފައިވަނީ މަސްދަޅު ކޭސްތަކުގެ ތެރެއިން އެއްބައެވެ. އޭއީ އެސްޓީއޯއިން ޕޭމަންޓުގެ އެއްބައި ދެއްކުމުން ކަމަށާއި، އެނެއްބައި ޕޭމަންޓް ނުދައްކާ ކަމަށް އޭނާ ވިދާޅުވިއެވެ. އަދި ފައިސާ ހަމަޖެހުނުހާ އަވަހަށް އެފައިސާ ދައްކާނެ ކަމަށް ވެސް އަންގާފައިވާ ކަމަށް އޭނާ ވިދާޅުވިއެވެ.

ސަރުކާރުން ދޫކުރާ މަސްދަޅު

ސަރުކާރުން ދޫކުރާ މަސްދަޅުތަކުގައި ސަރުކާރުގެ ޕާޓީ ޕީއެންސީގެ ކުލަ ހިމެނޭ ލޭބަލްއާއެކު ރަމަޟާން ކަރީމް ޖަހާފައިވެއެވެ. އަދި ދައުލަތުގެ ނިޝާން ޖަހާފައިވެއެވެ.

48 ދަޅު ހިމެނޭ މަސްދަޅު ކޭހެއް ހޯލް ސޭލްކޮށް އާއްމު ގޮތެއްގައި ވިއްކަނީ 700 ރުފިޔާއާއި، 730 ރުފިޔާގެ ދެމެދުގެ އަގެއްގައެވެ.

ރާއްޖޭގެ އިގްތިސާދު ވަރަށް ބޮޑަށް ދަށްވާ ކަމަށް ސަރުކާރުން ބުނެ، ބައެއް ފިޔަވަޅުތައް އަޅަމުންދާއިރު، އަގުބޮޑުކޮށް މަސްދަޅު ކޭސްތަކަށް އޯޑަރު ދިން މައްސަލައާ ގުޅިގެން ރަސްމީކޮށް އެސްޓީއޯގެ ބަހެއް ވަނީ ލިބޭގޮތް ނުވެފައެވެ. އަދި ސަރުކާރުގެ ބަހެއްގެ ވެސް ވަނީ ލިބޭ ގޮތް ނުވެފައެވެ.

މިމަހުގެ 10 ވަނަ ދުވަހު އަތޮޅުތެރެއަށް މަސްދަޅު ކޭސްތައް ބަހަން ފަށާފައިވާއިރު، މިމަހުގެ 20 ވަނަ ދުވަހު މާލެސިޓީގައި މަސްދަޅު ކޭސްތައް ދޫކުރާނެއެވެ.

ސަރުކާރުން ވަނީ މިދިޔަ އަހަރުގެ ރޯދަ މަހު ވެސް ހިލޭ ހަނޑޫ އަދި ފުށް ބަސްތާ ދޫކޮށްފައެވެ.