ބޭރު ޤައުމުތަކަށް އައްޔަންކުރާ ސަފީރުންނަކީ ޗުއްޓީ ހޭދަކުރާ ބީދައން ވަޒީފާ އަދާކުރާ ބަޔަކަށް ވެގެން ނުވާނެ - އައްބާސް

ބޭރު ޤައުމުތަކާއި ޖަމިއްޔާތަކަށް ރާއްޖެއިން އައްޔަންކުރާ ސަފީރުންނަކީ އާއިލާ ގޮވައިގެން ޤައުމުތަކުގައި ޗުއްޓީ ހޭދަކުރާ ބީދައިން ޢަމަލުކުރާ ބަޔަކަށް ވެގެން ނުވާނެ ކަމަށާއި އެ ފަދަ ފަރާތްތަކުން ޤައުމަށް އިހުލާސްތެރި މަސައްކަތްތަކެއް ކޮށްދޭން ޖެހޭ ކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެއެވެ.

އަންގާރަ ދުވަހުގެ މަޖިލީހުގައި އޭނާ އެފަދައިން ވިދާޅުވީ އިންޓަރނޭޝަނަލް މެރިޓައިމް އޯގަނައިޒޭޝަނަށާއި، އިންޓަނޭޝަލް ރިނިއުބަލް އެނަރޖީ އެޖެންސީއަށާއި، ވޯލްޑް ޓްރޭޑް އޯގަނައިޒޭޝަނަށާއި، އޯގަނައިޒޭޝަން އޮފް އިސްލާމިކް ކޯޕަރޭޝަނަށް ރާއްޖެއިން ކަނޑައަޅާފައިވާ މައްސަލަ ހާރިޖީ ގުޅުންތަކުގެ ކޮމިޓީން ނިންމި ގޮތުގެ ރިޕޯޓަށް ބަހުސްކުރައްވަމުންނެވެ.

މި މައްސަލައިގެ ބަހުސްގައި ވާހަކަދައްކަވަމުން އޭނާ ވަނީ ސަފީރުން ޗުއްޓީ ހޭދަކުރާ މޭރުމުން ރާއްޖެއިން ބޭރަށް ގޮސް މަސައްކަތް ކުރާ ބަޔަކަށް ވުމުގެ ބަދަލުގައި ރައްޔިތުންނަށް ފައިދާ ވާނެ މަސައްކަތްތަކެއް ކުރަން ޖެހޭ ކަމަށް ވިދާޅުވެފައެވެ. އެގޮތުން ބޭރު ޤައުމުތަކަށް އައްޔަންކުރާ ސަފީރުންނާއި ޖަމިއްޔާތަކަށް އައްޔަންކުރާ ސަފީރުންގެ ފަރާތުން ރައްޔިތުންނަށް ލާބަ އާއި މަންފާ ލިބޭ ފަދަ އިޚުލާސްތެރި މަސައްކަތްތަކެއް ކުރުން މުހިންމުކަމަށް އޭނާ ވަނީ ވިދާޅުވެފައެވެ. ބޭރު ޤައުމުތަކަށް އައްޔަންކުރާ މީހުންގެ ހުރުމާއި، ކެއުން ފަދަ އަސާސީ ޚިދުމަތްތަކަށް ވެސް ރައްޔިތުންގެ ފައިސާ އިން ޚަރަދު ކުރާ އިރު އެ ރައްޔިތުންނަށްޓަކާ ސަފީރުން އަދާކުރަން ޖެހޭ ޒިންމާ ބޮޑުކަމަށް އޭނާ ވަނީ ވިދާޅުވެފައެވެ.

އެ މައްސަލަ ނިމުނު ގޮތުގެ ރިޕޯޓް ހުށަހަޅުއްވައިދެއްވީ މަޖިލީހުގެ ހާރިޖީ ގުޅުންތަކާއި ބެހޭ ކޮމިޓީގެ މުގައްރިރު މަތިވެރީ ދާއިރާގެ މެމްބަރު ހަސަން ޒަރީރެވެ. ކޮމިޓީން ވަނީ ރައީސް ޑރ.މުހައްމަދު މުއިއްޒު ފޮނުއްވި ގޮތަށް އިންޓަރނޭޝަނަލް މެރިޓައިމް އޯގަނައިޒޭޝަނަށް ކަނޑައަޅާ ދާއިމީ މަންދޫބަކަށް ހ.އޯކިޑް އިރްތިޝާމް އާދަމް އައްޔަންކުރަން ފެންނަ ކަމަށް ފާސްކޮށްފައެވެ. ހަމައެހެންމެ އިންޓަނޭޝަލް ރިނިއުބަލް އެނަރޖީ އެޖެންސީއަށް މ.ކޮތަންމާ މުހައްމަދު ހުސެއިން ސަރީރު އައްޔަންކުރުމަށާއި، ވޯލްޑް ޓްރޭޑް އޯގަނައިޒޭޝަނަށް މ.ވިލާދަށުގެ، ޑރ. ސަލްމާ ރަޝީދު އައްޔަންކުރުމަށާއި، އޯގަނައިޒޭޝަން އޮފް އިސްލާމިކް ކޯޕަރޭޝަނަށް މ.ވެސްޓް ސައިޑް އަހުމަދު ސަރީރު ކަނޑައެޅުމަށް އެ ކޮމިޓީގެ އިއްތިފާގުން ވަނީ ފާސްކޮށްފައެވެ.