ޓްރަމްޕް-ޕުޓިން ސަމިޓް ސައުދީ ގައި ބޭއްވުމަށް އެ ގައުމުން ތައްޔާރު ކަމަށް ބުނެފި

ސަޢޫދީ ޢަރަބިއްޔާ އިން ހުކުރު ދުވަހު އެމެރިކާގެ ރައީސް ޑޮނަލްޑް ޓްރަމްޕާއި ރަޝިއާ ގެ ރައީސް ވްލަޑިމިއަރ ޕުޓިންއާ ދެމެދު ކުރެވުނު ފޯނު ކޯލަށް މަރުޙަބާ ކިޔައި، އަދި ދެ ރައީސުންގެ މެދުގައި ބާއްވާ ސަމިޓެއް އެ ޤައުމުގައި ބޭއްވުމަށް ތައްޔާރަށް އޮތް ކަމަށް ސަޢޫދީ ޢަރަބިއްޔާގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފިއެވެ.

"ސައުދީ އިން ސަމިޓް ބޭއްވުމަށް މަރުޙަބާ ކިޔައި، އަދި ރަޝިއާ އާއި ޔުކްރެއިން އާ ދެމެދު ދެމެހެއްޓެނިވި ސުލްޙަ އެއް ޤާއިމުކުރުމަށް ސައުދީން މަސައްކަތް ކުރާނެ ކަން އިތުރަށް ކަށަވަރު ކޮށްދެމެވެ،" އެ ބަޔާނުގައި އިތުރަށް ބުނެފައިވެއެވެ.

ސަޢޫދީ ޢަރަބިއްޔާގެ ވަލީ ޢަހުދު މުޙައްމަދު ބިން ސަލްމާން ވިދާޅުވެފައިވަނީ، 2022 ވަނަ އަހަރުގެ މާރިޗު މަހުގެ 3 ވަނަ ދުވަހު ޕުޓިން އާއި ޔުކްރެއިންގެ ރައީސް ވުލެޑިމިއަރ ޒެލެންސްކީ އަށް ކުރެއްވި ފޯނު ކޯލުތަކާ ހަމައިން ފެށިގެން، ހަނގުރާމަ އަށް ސިޔާސީ ޙައްލެއް ހޯދުމަށް އެހީތެރިވުމަށް ރިޔާޟުން ތައްޔާރަށް އޮތް ކަމަށެވެ.

"ވޭތުވެދިޔަ ތިން އަހަރު ދުވަހުގެ ތެރޭގައި، ސައުދީ އިން މި މަސައްކަތްތައް ކުރިއަށް ގެންދިޔައެވެ. އޭގެ ތެރޭގައި މި މައްސަލައާ ގުޅޭގޮތުން ގިނަ ބައްދަލުވުންތަކެއް ބޭއްވުން ހިމެނެއެވެ،" ހުކުރު ދުވަހުގެ ބަޔާނުގައި ބުނެފައިވެއެވެ.

ޒެލެންސްކީ ހުކުރު ދުވަހު ވިދާޅުވެފައިވަނީ އޭނާ ސަޢޫދީ ޢަރަބިއްޔާ އަށާއި، ޔޫއޭއީ އަށާއި، ތުރުކީ އަށް ދަތުރުފުޅުތަކެއް ކުރައްވަން ރާވާފައިވާ ކަމަށެވެ. ނަމަވެސް ދަތުރުފުޅު ކުރައްވާނެ ތާރީޚެއް ވިދާޅެއް ނުވެއެވެ.