އިސްރާއީލުގެ ނުފޫޒުން އީރާނުން ލުބުނާނަށް ދަތުރު ކުރުމަށް ހަމަ ޖެހިފައި އޮތް ފްލައިޓެއް ބެއިރޫތުން ކެންސަލް ކޮށްލި މައްސަލަ ހޫނުވެއްޖެއެވެ.

ހުކުރު ދުވަހު ނެރުނު ބަޔާނެއްގައި، އިސްމާއީލް ބަގާއީ ވިދާޅުވެފައިވަނީ އިސްރާއީލުގެ ވެރިކަމުން މަތިންދާބޯޓަށް ދިން އިންޒާރުގެ ސަބަބުން "ބައިރޫތު އެއަރޕޯޓަށް ކުރާ އާންމު ދަތުރުތަކަށް ހުރަސްއެޅިފައިވާ" ކަމަށެވެ.

އޭނާ މިހެން ވިދާޅުވެފައިވަނީ އިރާނުން ލުބުނާނަށް ކުރުމަށް ހަމަޖެހިފައިވާ ދެ ދަތުރު ކެންސަލް ކުރަން ޖެހުމާ އެކުގައެވެ.

މި ދަތުރުތައް ކެންސަލް ކުރުމަށް އަމުރުކުރީ ލުބުނާނުގެ މަގުތަކާބެހޭ ވަޒީރެވެ. އެކަން އެ ގޮތައް ކުރަން ޖެހުނީ އިސްރާއީލުގެ ސަރުކާރުން ކުރި ޕްރެޝަރަކާ ގުޅިގެން ކަމަށް އީރާނުން ބުނެއެވެ. އިސްރާއީލުން ބުނެފައިވަނީ އެ ބޯޓުގައި ހިޒްބުﷲ އަށް ފައިސާ ފައިސާ ގެންދާ ކަމަށެވެ.

އިރާނުގެ ތަރުޖަމާނު ގޮވާލާފައިވަނީ ކަމާބެހޭ ބައިނަލްއަޤްވާމީ ޖަމާޢަތްތަކުން، ޚާއްޞަކޮށް އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައިސީއޭއޯ) އިން "އެ ޤައުމުގެ ވައިގެ ދަތުރުފަތުރުގެ ރައްކާތެރިކަމާއި ސަލާމަތާ ދެކޮޅަށް އިސްރާއީލުން ކުރާ ނުރައްކާތެރި ޢަމަލުތައް ހުއްޓުވުމަށް" ސީރިއަސް ފިޔަވަޅުތަކެއް އެޅުމަށެވެ.

އިރާނުގެ ފްލައިޓްތައް ޖެއްސުމަށް ހުއްދަ ނުދިނުމާ ގުޅިގެން ބެއިރޫތު އިންޓަރނޭޝަނަލް އެއަރޕޯޓު ހުންނަ ސަރަހައްދުގައި ވަނީ މުޒާހަރާ ކޮށްފައެވެ.

ބުރާސްފަތި ދުވަހުގެ ރޭ ގިނަ އަދަދެއްގެ މީހުން ބެއިރޫތު އިންޓަރނޭޝަނަލް އެއަރޕޯޓު ވަށައިގެންވާ މަގުތަކަށް ނުކުމެ، އެއަރޕޯޓަށް ދާ މައި މަގު ބަންދުކޮށް، ޓަޔަރުތަކުގައި ރޯކޮށް، އެމެރިކާ އާއި އިސްރާއީލާ ދެކޮޅަށް އަޑު އުފުލާފައިވެއެވެ.

މަގު ސާފުކުރުމަށް ލުބުނާނުގެ ސިފައިން ނުކުތުމުން ހަމަނުޖެހުން އިތުރުވިއެވެ.

ބެއިއެރޫތު ގައި ހުންނަވާ އީރާނުގެ ސަފީރު މުޖްތަބާ އަމާނީ ހުކުރު ދުވަހު ވިދާޅުވެފައިވަނީ އިރާނުގެ މަތިންދާބޯޓުތަކުގެ ބަދަލުގައި އެހެން ދަތުރުތަކެއް ހަމަޖެއްސުމަށް ލުބުނާނުގެ ސަރުކާރުން ހުށަހަޅާފައިވާ ހުށަހެޅުން އިރާނުން ޤަބޫލު ނުކުރާ ކަމަށެވެ.

"ލުބުނާނުގެ ސަރުކާރުން އިރާނުގެ މަތިންދާބޯޓުތަކުގެ ބަދަލުގައި އެހެން ދަތުރުތަކެއް ހަމަޖައްސަން މަސައްކަތް ކުރަމުން ދެއެވެ. އަޅުގަނޑުމެން ޢާންމު ގޮތެއްގައި ލުބުނާނުގެ އެއަރލައިންތަކުން އިރާނަށް ދަތުރުތައް ފެށުމަށް މަރުޙަބާ ކިޔަމެވެ. އެހެން ނަމަވެސް އިރާނުގެ ދަތުރުތައް ކެންސަލްކުރާ ގޮތަށް ނޫނެވެ،" އޭނާ އިތުރުކުރެއްވިއެވެ.

އޭނާ ވިދާޅުވީ ބެއިރޫތުން "އިރާނުގެ އެއަރލައިން ތަކަށް ހުރަސް ނާޅާނަމަ" އިރާނުން ލުބުނާނު ސަރުކާރުގެ ޕްލޭނަށް ހަމަގައިމުވެސް އެއްބަސްވާނެ ކަމަށެވެ.

ސަފީރު ވިދާޅުވީ ދެ ޤައުމުގެ މެދުގައި އެއްބަސްވުމަކަށް އާދެވޭތޯ މަޝްވަރާތައް ކުރިއަށްދާ ކަމަށެވެ.

އޭނާ ވިދާޅުވީ ދަތުރުތައް ކެންސަލްކުރުމުގެ ސަބަބުން ލުބުނާނުގެ ފަސިންޖަރުން، ތެހެރާން އެއަރޕޯޓުގައި ހާލުގައި ޖެހި، އަދި އިރާނަށް ޒިޔާރަތްކުރުމަށް ހަމަޖެހިފައިވާ ލުބުނާނުގެ މީހުންނަށް ދަތުރު ނުކުރެވި ތިބި ކަމަށެވެ.

އަމާނީ ފާހަގަކުރެއްވި ގޮތުގައި އިރާނުގެ ދަތުރުތައް ކެންސަލްކުރެވުނީ އިސްރާއީލުގެ ސަރުކާރުން ލުބުނާނަށް ދިން އިންޒާރާކާ ގުޅިގެންނެވެ. އޭނާ ވިދާޅުވީ ލުބުނާނުގެ ރައްޔިތުންނަކީ އެމީހުންގެ މިނިވަންކަން ދެމެހެއްޓުމަށް މަސައްކަތްކުރާ ބައެއް ކަމަށާއި އަދި އެއްވެސް ޤައުމަކުން، ޚާއްޞަކޮށް ޣައިރު ގާނޫނީ ޔަހޫދީ ދައުލަތުން ދޭ އެފަދަ އިންޒާރު ގަބޫލު ނުކުރާނެ ކަމަށެވެ.

މިއީ "ޤަބޫލުކުރެވޭނެ ކަމެއް ނޫން" އަދި މިކަމުގެ ސަބަބުން ޢާންމު އިހުތިޖާޖު ތަކަށް މަގުފަހިވާނެ ކަން އޭނާ އިތުރުކުރެއްވިއެވެ.

އިރާނުގެ ސަފީރު އުންމީދު ފާޅުކުރެއްވީ މި މައްސަލަ އަވަހަށް ހައްލުވެ، އަދި ލުބުނާނުގެ ސަރުކާރުން ވިސްނުންތެރި ކަމާއެކު ޢަމަލުކުރާނެ ކަމަށެވެ.