އޭޝިއަން ކަޕްގައި ވާދަކޮށް ރާއްޖެ އިން ރިހި މެޑަލް ހޯދައިފި

އޭޝިއަން ޝޫޓިން ކަޕް 2025 ގައި ވާދަކޮށް، ރާއްޖޭގެ ޤައުމީ ޝޫޓިން ޓީމުގައި ހިމެނޭ މަރިޔަމް އީޝަލް މިސްބާޙު ރިހި މެޑަލް ހޯދައިފި އެވެ.

ތައިލެންޑުގެ ވެރި ރަށް ބެންކޮކުގައި ކުރިއަށް ދިޔަ މުބާރާތުގައި ވާދަކޮށް، އީޝަލް ރިހި މެޑަލް ހޯދީ އެއާ ފިސްޓަލް އަންހެން ޖޫނިއާ ކެޓަގަރީންނެވެ. އުމުރުން 15 އަހަރުގެ އީޝަލް ރިހި މެޑަލް ހޯދީ މުބާރާތުގައި ބައިވެރިވި 23 ޤައުމުގެ ތެރެއިން 21 ޤައުމާ ވާދަކޮށެވެ.

މި އިވެންޓުގެ އެއް ވަނަ ހޯދީ ޓައިވާންގެ ލިއާއޯ ކީ ރޮން އެވެ. އޭނާ އެއް ވަަނަ ހޯދާފައި ވަނީ 231.2 ގެ ސްކޯއަކުންނެވެ. ދެ ވަނަ ރާއްޖޭގެ އީޝަލް ހޯދީ 229.9 ގެ ސްކޯއަކުންނެވެ. އަދި ތިން ވަނަ އަށް ދިޔަ ނޯތު ކޮރެއާގެ ކިމް ހިއޯން ސުކް ވަނީ 211.8 ގެ ސްކޯއެއް ހޯދައިފަ އެވެ.

އެހެންކަމުން އޭޝިއަން ޝޫޓިން ކަޕްގައި ވާދަކޮށް ރާއްޖޭގެ އީޝަލް ހޯދި ރިހި މެޑަލް އަކީ ރާއްޖެ އަށް ތާރީޚީ ކާމިޔާބެކެވެ. އަދި މިއީ އޭޝިއާ ބައްރުގެ މުބާރާތެއްގައި ވާދަކޮށް ރާއްޖެ އަށް ލިބުނު ފުރަތަމަ މެޑަލް އެވެ.