ބްރޯޑްކާސްޓިން ކޮމިޝަންގެ މެންބަރުކަމަށް ދާދި ފަހުން އައްޔަންކޮށްފައިވާ މުހައްމަދު އަބްދުﷲ (މުހައްމާ)، ބޭންކް އޮފް މޯލްޑިވްސް (ބީއެމްއެލް) އިން ނަގާފައިވާ ލޯނަކަށް ފައިސާ ނުދައްކާތީ މަހެއްގެ މައްޗަށް މަދުވެގެން 83،000ރ. ދައްކަން އޭނާގެ މައްޗަށް ޙުކުމްކޮށްފިއެވެ.

ސިވިލް ކޯޓުން އެފަދައިން ޙުކުމް ކުރީ ބުރާސްފަތި ދުވަހުއެވެ.

ރައްޔިތުންގެ މަޖިލީހުގެ މެމްބަރުކަން ވެސް ކުރިން އަދާކުރައްވާފައިވާ މުހައްމާގެ މައްޗަށް މި ފައިސާ ދައްކަން ޙުކުމް ކޮށްފައި ވަނީ އޭނާ ބޭންކް އޮފް މޯލްޑިވްސް (ބީއެމްއެލް) އިން ނަގާފައިވާ ލޯނަކަށް އެއްބަސްވުމާ އެއްގޮތަށް ފައިސާ ދައްކަމުން ނުދާތީ، އެ ބޭންކުން ހުށަހަޅާފައިވާ މައްސަލަ އަކާއި ގުޅިގެން ކުރި ޙުކުމްގައެވެ.

އެ މައްސަލައިގައި ސިވިލް ކޯޓުން ކުރި ޙުކުމުގައި މުހައްމާގެ މައްޗަށް އަމުރުކޮށްފައި ވަނީ މަހަކު މަދުވެގެން 83،000ރ. ދައްކާ, އޭނާ ނަގާފައިވާ ލޯނު ހަލާސްކުރުމަށެވެ.

މި ހިނގާ ފެބްރުއަރީ މަހުގެ 4 ވަނަ ދުވަހުގެ ނިޔަލަށް އޭނާ ބީއެމްއެލް އަށް ނުދައްކާ 5.2 މިލިއަން ރުފިޔާ އޮތް އިރު އެ ފައިސާގެ އިތުރުން އިންޓްރެސްޓާއި ޖޫރިމަނާގެ ފައިސާ ވެސް އޭނާ ދައްކަން ޖެހެއެވެ.

ސިވިލް ކޯޓުން ވަނީ އޭނާ ދައްކަން ޖެހެ ފައިސާ 2036 ވަނަ އަހަރުގެ މޭއިގެ ނިޔަލަށް ދައްކާ ޚަލާސްކުރުމަށް ޙުކުމް ކޮށްފައެވެ.

މި މައްސަލައިގައި ބޭންކުން ވަނީ މުހައްމާ ލޯނު ރަހުނު ކޮށްފައި އޮތް ހ. ފުރާތު ވިއްކާލުމުގެ ހުއްދައަށް އެދިފައެވެ.

އެހެންނަމަވެސް ދަރަނީގެ ފައިސާ ދެއްކުމަށް އޭނާ އެއްބަސްވާތީ ބޭންކުން ޝަރީއަތުގައި އެދުނީ އެ ފައިސާ ދައްކަން މުހައްމާ އަށް ފުރުސަތު ދިނުމަށެވެ. ސިވިލް ކޯޓުގެ ޙުކުމުން އެނގޭ ގޮތުން މުހައްމާ ވެސް ވަނީ މަހުން މަހަށް އެ ފައިސާ ދައްކާ ޚަލާސްކުރުމަށް އެދިފައެވެ.