ސަރުކާރުން ޓެކްސީ ޚިދުމަތް ފަށަން އެމްޓީސީސީ އާ ހަވާލު ކުރި އިރު ހުސްވި ޑިސެމްބަރު މަހު ޓްރާންސްޕޯޓް މިނިސްޓްރީން ބުނީ މި ޚިދުމަތައް އެއްވެސް ކާރެއް ގެނައުމަށް ހަމަޖެހިފައި ނުވާކަމަށް

ސަރުކާރުން ގްރޭޓަރ މާލޭ ސަރަހައްދުގައި ޓެކްސީ ޚިދުމަތް ފަށަން ބުދަ ދުވަހު ޓްރާންސްޕޯޓް މިނިސްޓްރީން އެމްޓީސީސީ އާ އެކު އެއްބަސްވުމެއް ގައި ސޮއި ކުރި އިރު، މި ދިޔަ ޑިސެމްބަރު މަހު ބުނެފައިވަނީ ޓެކްސީ ޚިދުމަތް ފަށަން އެއްވެސް ކާރެއް ގެނައުމަށް ހަމަ ޖެހިފައި ނުވާ ކަމަށެވެ.

އަމިއްލަ ފަރާތަކުން އާރުޓީއައި ގެ ދަށުން ޓްރާންސްޕޯޓު މިނިސްޓްރީ އަށް ހުށަހެޅި ސުވާލުތަކަށް 11 ޑިސެމްބަރު 2024 ގައި ދިން ޖަވާބުގައި އެ މިނިސްޓްރީން ބުނީ މިހާތަނަށް މި ޚިދުމަތައް އެއްވެސް ކާރެއް ގެނެސްފައި ނުވާ ކަމަށާއި، އެ ހިސާބަށް ކާރު ހޯދަން އޯޑަރުވެސް ކޮށްފައި ނުވާ ކަމަށެވެ.

މިކަމަށް ޚަރަދު ހަމަޖެހިފައިވަނީ ކޮން ގޮތަކަށްތޯ ކުރި ސުވާލުގެ ޖަވާބުގައި ބުނެފައިވަނީ "އަދި ވަކި ގޮތެއް ހަމަޖެހިފައި ނެތް" ކަމަށެވެ.

އޭގެ އިތުރުން، ސަރުކާރުގެ ބަޖެޓު ވެސް އަދި ބޭރުގެ އެހީވެސް މިކަމަށް ހަމަ ޖެހިފައި ނުވާ ކަމަށެވެ.

ސަރުކާރުން އީވީ ޓެކްސީ ޚިދުމަތުގެ ނަމުގައި ޓެކްސީ ލައިނެއް ގްރޭޓަރ މާލޭ ސަރަހައްދުގައި ހިންގުމަށް އެމްޓީޓީސީ އާ ހަވާލު ކުރުމަށް ބުދަ ދުވަހު ބޭއްވި ރަސްމިއްޔާތުގައި ސަރުކާރުން ބުނީ، 100 އިންސައްތަ އިލެކްޓްރިކް ވެހިކަލް ހިމެނޭ މި ޚިދުމަތަކީ މިހާރު ޓެކްސީ ޚިދުމަތް ހޯދުމުގައި ކުރިމަތިވާ ހުރިހާ މައްސަލަތަކަށް ހައްލު ހޯދައިދެވޭނެ ސައުވީސް ގަޑިއިރުގެ ޚިދުމަތެއް ކަމުގައެވެ.

ބުދަ ދުވަހު އޮތް ރަސްމިއްޔާތުގައި ސަރުކާރުން ތައާރުފް ކުރާ ޓެކްސީ ކާރުތަކުގެ މަންޒަރުތައް ވެސް ވަނީ ދައްކާލާފައެވެ.