ސަރުކާރުގެ ޓެކްސީ ޚިދުމަތް ފެށުމަށް އެމްޓީސީސީ އާ ހަވާލު ކޮށްފި
ސަރުކާރުން ބުނެފައިވަނީ މި ޚިދުމަތުގެ ސަބަބުން މިހާރު ޓެކްސީ ހިދުމަތް ހޯދުމުގައި ދިމާވާ ހުރިހާ މައްސަލަތަކެއް ހައްލުވެ، މާލޭގެ މަގުތަކުގެ ތޮއްޖެހުމުގެ މައްސަލަ އަށް ހައްލު ލިބޭނެ ކަމަށެވެ.
2025 ފެބްރުއަރީ 12 ވަނަ ދުވަހު ސަރުކާރުގެ ޓެކްސީ ޚިދުމަތް ފެށުމަށް އެމްޓީސީސީ އާ ހަވާލު ކުރުމުގެ އެއްބަސްވުމުގައި ސޮއި ކުރުމުގެ ރަސްމިއްޔާތުގައި ޓްރާންސްޕޯޓް މިނިސްޓަރ އަމީން
ސަރުކާރުން އީވީ ޓެކްސީ ޚިދުމަތުގެ ނަމުގައި ޓެކްސީ ލައިނެއް ހިންގުމަށް އެމްޓީޓީސީ އާ ހަވާލު ކޮށްފިއެވެ.
ބުދަ ދުވަހު ބޭއްވި ރަސްމިއްޔާތެއްގައި ޓްރާންސްޕޯޓް މިނިސްޓްރީގެ ފަރާތުން އެއްބަސްވުމުގައި ސޮއި ކުރެއްވީ ޓްރާސްޕޯޓް މިނިސްޓްރީގެ ޑިރެކްޓަރ ޖެނެރަލް އަހުމަދު ޝަމީމް އެވެ. އެމްޓީސީސީގެ ފަރާތުން ސޮއި ކުރެއްވީ މެނޭޖިން ޑިރެކްޓަރ އަހުމަދު ސައުދީ އެވެ.
ފެށުނީއްސުރެ އަމިއްލަ ފަރާތްތަކުން ދެމުން އައި މި ވިޔަފާރީގެ ޚިދުމަތުގެ ތެރެއަށް ސަރުކާރުން ވަނީ، އެ ޚިދުމަތުގައި މަސައްކަތް ކުރަމުން އަންނަ އަމިއްލަ ފަރާތްތަކުން އެކަމާ ދެކޮޅު ހަދަމުން ދަނިކޮށްނެވެ.
ސަރުކާރުން ޓެކްސީ ލައިނެއްގެ ޚިދުމަތް ފަށާއިރު، ޓެކްސީ ޚިދުމަތްދޭ ފަރާތްތަކުންނާއި ޑްރައިވަރުންގެ ޖަމްއިއްޔާގެ ފަރާތުން ސަރުކާރުގެ ކަމާ ބެހޭ ވެރިންނާއި ރައްޔިތުންގެ މަޖިލިހުގައި ސަރުކާރު ތަމްސީލު ކުރާ މެމްބަރުންނާއި ރައްޔިތުންގެ މަޖިލީހުގެ ކަމާ ބެހޭ ކޮމިޓީ އާ ބައްދަލު ކޮށް އެ ފަރާތްތަކުގެ ކަންބޮޑުވުންތައް ވަނީ ހިއްސާ ކޮށްފައެވެ.
އެހެން ނަމަވެސް އިތުބާރު ހުރި ގޮތަކަށް އެނގިފައިވާ ގޮތުގައި ސަރުކާރުން ޓެކްސީގެ ޚިދުމަތް ފެށުމަށް އެމްޓީސީސީ އާ ހަވާލު ކުރި އިރު މި ކަންބޮޑުވުންތަކަށް އެއްވެސް ވަރަކަށް ސަރުކާރުން އިޖާބައެއް ދީފައެއް ނުވެއެވެ.
ސަރުކާރުން ބުނީ، 100 އިންސައްތަ އިލެކްޓްރިކް ވެހިކަލް ހިމެނޭ މި ޚިދުމަތަކީ މިހާރު ޓެކްސީ ޚިދުމަތް ހޯދުމުގައި ކުރިމަތިވާ ހުރިހާ މައްސަލަތަކަށް ހައްލު ހޯދައިދެވޭނެ ސައުވީސް ގަޑިއިރުގެ ޚިދުމަތެއް ކަމުގައެވެ.
ޓެކްސީ ޚިދުމަތް ކުރިއަށް ގެންދިއުމަށް ސަރުކާރުން އެމްޓީސީސީ އަށް ހަވާލު ކުރެއްވި ކަމަށްޓަކައި ރައީސުލް ޖުމްހޫރިއްޔާ އަށް އެމްޓީސީސީގެ މެނޭޖިންގ ޑިރެކްޓަރ އަހުމަދު ސައުދީ ވަނީ ޝުކުރު އަދާ ކުރައްވާފައެވެ.
ބުދަ ދުވަހުގެ ރަސްމިއްޔާތުގައި ސައުދީ ދެއްކެވި ވާހަކައިގައި މިފަދަ ކޮންމެ ޚިދުމަތެއް ތައާރުފް ކުރެވޭ އިރު އެކަމުގެ މަގްސަދާ ބެހޭ ގޮތުން ބަހުސް ކުރެވިދާނެ ކަމަށާއި އެހެން ނަމަވެސް އެ ބަހުސަށް ދާން ބޭނުން ނުވާ ކަމުގައެވެ.
މި ރަސްމިއްޔާތުގައި ދެއްކި ޕްރެސެންޓޭޝަން ގައި ފާހަގަ ކޮށްފައިވާ ގޮތުގައި މިހާރު މާލޭ ސަރަހައްދުގައި ދޭ ޓެކްސީ ޚިދުމަތުގައި ގިނަ މައްސަލަތަކެއް ހުރި ކަމަށް ވަނީ ބުނެފައެވެ.
އޭގެ ތެރޭގައި ވާރޭ ވެހޭ އިރު ޓެކްސީ ނުލިބުމާއި، ކަނޑައެޅިފައިވާ އަގަށް ވުރެ ބޮޑު އަގު ދައްކަން ޖެހުމާއި، ބޭނުންވާ ވަގުތު ޚިދުމަތް ނުލިބުމާއި، ބޭނުންވާ ތަނަކަށް ނުދެވުމާއި، އިތުރު ފަރާތްތައް ކާރަށް އެރުވުމާއި، ސާފުތާހިރުކަން ކުޑަ ވުމާއި، ރައްކައުތެރި ކަމުގެ މައްސަލަ ހިމެނޭ ކަމުގައެވެ.
ސަރުކާރުން ބުނަނީ މި ތައާރުފް ކުރެވޭ ޓެކްސީ ލައިންގެ ސަބަބުން މާލޭގެ މަގުތަކަށް އިތުރުވަމުންދާ ވެހިކަލް ތަކުގެ މައްސަލަ އާއި ތޮއްޖެހުން ހައްލުވެގެން ދާނެ ކަމަށާއި މިހާރު އަމިއްލަ ފަރާތްތަކުން ދެމުން އަންނަ ޓެކްސީ ޚިދުމަތުގައި ދިމާވާ މައްސަލަތައް ކުރިމަތި ނުވާނެ ކަމަށެވެ.
ސަރުކާރުން ތައާރުފް ކުރާ ޓެކްސީ ޚިދުމަތުގައި ފުލްޓައިމްކޮށް އަދި ޕާޓް ޓައިމް ކޮށް ޑްރައިވަރުންގެ ގޮތުގައި މަސައްކަތް ކުރެވޭނެ ކަމަށް އެމްޓީސީސީގެ މެނޭޖިންގ ޑިރެކްޓަރ ވިދާޅުވިއެވެ.
ސަރުކާރުން ބުނީ މި ޚިދުމަތް ފެށުނު ނަމަވެސް އަމިއްލަ ފަރާތްތަކުން މިހާރުވެސް ދެމުން ގެންދާ ޚިދުމަތް ކުރިއަށް ގެންދެވޭނެ ކަމުގައެވެ.
